KĨLUNGU KYA KWĨMANYĨSYA 22
Tetheesya Amanyĩwʼa Maku Mavatiswe
“Ekai kĩla ũmwe wenyu avatiswe.”—MEKO 2:38.
WATHI 72 Kũtavanyʼa Ũwʼo wa Ũsumbĩ
KWA ŨKUVĨa
1. Yĩla ĩkomano ĩnene yoombanĩte ĩvindanĩ ya atũmwa yeeiwe yĩke ata?
VE ĨKOMANO ĩnene ya aũme na aka maumĩte nthĩ syĩ kĩvathũkanyʼo na maneenaa ithyomo syĩ kĩvathũkanyʼo moombanĩte. Ve ũndũ wa mwanya mũno weekĩkie mũthenya ũsu. Andũ asu nĩmeewie Ayuti amwe maineena na ithyomo syoo! O na kau kĩu nĩkyamasengʼisye, kĩla kyamasengʼisye mũnango nĩ kĩla Ayuti asu mamatavisye na kĩla mũtũmwa Vetelo wamatavisye. Andũ asu mataviwʼe kana no matangĩĩwe mamũĩkĩĩa Yesũ Klĩsto. Ũvoo ũsu wamakiitie mũno. O na kĩu kyatumie makũlya: “Twaĩle kwĩka ata?” Vetelo amasũngĩie ũũ: “Ekai kĩla ũmwe wenyu avatiswe.”—Meko 2:37, 38.
Mwana-a-asa ũkwĩmanyĩsya na mũndũ wa mũika Mbivilia, na athoketye mũka ethĩwe vo. Metũmĩa ĩvuku Tanĩa Thayũ Tene na Tene! (Sisya kalungu ka 2)
2. Twĩneenea kyaũ ĩsomonĩ yĩĩ? (Sisya visa ĩthangũnĩ ya mbee vyũ.)
2 Ũndũ ũla weekĩkie ĩtina wa ũu waĩ wa mwanya mũno. Mũthenya ũsu andũ ta 3,000 nĩmavatisiwe matwʼĩka amanyĩwʼa ma Klĩsto. Ũsu nĩwʼo waĩ mwambĩĩo wa wĩa mũnene wa kũtwʼĩkĩthya andũ amanyĩwʼa ũla Yesũ weeaĩe aatĩĩi make matethye. Na wĩa ũsu nowʼo tũtethasya nginya ũmũnthĩ. Ĩndĩ kĩvathũkanyʼo na ĩvinda yĩu, ũmũnthĩ tũyĩsa kũneena na mũndũ masaa mavũthũ na aitwʼĩka yu no avatiswe. Mũmanyĩwʼa no akue myei yĩana ũna kana mwaka, o na mbeange, ayĩsa kũtwʼĩka nĩwavikĩa kũvatiswa. Na ethĩwa ve mũndũ ũmanyĩasya Mbivilia, ndũlea kwĩthĩwa wĩsĩ kana wĩa wa kũtwʼĩkĩthya andũ amanyĩwʼa nĩwendaa kĩthito kingĩ. Ĩsomonĩ yĩĩ, twĩneenea kĩla ũtonya kwĩka nĩ kana ũtetheesye mũmanyĩwʼa avikĩe kũvatiswa.
TETHEESYA MŨMANYĨWʼA ATŨMĨE KĨLA ŨKWĨMANYĨSYA
3. O tondũ ĩandĩko ya Mathayo 28:19, 20 yonanĩtye, mũmanyĩwʼa aĩle kwĩka ata nĩ kana avikĩe kũvatiswa?
3 Mũmanyĩwʼa wa Mbivilia ndesa kũvatiswa atesĩte kũtũmĩa maũndũ ala Mbivilia ĩmanyĩasya. (Soma Mathayo 28:19, 20.) Yĩla mũmanyĩwʼa watũmĩa kĩla ũkwĩmanyĩsya, ethĩawa ailye ta ũla “mũndũ mũĩ” Yesũ wawetie ngelekanyʼonĩ yake, ũla wenzie nthĩ mũno nĩ kana ambĩĩsye mũsingi wa nyũmba yake ĩvianĩ. (Mt. 7:24, 25; Luka 6:47, 48) Tũtonya kũtetheesya mũmanyĩwʼa ata atũmĩe kĩla ũkwĩmanyĩsya? Ekai tũneenee maũndũ atatũ tũtonya kwĩka.
