Myaka 100 ya Kũtavanyʼa Ĩũlũ wa Ũsumbĩ wa Ngai!
1. Andũ ma Yeova meekĩiwe vinya kwĩka ata vakuvĩ myaka 100 mĩvĩtu?
1 “Sisyai, Mũsumbĩ nũsumbĩkĩte! Ninywʼĩ mũnyuvĩtwe mũnyaĩĩkye ũvoo ĩũlũ wake. Kwoou tavanyʼai, tavanyʼai, tavanyʼai, ĩũlũ wa Mũsumbĩ na ũsumbĩ wake.” Ndeto isu syaneeniwe nĩ Mwana-a-asa Rutherford vakuvĩ myaka 100 mĩvĩtu, na nĩsyeekĩie andũ ma Yeova vinya matavanyʼe ũvoo wa Ũsumbĩ nthĩ yonthe. Na ũu nĩwʼo twĩkĩte! O ta Aklĩsto ma ĩvinda ya atũmwa, nĩtũtavanĩtye ũvoo mũseo wa Ũsumbĩ ‘syũmbenĩ syonthe ĩtheo wa ĩtu.’ (Ako. 1:23) Nthĩnĩ wa myaka ĩsu 100, nĩ nzĩa syĩva tũtũmĩĩte kũtavanyʼa ũvoo mũseo wa Ũsumbĩ wa Ngai? Tũtonya ata kũendeea kũtavya andũ ĩũlũ wa Ũsumbĩ ĩvindanĩ yĩĩ myaka 100 ĩkilyĩ ĩnathela kuma Ũsumbĩ ũsu wambĩĩa kũsumbĩka?
2. Makaseti maitũ matetheesye ata kũtavanyʼa ĩũlũ wa Ũsumbĩ wa Ngai?
2 Nzĩa Ila Itũmĩĩtwe Kũvika Yu: Kwa myaka mingĩ, makaseti maitũ methĩĩtwe maineenea Ũsumbĩ wa Ngai. Kuma mwaka wa 1939, ĩkaseti yĩla tũtũmĩaa mũno yĩthĩĩtwe na ĩsyĩtwa: Mũsyaĩĩsya Yĩtavanasya Ũsumbĩ wa Yeova. Ĩkaseti yĩĩ yĩneeneaa mũno Ũsumbĩ wa Ngai na kĩla Ũsumbĩ ũsu ũkeka. O nayo ĩkaseti ya Amkeni! nĩwetaa nesa vyũ kana no Ũsumbĩ wa Ngai ũkaminĩa andũ mathĩna. Makaseti asu nĩmo maalyũlawa na makanyaĩĩkwʼa kwĩ ĩkaseti yĩngĩ o na yĩva ĩũlũ wa nthĩ!—Ũvu. 14:6.
3. Nĩ nzĩa syĩkũ tũtũmĩĩte kũtavanyʼa ĩũlũ wa Ũsumbĩ?
3 Andũ ma Yeova nĩmatũmĩĩte nzĩa syĩ kĩvathũkanyʼo kũtavanyʼa ĩũlũ wa Ũsumbĩ wa Ngai. Navu tene, nĩtwatũmĩaa ngalĩ syĩ na sivika, letiũ, na inanda. Nzĩa isu sya kũtavanyʼa nĩsyatumie ũvoo mũseo ũnyaĩĩkwʼa kũndũ kwingĩ ĩvindanĩ yĩu atavanyʼa maĩ anini. (Sav. 19:4) Myakanĩ ya mĩtũkĩ, Kĩsese kitũ kya jw.org nĩkĩkĩĩtwe maũvoo maingĩ ĩũlũ wa Ũsumbĩ wa Ngai. Maũvoo asu nĩmatumĩte andũ aingĩ, o na ala mekalaa isionĩ ila wĩa wa kũtavanyʼa ũkũnĩtwe maluvuku, mamanya ĩũlũ wa Ũsumbĩ.
4. Nĩ nzĩa syĩkũ sya mwanya tũtũmĩĩte kũnyaĩĩkya ũvoo wa Ũsumbĩ?
4 Ĩngĩ, andũ ma Yeova nĩmatũmĩĩte nzĩa sya mwanya kũnyaĩĩkya ũvoo wa Ũsumbĩ. Kwa ngelekanyʼo, mwakanĩ wa 1995 ũu, eka ũtavanyʼa wa nyũmba na nyũmba, nĩtwambĩĩie kũtavanyʼa kũla andũ maendaa kũthyũmũa, kũla kwiawa ngalĩ, na kũndũ kwa viasala. Oyu mĩtũkĩ, nĩtũnambĩĩisye ũtavanyʼa wa mwanya kũndũ kũla kwĩthĩawa andũ aingĩ nthĩnĩ wa taoni ila nene ĩũlũ wa nthĩ. O na ĩngĩ, ikundi mbingĩ nĩsyĩthĩĩtwe iitavanyʼa taoni ila syĩ andũ aingĩ isionĩ syoo iitũmĩa tũkalĩ twa kũsukumwa na mesa, ila siawa kũla kũvĩtĩlaa andũ aingĩ. O na twatũmĩa nzĩa isu ingĩ kũtavanyʼa, nyũmba na nyũmba nĩyo nzĩa ĩla tũtũmĩaa mũno kũtavanyʼa ĩũlũ wa Ũsumbĩ.—Meko 20:20.
5. Mwaka mweũ wa ũthũkũmi wambĩĩa, tũkeethĩwa na myanya ya kwĩka ata?
5 Maũndũ Ala me Mbee: Mwaka mweũ wa ũthũkũmi wambĩĩa Mwei wa 9, atavanyʼa aingĩ nĩmekwosa ũvainia wa kĩla ĩvinda. We no wĩthĩwe ũmwe wa asu? Ethĩwa vaitonyeka, no ũvange ũkosaa ũvainia mũtetheesya mavinda kwa mavinda. O na ethĩwa ndũtonya kwosa ũvainia, Yeova akaathima kĩthito kyonthe kĩla ũkekĩa nĩ kana ũtavanyʼe ĩũlũ wa Ũsumbĩ.—Mal. 3:10.
6. Nĩkĩ Mwei wa 10, 2014, ũkethĩwa wĩ wa mwanya?
6 Myaka 100 kuma Ũsumbĩ wa Ngai wambĩĩa kũsumbĩka ĩkathela Mwei wa 10, mwaka ũũ wa 2014. Kwa kĩtumi kĩu, ĩkaseti ya Mũsyaĩĩsya ya mwei ũsu yĩkaneenea mũno ĩũlũ wa Ũsumbĩ wa Ngai. Ĩkĩa kĩthito ũnenge andũ aingĩ ũndũ vatonyeka ĩkaseti yĩu. Tweteele ĩvinda ĩseo yĩla yũkĩte, ekai kĩla ũmwe witũ aendeee ‘kũtavanyʼa ũla ũvoo mũseo wa Ũsumbĩ wa Ngai’ kwa onthe ala mekwenda kwĩthukĩĩsya.—Meko 8:12.