Tũmĩa Kĩsese kya jw.org Ĩla Ũũtavanyʼa

Kĩsese kitũ nĩ kya vata mũno nũndũ nĩkĩtũtetheeasya kũnyaĩĩkya ũvoo mũseo “kũvika itulu sya nthĩ.” (Meko 1:8) Ene nyũmba aingĩ mayĩsĩ kana ve Kĩsese kya jw.org. Mamanyaa kana ve kĩsese kĩtawa ũu ĩla matavwʼa nĩ mũtavanyʼa ĩũlũ wakyo.

Mũsyaĩĩsya ũmwe wa kũthyũlũlũka ekĩĩte vitio Nĩkĩ Waĩle Kwĩmanyĩsya Mbivilia? simũnĩ yake na amyonasya andũ kĩla ĩvinda akwata mwanya. Kwa ngelekanyʼo, ĩla ũkũtavanyʼa nyũmba na nyũmba, asasya: “Ũmũnthĩ nĩthokeaa andũ o ndatĩka mbũthũ ndimatetheesya kũkwata mosũngĩo ma makũlyo aa atatũ ma vata: Nĩkĩ nthĩ yusũĩte mathĩna? Ngai akamamina ata? Na tũtonya kũkitana namo ata ũmũnthĩ? Vitio ĩno nguvĩ nĩneneete makũlyo asu.” Na ĩndĩ ayambĩĩaa kũmĩthaũka na aisisya one kana mwene nyũmba nũkũmĩtanĩa. Vitio ĩsu yĩthĩawa yĩ nzeo mũno ũkethĩa andũ aingĩ mamĩloelaa mate kũsisya ũtee nginya ĩkathela. Na ĩndĩ mũsyaĩĩsya ũsu ayasya: “Nĩĩkwatya nĩweewʼa kana no usũsye vomu ĩla yĩ Kĩsesenĩ kitũ ũkũlye ũmanyĩwʼe Mbivilia. Na nũndũ nĩ o vaa, no ngwonyʼe kwa ndatĩka mbũthũ ũndũ twĩmanyĩasya Mbivilia na andũ.” Mwene nyũmba eetĩkĩla, nũmwonasya ũndũ twĩmanyĩasya Mbivilia na andũ aitũmĩa mbulosua Ũvoo Mũseo. Ethĩwa mwene nyũmba nde na ĩvinda, nũvangaa nake emwonyʼa ĩla ĩngĩ asyoka. Ĩla mũsyaĩĩsya ũsu wesĩla vandũ akunde kaawa athyũmũangĩte, ekaa oou na mũndũ ũla wĩkalĩte vakuvĩ nake mamina kũmanyana. We nũtũmĩaa Kĩsese kya jw.org ũtavanyʼanĩ?