Sukulu ya Ũthũkũmi wa Kĩtheokulasi ya 2015 Ĩkatũtetheesya Kwĩthĩwa Alimũ Aseo

¹ Mũandĩki wa Savuli Ndaviti aisye atĩĩ: “Ndeto sya kanywʼa wakwa, na mosũanĩo ma ngoo yakwa Nĩmetĩkĩlĩke mbee waku, Ame Yeova, ĩvia yakwa, na mwovosya wakwa.” (Sav. 19:14) O naitũ twĩenda ndeto sitũ imwendeeasye Yeova nũndũ nĩtwonaa kĩanda kitũ kya kũneena ũla wʼo kĩkundinĩ na ũtavanyʼanĩ kĩ kya vata. Nzĩa ĩmwe Yeova ũtũmĩaa kũtũmanyĩsya kũtavanyʼa nĩ kwĩsĩla Sukulu ya Ũthũkũmi wa Kĩtheokulasi. Sukulu ĩsu yĩkawa ikundinĩ mbee wa 111,000 nthĩ yonthe kĩla kyumwa. Sukulu ĩsu nĩtetheesye ana-a-asa na eĩtu-a-asa ma mĩthemba yonthe na ma kuma isio syonthe sya nthĩ kwĩthĩwa me atavanyʼa aseo ma ũvoo mũseo, na ĩkamatetheesya methĩwe matonya kũmanyĩsya na ũĩ, na me na ũkũmbaũ.—Meko 19:8; Ako. 4:6.

² Mũvango wa sukulu wa 2015 wĩ na maũvoo makaumawʼa tũvukunĩ Ĩmanyĩsye Kĩla kĩ Ndetonĩ ya Ngai na Maũndũ ma Kũneenea Kuma Mbivilianĩ. O na ĩngĩ, ve moalyũku ma ndatĩka ila ikatũmĩawa kĩlungunĩ kya maũndũ manene, na nthĩnĩ wa Ũvoo Na. 1. Tũlungu tũũ tũatĩĩe nĩtũeleetye ĩũlũ wa moalyũku asu na ũndũ sukulu ĩkekawa.

³ Maũndũ Manene ma Ũsomi wa Mbivilia: Mwana-a-asa ũla wanengwa kĩlungu kĩĩ akeethĩawa na ndatĩka ilĩ sya kũneenea ũndũ ũmwe wa kwendeesya kuma ũsomi wa Mbivilia wa kyumwa kĩu, na aielesya ũndũ ethukĩĩsya matonya kũtũmĩa ũndũ ũsu. Eeyũmbanyʼa nesa, akeethĩawa atonya kũtũmĩa ndatĩka isu ilĩ kũneenea ũndũ wa vata vamwe na kĩkundi. Ĩtina wa ũu, ethukĩĩsya makeethĩawa na ndatĩka thanthatũ o ta tene sya kumya maelesyo ma sekendi 30 kana ĩtheango ĩũlũ wa maũndũ ma kwendeesya ala monie nthĩnĩ wa ũsomi wa Mbivilia. No nginya ethukĩĩsya meyũmbanyʼe nesa na mayĩthĩwa na ndaĩa ya kwĩsiĩĩa nĩ kana maumye maelesyo ma kwaka maitũmĩa sekendi isu 30. Kwĩka ũu nĩkũtethasya. O na ĩngĩ, mũndũ atũmĩa sekendi 30, aangĩ nĩmakwataa mwanya wa kumya maelesyo.

⁴ Ũvoo Na. 1: Ĩvinda yĩla ĩvathĩtwe ya kũsoma Mbivilia yu ĩkeethĩawa ndatĩka itatũ kana ĩtheango na mũndũ akasomaa mĩsoa ĩte mbingĩ. Ala manengwa ũvoo ũũ maĩle kũsoma mĩsoa ĩla maaĩwe ĩngĩ na ĩngĩ na maimĩsoma na wasya ĩla mekwĩyũmbanyʼa. Masisye ethĩwa nĩmekũtamũka ndeto nesa na mateũthyoma nĩ kana ũvoo woo ũeleeke nesa. Athũkũmi onthe ma Yeova maĩle kũtata masome nesa nũndũ kũsoma nĩ kwa vata mũno ũthaithinĩ witũ. Nĩ ũndũ wa kũtanĩthya ta kĩ kwĩthĩwa na syana isomaa nesa! Asyai nĩmaĩle kũkathwa mũno nũndũ wa kũtetheesya syana syoo syĩthĩwe asomi aseo.

⁵ Ũvoo Na. 2: Ũvoo ũũ ũkethĩawa wĩ wa ndatĩka itano na ũkanengawe eĩtu-a-asa. Kyongo kĩla kĩnenganĩtwe nĩkyo kyaĩle kũneenewa. Ũvoo ũsu waĩle kumwʼa kwosana na ũndũ twĩkaa ĩla tũũtavanyʼa kĩsionĩ kitũ. Mũsyaĩĩsya wa sukulu akanengae ũla wĩ na ũvoo mũtetheesya o ũmwe.

⁶ Ũvoo Na. 3: Ũvoo ũũ ũkeethĩawa wĩ wa ndatĩka itano na ũkanengawe ana-a-asa kana eĩtu-a-asa. Ĩla wanengwa mwĩĩtu-a-asa, waĩle kumwʼa o ũndũ ũmwe na Ũvoo Na. 2. Ĩla ũvoo umĩte nthĩnĩ wa kavuku Maũndũ ma Kũneenea Kuma Mbivilianĩ wanengwa mwana-a-asa, aĩle kũumya aũngeme mbee yukwaanĩ na asũanĩĩte ethukĩĩsya onthe. Aĩlĩte kũneenea kyongo kĩla ũnengetwe.

