Ũndũ Tũtonya Kũtavanyʼa Tũtũmĩĩte Kakalĩ Kana Mesa ya Kwilĩĩla Mavuku

Andũ aingĩ ala me ngoo nzeo nĩmatethekete kumana na nzĩa ya kũtavanyʼa tũtũmĩĩte kakalĩ kana mesa ya kwilĩĩla mavuku. (Yoa. 6:44) Kwoou, atumĩa methĩĩtwe mayĩkĩwa vinya methĩwe na mũvango wa kũtavanyʼa kũla kwĩthĩawa na andũ aingĩ kĩsionĩ kyoo. Nũndũ kakalĩ ka kwilĩĩla mavuku kayĩũngamawʼa vandũ vamwe, mavinda maingĩ vayĩthĩawa vata wa kwĩtya lũũsa kuma silikalĩnĩ. Naaũ maĩle kũtavanyʼa kũla kwĩthĩawa andũ aingĩ? Nĩ atavanyʼa ala methĩawa na woni mũseo kwelekela andũ, ala me ndaĩa, na mesĩ kũneena na andũ nesa. Vaa ĩtheo ve maũndũ atavanyʼa maĩle kwĩka, na angĩ mataĩle kwĩka nĩ kana ũtavanyʼa woo waĩle.

Maũndũ Ala Mũtavanyʼa Waĩle Kwĩka:

Ĩthĩwa na ũnyanya, wĩ mũtanu, na ũitetheesya ala mavĩtĩte mamanye ũndũ ũkwĩka. Atavanyʼa angĩ masiasya mũndũ me atanu, na maimũkethya nesa. Ĩla mũndũ wasisya mavuku avĩtĩlĩte vakuvĩ, no ũmwĩe, “No wose ĩvuku ethĩwa nũkwenda.”
Ũngama vala ũkwona vaĩle kuma vala vailĩĩlwe mavuku. Ve isio imwe atavanyʼa methĩĩtwe na mosyao maseo ĩla maũngama vakuvĩ na vala mailĩĩle mavuku. Namo angĩ nĩmonete kana kũũngama vakuvĩ na vala mailĩĩle mavuku nĩkũtumaa andũ mewʼa vinya kũũngama, kwoou maũngamaa vaasanga nginya mese kwona mũndũ aũngeme vala mavuku mailĩĩlwe. Ĩla mũndũ wathengeea vala mavuku mailĩĩlwe, tata kũneena nake. No ũmũkũlye, “Waaĩkũlya ĩkũlyo yĩu?”
Tũmĩa Mbivilia mavinda maingĩ ũndũ vatonyeka.
Ĩla mũndũ woosa yĩmwe katĩ wa mavuku ala ma kwĩmanyĩsya ta Mbivilia Ĩmanyĩasya, mũelesye mũvango ũla twĩthĩawa nawʼo wa kwĩmanyĩsya Mbivilia. Mwonyʼe vitio Nĩkĩ Waĩle Kwĩmanyĩsya Mbivilia?
Ĩla waneena na mũndũ ũkwendeewʼa, no ũmwĩtye namba ya simũ kana ĩsandũkũ ya valũa. Ethĩwa ndekalaa kĩsionĩ kyenyu, usũsya vomu ya Tafadhali Fuatia Upendezi (S-43) na ũinenga mũandĩki mĩtũkĩ ũndũ vatonyeka.