We Nũkwĩthĩwa wĩ Mũthangaau ta Yeova na Yesũ Ĩvindanĩ Yĩĩ ya Kũlilikana Kĩkwʼũ kya Yesũ?

1. Ngũsĩ sya Yeova syĩkĩaa kĩthito kya kwĩka ata ĩvindanĩ ya kũlilikana kĩkwʼũ kya Yesũ?

¹ Yeova ethĩawa e mũthangaau aianĩsya kĩeleelo kyake. Yĩiweta ĩũlũ wa moathimo amwe ma Ũsumbĩ wa Ngai, ĩandĩko ya Isaia 9:7 yaĩtye: “Kĩwĩu [kana, kĩthito] kya Yeova wa nguthu kĩkeanĩsya ũndũ ũũ.” O ta Ĩthe wake, Yesũ aĩ na kĩthito ũthaithinĩ wa wʼo ĩla waĩ ĩũlũ wa nthĩ (Yoa. 2:13-17; 4:34) Kĩla mwaka ĩvindanĩ ya kũlilikana kĩkwʼũ kya Yesũ, atavanyʼa milioni mbingĩ ĩũlũ wa nthĩ nĩmatataa kwĩthĩwa athangaau ta Yeova na Yesũ kwa kwongela ũthũkũmi woo ũtavanyʼanĩ. We ũkongela ũthũkũmi waku tamo?

2. Tweethĩwa twĩ athangaau tũkeanĩsya kyaũ kwambĩĩa Matukũ 7, Mwei wa 3?

² Kambeini ya Kũthokya Andũ Kũlilikana Kĩkwʼũ kya Yesũ: Mwaka ũũ, kambeini ĩsu ĩkambĩĩa Wathanthatũ, Matukũ 7, Mwei wa 3. Ĩvange yu nĩ kana wĩtavanyʼa na kĩthito. Andũ aingĩ kĩkundinĩ makeethĩwa na ũthangaau nĩ kana matavanyʼe isio mbingĩ ũndũ vatonyeka. Tata ũndũ vatonyeka ũthokye andũ ala wĩmanyĩasya Mbivilia namo, masyokeo maku, ala ũthũkũmaa namo, andũ ma mũsyĩ, na andũ ala ũsomaa namo, ũitũmĩa kathangũ ka kũthokanyʼa kana Kĩsese kya jw.org/kam.

3. Tũtonya kwongela ũthũkũmi witũ ata Mweinĩ wa 3 na wa 4?

³ Ũvainia Mũtetheesya: Ĩngĩ, kĩthito kĩkatuma twongela ũthũkũmi witũ. Vate nzika atavanyʼa aingĩ makeethĩwa matonya kusũsya ũvainia mũtetheesya Mweinĩ wa 3 na wa 4 nũndũ vakeethĩwa na mwanya wa kũtavanyʼa masaa 30. Ĩla mwĩ na ũthaithi wa mũsyĩ kana ĩla ũkwĩmanyĩsya wĩ weka, sũanĩa mũno na ũivoya ĩũlũ wa ũndũ ũsu. (Nth. 15:22) Angĩ moona wĩ na kĩthito, o namo no mende kwĩka taku. Wavanga maũndũ maku nesa nĩ kenda wongele ũthũkũmi waku, ũkeethĩwa wĩ mũthangaau ta Yesũ.—Mko. 6:31-34.

4. Tũkwataa moathimo maũ tweethĩwa twĩ athangaau ta Yeova na Yesũ?

⁴ Yeova na Yesũ matwĩkĩĩe ngelekanyʼo nzeo mũno ya kwĩthĩwa athangaau. Kwoou, twaatĩĩa ngelekanyʼo ĩsu yoo ĩvindanĩ yĩĩ ya kũlilikana kĩkwʼũ kya Yesũ, tũkakwata moathimo maingĩ. Ũu ũkatuma andũ aingĩ kĩsionĩ mavikĩwa nĩ ũvoo mũseo. Ĩngĩ, tũkeethĩwa twĩ atanu na tũyĩwʼa twĩ eanĩe nũndũ wa kũmũthũkũma Yeova na andũ ala angĩ. (Meko 20:35) Na ũndũ ũla wa vata vyũ, tũkamũtanĩthya Ngai witũ mũthangaau na Mwana wake.