4. Tũtonya kũtetheesya mũmanyĩwʼa ata ekĩe kĩthito avikĩe kũvatiswa? (O na ĩngĩ, sisya ĩsandũkũ “Tetheesya Mũmanyĩwʼa Ethĩwe na Mĩvango na Aimĩanĩsya.”)
4 Tetheesya mũmanyĩwʼa waku ethĩwe na mĩvango. Nĩkĩ waĩle kwĩka ũu? Kwasũanĩa ngelekanyʼo ĩno: Twasye nĩwatwʼa kũthi kyalo kĩasa na ngalĩ, na wĩ kyalonĩ ũitwʼa kũũngamĩla kũndũ kũmwe kwanake ũthyũmũe. Weeka ũu, ndwĩsa kwĩwʼa vala ũendete ta vaasa mũno. O ta ũu, yĩla mũmanyĩwʼa weethĩwa na mĩvango mĩnini mĩnini na aimĩanĩsya, kĩu no kĩmũtetheesye kwona kana o na mũvango wa ũvatiso no aũvikĩe. Tũmĩa kasandũkũ ke na kyongo, “Ũndũ wa Kwĩka,” ĩvukunĩ Tanĩa Thayũ Tene na Tene! ũtetheesye mũmanyĩwʼa waku kwĩka mĩvango. Mũiminĩĩa kĩla ĩsomo, neeneai ũndũ mũvango ũsu ũkonanĩtye na kĩla weemanyĩsya. Ethĩwa ve mũvango ũngĩ ũkwenda mũmanyĩwʼa waku ethĩwe nawʼo, ũandĩke vala vaandĩkĩtwe “Maũndũ Angĩ.” Tũmĩa kĩlungu kĩu mavinda kwa mavinda ũneene na mũmanyĩwʼa waku ĩũlũ wa mĩvango ĩla ũtonya kwĩanĩsya kwa ĩvinda ĩkuvĩ na ĩla ũtonya kũkua ĩvinda yĩasa.
5. O tondũ vonanĩtwʼe ĩandĩkonĩ ya Maliko 10:17-22, Yesũ eeie mũndũ ũmwe mũthwii eke ata, na nĩkĩ?
5 Tetheesya mũmanyĩwʼa waku eke moalyũku. (Soma Maliko 10:17-22.) Yesũ nĩweesĩ kana ti laisi mũndũ mũthwii kũthoosya malĩ yake yonthe. (Mko. 10:23) Ĩndĩ o na vailye ũu, nĩwatavisye mũndũũme ũmwe mũthwii eke ũalyũku ũsu. Nĩkĩ? Nũndũ nĩwamwendie. Mavinda amwe no tũkĩe kwĩkĩa mũmanyĩwʼa vinya atũmĩe ũndũ mũna wĩmanyĩĩtye nũndũ twĩona ta ũtavikĩĩe kwĩka ũalyũku ũsu. Nĩvatonyeka mũndũ akakua ĩvinda aitwʼĩka nĩwatia mĩtuo ya tene na ayĩvwʼĩka mwĩkalĩle mweũ. (Ako. 3:9, 10) Ĩndĩ o ũndũ woosa ĩtambya na mĩtũkĩ ya kũneenea ũndũ ũsu, nowʼo mũmanyĩwʼa ũtonya kwambĩĩa kwĩka moalyũku na mĩtũkĩ. Kũneenea ũndũ ta ũsu kwonanasya nũũmũthĩnĩkĩa.—Sav. 141:5; Nth. 27:17.
