Ũndũ Tũtonya Kwĩthĩwa Atavanyʼa Aseo—Kwambĩĩsya Ũneenanyʼa Ũtonya Kumĩlya Mwanya wa Kũtavanyʼa

Yesũ ambĩĩisye ũneenanyʼa ũtonya kũtuma atavanyʼa e maũndũnĩ make, na kwĩka ũu nĩkwatumie atavya mũndũ mũka Mũsamalia ũvoo mũseo. Tũtonya kwĩka take ata?

• Ĩthĩwa na ũnyanya na andũ na ũineenaa namo. O na kau Yesũ aĩ mũnou, ambĩĩisye ũneenanyʼa wake kwa kwĩtya kĩwʼũ. Kwoou o naku no wambĩĩsye ũneenanyʼa waku kwa kũkethya mũndũ wĩ mũtanu, na ĩndĩ ũyambĩĩa kũneenea maũndũ ta ũndũ nzeve ĩilyĩ, na maũndũ angĩ mekĩkie o mĩtũkĩ. Lilikana kana kĩeleelo kyaku nĩ kwambĩĩa kũneena na mũndũ kwa nzĩa ũtonya kũkwata mwanya wa kũmũtavya ũvoo, kwoou neenea ũndũ ũla ũtonya kwendeesya mũndũ ũla ũũneena nake. Ethĩwa ndanendeewʼa, ndũkakwʼe ngoo. Neena na mũndũ ũngĩ. Mũvoye Yeova aũnenge ũkũmbaũ.—Nee 2:4; Meko 4:29.

• Ĩthĩwa wĩ metho nĩ kana ũmanye yĩla mwanya wa kũtavanyʼa waumĩla. Ĩndĩ ndũkaneene na mũndũ ta wĩkalaatĩte. Eka ngewa yĩtwae noyo. Ndũkalasimĩthye maũndũ nũndũ kwĩka ũu no kũtume ũla ũũneena nake ethĩwa ate mwĩanĩe na aieka kũneena naku. Ndũkakwʼe ngoo ethĩwa ũneenanyʼa wenyu wathela ũtanamba kũmumĩsya ũkũsĩ. Ethĩwa nĩwĩwʼaa wia kũtavanyʼa yĩla wĩ maũndũnĩ maku, ĩmanyĩsye ũndũ ũtonya kwambĩĩa ũneenanyʼa na andũ ũte na kĩeleelo kya kũtavanyʼa. [Thaũka na mũineenea vitio ya 1.]

• Mantha mwanya wa kũtavya mũndũ ũvoo kwa kũweta ũndũ ũmwe mũseo ũkonetye mũĩkĩĩo waku, na ũtonya kũtuma ũla ũũneena nake enda ũmũeleangye mũnango. Yesũ awetie maũndũ ma kwendeesya mũno ala matumie mũndũ mũka Mũsamalia akũlya makũlyo. Yĩla Yesũ wasũngĩaa mũndũ mũka ũsu makũlyo make, nĩwʼo waendeee kũmũtavya ũvoo mũseo. [Thaũka vitio ya 2 na mũimĩneenea, na ĩndĩ mũthya, vitio ya 3 na mũimĩneenea.]