⁷ Nzĩa Nzaũ ya Kumya Ũvoo Na. 3 Ĩla Wanengwa Ana-a-asa: Mwana-a-asa anengwa ũvoo umĩte nthĩnĩ wa kavuku Ĩmanyĩsye Kĩla kĩ Ndetonĩ ya Ngai, aĩlĩte kũumya ta wonanyʼo wa ũndũ ũthaithi wa mũsyĩ wĩkawa kana wonanyʼo wa ũndũ tũtavanasya. Mũsyaĩĩsya wa sukulu nĩwe ũkanenganae mũtetheesya na kĩkalo. Mũtetheesya aĩlĩte kwĩthĩwa mũndũ wa mũsyĩ kana mwana-a-asa kĩkundinĩ. Ũla wĩ na ũvoo no atũmĩe maandĩko angĩ ala myolooto yamo yosanĩte na kyongo kya ũvoo wake. Mavinda kwa mavinda ũvoo ũũ no ũnengwe mũtumĩa wa kĩkundi. Atumĩa no meenyuvĩe mũtetheesya na kĩkalo kya ũvoo woo. Maĩlĩte kũnyuva mũndũ wa mũsyĩ kana mwana-a-asa kĩkundinĩ. Vate nzika, kĩkundi kĩkeekĩwa vinya mũno kyoona ũndũ atumĩa meũmanyĩsya nesa.

⁸ Ũtao: Ĩtina wa kĩla ũvoo, mũsyaĩĩsya wa sukulu aĩlĩte kũtũmĩa ndatĩka ilĩ kũkatha ũla waumya ũvoo na kũmũnenga ũtao ũtonya kũmũtethya aitũmĩa ĩvuku Faidika na Elimu ya Shule ya Huduma ya Kitheokrasi. Mũsyaĩĩsya wa sukulu ndaĩle kũweta ĩsomo yĩla mũmanyĩwʼa ũkũthũkũmĩa ĩla ũkũmũthokya aumye ũvoo. Ĩndĩ mũmanyĩwʼa amina kumya ũvoo, mũsyaĩĩsya wa sukulu amũkathe kuma ngoonĩ, awete ĩsomo yĩla ũkũthũkũmĩaa, na aielesya nĩkĩ mũmanyĩwʼa weeka nesa ĩsomonĩ yĩu. Ethĩwa mũmanyĩwʼa ndaneka nesa ĩsomonĩ yĩu, mũsyaĩĩsya wa sukulu aelesye kwa nzĩa nzeo nĩkĩ waĩlĩte kũĩsyokeleela.

⁹ Vomu ya ũtao yĩ ĩvukunĩ ya Shule ya Huduma yĩla yĩthĩawa na kĩla mũmanyĩwʼa, ĩthangũnĩ ya 79 nginya ĩthangũnĩ ya 81. Mũmanyĩwʼa amina kumya ũvoo wake, mũsyaĩĩsya wa sukulu aĩle kũmaka ĩvuku yake na aĩmũkũlya e weka kana nĩwĩkie ũndũ wĩĩtwe eke mũthyanĩ wa ĩsomo yĩla eenengetwe. Mũsyaĩĩsya wa sukulu no amũkathe mũmanyĩwʼa kana akamũtavya maũndũ matonya kũmũtetheesya ĩtina wa ũmbano kana ĩvinda yĩngĩ. Ĩla mũmanyĩwʼa wanengwa ũtao kana watavwʼa maũndũ waĩle kwĩka, aĩlĩte kwona maũndũ asu ta ma kũmũtetheesya eke maendeeo ma kĩ-veva.—1 Tim. 4:15.

¹⁰ Ĩla mũmanyĩwʼa wavĩtũkya ndatĩka syake sya kumya ũvoo, mũsyaĩĩsya wa sukulu kana mũtetheesya wa mũsyaĩĩsya wa sukulu aĩle kũmwonethya kwa nzĩa ya ũĩ kana saa syake nĩsyathela. No eke ũu kwa kũkũna kakengele kana akatũmĩa nzĩa ĩngĩ. Mũmanyĩwʼa oona ũu, aĩlĩte kũminĩĩa ũndũ ũnũkwasyaa na ayuma yukwaanĩ.—Sisya ĩvuku Shule ya Huduma, ĩth. 282, kal. 4.

¹¹ Onthe ala meanĩĩsye maũndũ ala mendekaa meĩkĩwa vinya meeyĩandĩkĩthye nthĩnĩ wa Sukulu ya Ũthũkũmi wa Kĩtheokulasi. (Sisya ĩvuku Shule ya Huduma, ĩth. 282, kal. 6.) Sukulu ĩno nĩtetheesye andũ ma Yeova matavanyʼe na kũmanyĩsya ũvoo mũseo wa Ũsumbĩ me na ũkũmbaũ, wendo, na ndaĩa. Tũi na nzika kana Yeova nĩwendeeawʼa nĩ kũtaĩwa nĩ onthe ala maendeee kũmanyĩwʼa nĩwe.—Sav. 148:12, 13; Isa. 50:4.