6. Nĩkĩ twaĩle kũkũlya mũmanyĩwʼa makũlyo meũtuma eyĩelesya?
6 Nĩ ũndũ wa vata tũkũlye mũmanyĩwʼa makũlyo meũtuma eyĩelesya. Tũmĩa makũlyo ta asu nĩ kana ũmanye kĩla mũmanyĩwʼa waku waelewa na kĩla ũkũĩkĩĩa. Weeka ũu mavinda kwa mavinda, ndũkesa kũemwa nĩ kũneenea kaũndũ mũmanyĩwʼa ũkwona ke vinya kwĩka. Ĩvuku Tanĩa Thayũ Tene na Tene! yĩ na makũlyo maingĩ ta asu. Kwa ngelekanyʼo, ĩsomo ya 04 yĩ na ĩkũlyo yĩkũlĩtye: “We wĩona Yeova ta wĩwʼaa ata watũmĩa ĩsyĩtwa yake?” Nayo ĩsomo ya 09 yĩ na ĩkũlyo yĩkũlĩtye: “Nĩ maũndũ meva ũtonya kwenda kũvoya?” Mbeenĩ, mũmanyĩwʼa no akue ĩvinda aisũanĩa ũndũ ũkũsũngĩa makũlyo ta asu. No ũmũtetheesye kwa kũmũmanyĩsya kũsũanĩa maandĩko ala manenganĩtwe na visa ila syĩ vo.
7. Tũtonya kũtũmĩa ata ngewa sya angĩ nesa?
7 Mũmanyĩwʼa waku amanya kĩla waĩle kwĩka, tũmĩa ngewa sya andũ angĩ kũmwĩkĩa vinya akĩke. Kwa ngelekanyʼo, ethĩwa mũmanyĩwʼa waku nũemawa nĩ kũka maũmbanonĩ ateũtĩĩa, no ũmwonyʼe vitio yĩ na kyongo, Yeova Nĩwanzũvĩie, yĩ ĩsomonĩ ya 14, ungu wa kyongo, “Maũndũ Angĩ ma Kwĩmanyĩsya.” Masomonĩ maingĩ nthĩnĩ wa ĩvuku Tanĩa Thayũ Tene na Tene! ve na ngewa ta isu syĩ ungu wa kyongo, “Ĩmanyĩsye Mũnango,” kana “Maũndũ Angĩ ma Kwĩmanyĩsya.”b Ĩndĩ ĩsũvĩe ndũkambĩĩe kũelekanyʼa mũmanyĩwʼa waku na mũndũ ũngĩ kwa kũmũtavya, “Ethĩwa ũũ no eke ũu, o naku no wĩke ũu.” Eka mũmanyĩwʼa ewetee kĩu newe. Ĩndĩ no ũneenee maũndũ mana matetheeisye mũndũ ũla ũwetetwe vitionĩ ĩsu nĩ kana ũmũtetheesye kũtũmĩa momanyĩsyo ma Mbivilia. Kwa ngelekanyʼo, no ũwete ĩandĩko ya vata kana ũndũ mũndũ ũsu weekie. Ĩndĩ vatonyeka, kindĩlĩĩla ũndũ Yeova watetheeisye mũndũ ũsu.
8. Tũtonya kũtetheesya ata mũmanyĩwʼa amwende Yeova?
8 Tetheesya mũmanyĩwʼa waku amwende Yeova. Ata? Mantha myanya ũmũtetheesye amanye nguma sya Yeova. Tetheesya mũmanyĩwʼa amanye kana Yeova nĩ Ngai mũtanu, na nũtetheeasya ala mamwendete. (1 Tim. 1:11; Aevl. 11:6) O na no ũmũtetheesye amanye kana akatetheka mũno aatĩĩa kĩla mũkwĩmanyĩsya, na moathimo ala ũkakwata meonanyʼa kana Yeova nũmwendete. (Isa. 48:17, 18) O ũndũ mũmanyĩwʼa wamwenda Yeova mũnango, nowʼo wendi wake wa kwĩka moalyũku ũkongelekaa.—1 Yoa. 5:3.
