Umya “Maũndũ Maseo” kwa Kwĩthĩwa wĩ Mũlau (Matt. 12:35a)

Vate nzika, ithyonthe nĩtwendeeawʼa nĩ kwĩka angĩ “maũndũ maseo” kwĩsĩla ‘kũthokya aeni na ũlau.’ (Alo. 12:13) Atumĩa ma kĩkundi nĩmekaa ũu kwa kũvanga ala mathoketwʼe kĩkundinĩ kyoo kumya ũvoo matũngĩwe tikiti na maimanthĩwa kyaũya. O na ũu wĩ o vo, mũndũ nũtonya kũkĩa kũthokya aeni kwake nũndũ wa kwĩthĩwa eona ate na ũkwati mwingĩ, kana nũndũ wa kwĩwʼa wia kũmathokya. Nĩtũtonya kũeka kwĩwʼa ũu twasũanĩa ũtao ũla Yesũ wanengie Matha. (Luka 10:39-42) Athingĩlĩĩile kana ‘kĩlungu kĩla kĩseo’ ĩla twathokya aeni nĩ kwĩthĩwa vamwe na kwĩkĩana vinya, ĩndĩ ti kwĩthĩwa na lĩu wa mbesa mbingĩ kana nyũmba nene yĩ na syĩndũ mbingĩ. Twaatĩĩa ũtao ũũ, ithyonthe nĩtũtonya kũtanĩa “maũndũ maseo” vamwe na ana-a-asa maitũ o tondũ Ndeto ya Ngai yaĩtye.—3 Yoa. 5-8.