MANYĨTHANYʼA MŨMANYĨWʼA NA ATHAITHI ALA ANGĨ
9. Kwosana na Maliko 10:29, 30, nĩ kyaũ kĩtonya kũtetheesya mũndũ eyĩime maũndũ amwe nĩ kana avatiswe?
9 Nĩ kana mũmanyĩwʼa avikĩe kũvatiswa, no nginya eyĩime maũndũ amwe. O ta ũla mũndũ mũthwii twaweta, amanyĩwʼa amwe methĩawa maĩle kwĩyĩima syĩndũ imwe sya kĩ-mwĩĩ. Kwa ngelekanyʼo, ethĩwa wĩa ũla mathũkũmaa ndwosanĩte na myolooto ya Mbivilia, nĩmatonya kwĩthĩwa maĩle kũũtia na maimantha wĩa ũngĩ. Na aingĩ nĩmatonya kwĩthĩwa maĩle kũtila kĩtindo kya andũ matamwendete Yeova. Namo angĩ nĩmatonya kũlewa nĩ andũ moo ma mũsyĩ ala matendete Ngũsĩ sya Yeova. Yesũ aisye kana nũtonya kwĩthĩwa wĩ ũndũ wĩ vinya kwa andũ amwe kwĩyĩima maũndũ ta asu. Ĩndĩ athie ala mamũatĩĩaa kana maikasonokwʼa nongi. Vandũ va ũu, Yeova akamaathima na mũsyĩ wa kĩ-veva wa andũ mamendete. (Soma Maliko 10:29, 30.) Ũtonya kũtetheesya mũmanyĩwʼa waku ata atetheke nĩ mũthĩnzĩo ũsu ũseũvĩte ũu?
10. Ndeto sya Manuel siũmanyĩsya kyaũ?
10 Tuma ndũũ na mũmanyĩwʼa waku. Nĩ ũndũ wa vata wonyʼe mũmanyĩwʼa waku kana nũmũthĩnĩkĩaa. Nĩkĩ? Kwoona ndeto sya Manuel, ũla wĩkalaa Mexico. Aililikana ĩvinda yĩla weemanyĩasya Mbivilia, aĩtye atĩĩ: “Kĩla ĩvinda tũtanamba kwĩmanyĩsya, mwalimũ wakwa nĩwangũlasya ũndũ nĩendeee. Kĩu nĩkyatumaa nĩusya na ndyĩwʼa nĩ mũthalĩku kũmũelesya maũndũ angĩ. Nĩneeyoneaa kana kwa wʼo nũnthĩnĩkĩaa.”
11. Amanyĩwʼa maitũ matonya kũtetheka ata twatindanyʼa namo?
11 Tindanasya na amanyĩwʼa maku o tondũ Yesũ watindanasya na aatĩĩi make. (Yoa. 3:22) Ethĩwa wĩ na mũmanyĩwʼa wĩkĩte maendeeo, na nũkwona vatonyeka, mũthokye mũsyĩ kwaku mũnywʼe kaindo, mũye lĩu mwĩ vamwe, kana o mwĩloele vitio ĩmwe ya broadcasting. Mũmanyĩwʼa waku no atane mũno wamũthokya, na mũno mũno, ĩvinda ya masikũkũ nũndũ nũtonya kwĩthĩwa ayĩwʼa e weka. Kazibwe ekalaa Uganda, na aĩtye: “No nasye maũndũ ala neemanyĩisye ĩũlũ wa Yeova nditindanyʼa na mwalimũ wakwa meanene o na ala namanyie tũyĩmanyĩsya Mbivilia. Nĩnoonaa ũndũ Yeova ũthĩnĩkĩaa andũ make mũno wĩana, na ũndũ mo mekalaa me atanu. Na kĩu nokyo nendaa.”
Wathokya atavanyʼa me kĩvathũkanyʼo ũyĩmanyĩsya na mũmanyĩwʼa waku, kĩu no kĩmũtetheesye onae wĩ ũndũ wĩ laisi kũkaa maũmbano (Sisya kalungu ka 12)c
12. Nĩkĩ twaĩle kũthokasya atavanyʼa me kĩvathũkanyʼo yĩla tũũmanyĩsya mũmanyĩwʼa?
12 Thokya atavanyʼa me kĩvathũkanyʼo yĩla ũũmanyĩsya mũmanyĩwʼa waku. Mavinda amwe nĩtũtonya kwĩwʼa wĩ ũndũ wĩ laisi kũmanyĩasya mũmanyĩwʼa twĩ ithyoka, kana kũthokasya mũtavanyʼa o ũla ũla kĩla ĩvinda. O na kau kwĩka ũu no kwĩthĩwe kwĩ laisi, mũmanyĩwʼa witũ nũtonya kũtetheka mũnango ethĩwa mavinda kwa mavinda tũkathokasya atavanyʼa me kĩvathũkanyʼo. Dmitrii ekalaa Moldova, na aĩtye: “Kĩla mũtavanyʼa wathokawʼa ndyĩmanyĩsya aeleasya maũndũ kwa nzĩa yĩ kĩvathũkanyʼo na ũla ũngĩ. Kĩu kyandetheeasya kwona nzĩa syĩ kĩvathũkanyʼo sya kũtũmĩa kĩla ngwĩmanyĩsya. Na eka ũu, kĩu kyatumie ndethĩwa na nthoni mbingĩ yĩla naendie maũmbano ya mbee, nũndũ nĩneesene na ana-a-asa na eĩtu-a-asa aingĩ.”
13. Nĩkĩ waĩle kũtetheesya mũmanyĩwʼa waku okae maũmbanonĩ?
13 Tetheesya mũmanyĩwʼa waku okae maũmbanonĩ. Nĩkĩ? Kĩtumi nũndũ Yeova eaĩe athaithi make mombanae vamwe; kĩu nĩ kĩlungu kya ũthaithi. (Aevl. 10:24, 25) Na kwongela ũu, ana-a-asa na eĩtu-a-asa methĩawa ta andũ maitũ ma mũsyĩ. Yĩla twĩ namo maũmbanonĩ, no ta twĩthĩawa twĩ mũsyĩ tũyĩĩsanĩa lĩu wĩ mũyo mũno. Kwoou yĩla watetheesya mũmanyĩwʼa waku ambĩĩe kũkaa maũmbanonĩ, wĩthĩawa wamũtetheesya kwosa ĩtambya ya vata mũno avikĩe kũvatiswa. Ĩndĩ no aemwe nĩ kwosa ĩtambya yĩu. Yo ĩvuku Tanĩa Thayũ Tene na Tene! yĩtonya kũtetheesya mũmanyĩwʼa waku ata akĩlye vinya mawetu ala ũtonya kũkomana namo?
14. Tũtonya kũthangaasya ata mũmanyĩwʼa witũ okae maũmbanonĩ?
14 Tũmĩa ĩsomo ya 10 ya ĩvuku Tanĩa Thayũ Tene na Tene! ũthangaasye mũmanyĩwʼa waku. Atavanyʼa me na ũmanyi ala makũlilwʼe matatĩthye ĩsomo yĩĩ ĩvuku yĩu yĩtanamba kumwʼa, nĩmavotie kũtetheesya amanyĩwʼa moo mambĩĩa kũkaa maũmbanonĩ. Ĩndĩ ndũkone ta waĩle kweteela nginya mũvike ĩsomo ya 10 nĩ kana ũthokye mũmanyĩwʼa waku maũmbanonĩ maitũ. Mũthokye mwambĩĩa kwĩmanyĩsya oou, na ũiendeea kwĩkaa oou mavinda kwa mavinda. Ĩndĩ lilikana kana amanyĩwʼa makomanaa na mawetu me kĩvathũkanyʼo. Kwoou ĩthĩwa metho wone mavata ma mũmanyĩwʼa waku na ũisisya nĩ kyaũ ũtonya kwĩka ũmũtetheesye. Ndũkakwʼe ngoo ethĩwa mũmanyĩwʼa nũkũkua ĩvinda aitwʼĩka nĩwambĩĩa kũkaa maũmbanonĩ. Ĩthĩwa na wũmĩĩsyo na ndũkanoe nĩ kũmũthokya.
TETHEESYA MŨMANYĨWʼA AEKE KWĨTHĨWA NA WIA
15. Nĩ maũndũ meva amanyĩwʼa maitũ matonya kwĩthĩwa maikĩa?
15 We nũũlilikana ũikĩa kũtwʼĩka ũmwe wa Ngũsĩ sya Yeova? Nũtonya kwĩthĩwa weewʼaa ta ũtakesa kũtavanyʼa ũtheinĩ. Kana nũtonya kwĩthĩwa wakĩaa ũyona andũ maku ma mũsyĩ kana anyanyau nĩmeũkũvĩnga. Ethĩwa nĩwakĩaa, no ũelewe ũndũ mũmanyĩwʼa waku wĩwʼaa. Yesũ aisye kana andũ amwe no methĩwe na wia ta ũsu. Ĩndĩ o na vailye ũu, eekĩie aatĩĩi make vinya maiketĩkĩlye wia ũmasiĩĩe kũmũthũkũma Yeova. (Mt. 10:16, 17, 27, 28) Ĩndĩ we atetheeisye aatĩĩi make ata makilye vinya wia ũla maĩ nawʼo? Na ũtonya kũatĩĩa ngelekanyʼo yake ata?
16. Tũtonya kũtetheesya mũmanyĩwʼa ata amanye ũndũ ũtonya kũelesya angĩ maũndũ ala ũĩkĩĩaa?
16 Manyĩsya mũmanyĩwʼa waku o kavola kwa kavola ũndũ ũtonya kũtavya andũ angĩ maũndũ ala ũĩkĩĩaa. Amanyĩwʼa ma Yesũ nĩmatonya kwĩthĩwa malikilwe nĩ wia ĩvinda yĩla wamatũmie makatavanyʼe. Ĩndĩ Yesũ nĩwamatetheeisye kwa kũmatavya naaũ maĩle kũtavya ũvoo, na ũvoo ũla maĩle kũtavanyʼa. (Mt. 10:5-7) Ũtonya kũatĩĩa ngelekanyʼo ya Yesũ ata? Tetheesya mũmanyĩwʼa waku amanye naaũ ũtonya kũtavya ũvoo. Kwa ngelekanyʼo, mũkũlye kana nĩwĩsĩ mũndũ ũtonya kũtetheka nĩ ũwʼo mũna wĩ Mbivilianĩ. Ĩtina wa ũu, mũtetheesye ombanyʼe kĩla ũtonya kũweta kwa kũmwonyʼa nzĩa yĩ laisi ya kũelesya ũwʼo ũsu. Woona vaĩle, no ũmũtetheesye kwĩyũmbanyʼa ũtũmĩĩte tũsandũkũ twĩ na kyongo, “Andũ Amwe Maasya,” na “Andũ Amwe no Maũkũlye,” tũla twĩ nthĩnĩ wa ĩvuku Tanĩa Thayũ Tene na Tene! Ũyĩka ũu, kĩla waĩle kwĩthĩwa ũsũanĩĩte mũno nĩ kũmanyĩsya mũmanyĩwʼa ũndũ ũtonya kũtũmĩaa Mbivilia kũsũngĩa makũlyo kwa nzĩa yĩ laisi na kwa ũĩ.
17. Tũtonya kũtũmĩa ata ĩandĩko ya Mathayo 10:19, 20, 29-31 kũtetheesya amanyĩwʼa maitũ mamwĩkwatasye Yeova?
17 Tetheesya mũmanyĩwʼa waku amwĩkwatasye Yeova. Yesũ aĩkĩĩthisye aatĩĩi make kana Yeova akamatetheesya nũndũ nũmendete. (Soma Mathayo 10:19, 20, 29-31.) Lilikanyʼa mũmanyĩwʼa waku kana o nake akatetheeawʼa nĩ Yeova. No ũmũtetheesye amwĩkwatasye Yeova kwa kũvoya vamwe nake ĩũlũ wa mĩvango ĩla wĩ nayo. Franciszek, ũla wĩkalaa Poland, aĩtye: “Mavinda maingĩ mwalimũ wakwa nĩwawetaa mĩvango ĩla naĩ nayo mboyanĩ syake. Yĩla noonie ũndũ Yeova ũsũngĩaa mboya sya mwalimũ wakwa, nĩnoosie ĩtambya na mĩtũkĩ ya kwambĩĩa kũvoya. Na kwoou nĩnoonie Yeova aindetheesya yĩla nenda kũnewa mwanya wa mĩthenya kauta wĩanĩ nĩthi maũmbanonĩ ma kĩkundi kana ũmbanonĩ mũnene, o na kau no ĩndĩ naĩ nĩnaandĩkiwe.”
18. Yeova ewʼaa ata oona kĩthito kĩla alimũ mekĩaa?
18 Yeova nũthĩnĩkĩaa amanyĩwʼa maitũ ma Mbivilia mũno. Nĩwonaa kĩthito kingĩ kĩla alimũ mekĩaa nĩ kana matetheesye amanyĩwʼa mamũthengeee, na kĩu kĩtumaa amenda mũno. (Isa. 52:7) Ethĩwa oyu ndwĩ na mũndũ ũũmanyĩsya Mbivilia, no ũtetheesye amanyĩwʼa makavatiswa kwa kũendanasya na atavanyʼa ala angĩ yĩla meũthi kũmanyĩsya mũndũ Mbivilia.
WATHI 60 Ũvoo Ũla Ũkatuma Andũ Matangĩĩwa
a Ĩsomonĩ yĩĩ twĩneenea ũndũ Yesũ watetheeisye andũ matwʼĩka amanyĩwʼa make, na ũndũ ithyĩ tũtonya kũatĩĩa ngelekanyʼo yake. O na nĩtũũneenea ũndũ tũtonya kũtũmĩa yĩla ĩvuku yeũ yĩtawa Tanĩa Thayũ Tene na Tene! Ĩvuku yĩu yĩseũvĩtwʼe yĩtetheesye amanyĩwʼa ma Mbivilia mavikĩe kũvatiswa.
b O na ĩngĩ, nĩ kana ũkwate ngewa ta isu, sisya (1) Ĩvukunĩ ya Kwĩka Ũkunĩkĩli ya Ngũsĩ sya Yeova ungu wa kyongo, “Mbivilia,” na ũithi vala ve kyongo kĩnini, “Ũndũ Ĩtũtethasya,” na ũisisya vala vaandĩkĩtwe, “‘Mbivilia Nĩalyũlaa Andũ’ (Ilungu syĩ ĩkasetinĩ ya Mũsyaĩĩsya),” kana (2) nthĩnĩ wa JW Library®, ungu wa Vitio na Syĩndũ sya Kwĩthukĩĩsya, na ũitina vala vaandĩkĩtwe “Ũneenanyʼa na Maũndũ Meekĩkie.”
c MAELESYO MA VISA: Mwana-a-asa ũkwĩmanyĩsya na mũndũ wa mũika Mbivilia, na athoketye mũka ethĩwe vo. Mavinda ala angĩ, nũthoketye ana-a-asa me kĩvathũkanyʼo methĩwe vo.