Ũndũ Tũtonya Kwĩthĩwa Atavanyʼa Aseo—Kũnengane Ĩvuku Mbivilia Ĩmanyĩasya

Nĩkĩ Nĩ Ũndũ wa Vata: Ĩvuku Mbivilia Ĩmanyĩasya nĩyo ĩvuku yĩla tũtũmĩaa mũno katĩ wa mavuku ala tũtũmĩaa kũmanyĩsya. Ĩndĩ o na ũu wĩ o vo, no nginya twambe kũnenga mũndũ ĩvuku yĩu tũtanambĩĩa kwĩmanyĩsya nake. Kwoou ithyonthe nĩtwaĩle kwĩkĩa kĩthito nĩ kana tũmanye kũnengane ĩvuku yĩĩ nesa ĩla tũũtavanyʼa. (Nth. 22:29) Ve nzĩa mbingĩ tũtonya kũtũmĩa, ĩndĩ atavanyʼa maĩle kũtũmĩa nzĩa ĩla monaa yĩ na mosyao maseo.

Ũtonya Kwĩka Ũu Ata?:

Kũlya mwene nyũmba ĩkũlyo yĩsũngĩĩtwe kĩlungunĩ kĩna kya ĩvuku yĩĩ na yĩtonya kũtuma endeewʼa nĩ kũmanya ũsũngĩo. O na no ũnyuve ĩkũlyo yĩmwe katĩ wa ala me mwambĩĩonĩ wa kĩlungu kĩna. Mwene nyũmba asũngĩa, soma ĩandĩko yosanĩte na ĩkũlyo yĩla wĩĩmũkũlĩtye, na ũimwonyʼa kalungu kala kaeleetye ĩkũlyo yĩu mũnango, na vatonyeka mũikasoma.
Nzĩa ĩngĩ nĩ kũtũmĩa makũlyo ala me mathangũnĩ ma mwambĩĩo nĩ kana ũmũtetheesye endeewʼe, na ũimwonyʼa nĩ va ĩvukunĩ yĩĩ makũlyo asu masũngĩĩtwe kwosana na Mbivilia. Kwa ngelekanyʼo, no ũwete ũndũ mũthũku ũneekĩkie na ũimũelesya kana andũ aingĩ nĩmasaanĩawʼa nĩ vala matonya kũkwata mosũngĩo ma makũlyo ala me ĩthangũnĩ ya 3 ya ĩvuku yĩĩ. O na no ũmũtavye kana wĩthokeaa atũi maku ũmonyʼe kana ve wĩkwatyo wa ĩvinda yũkĩte. Na ĩndĩ ũimwonyʼa visa ila syĩ ĩthangũnĩ ya 4-5 na ũimũkũlya, “Nĩ watho wĩva katĩ wa mawatho aa wenda kwona ũyĩanĩa?” O na ĩngĩ, no ũmwĩe wĩthokeaa andũ o kwa ũkuvĩ ũmatetheesye kũkwata mosũngĩo ma makũlyo ma vata ala andũ aingĩ mekũlasya. Na ĩndĩ ũimwonyʼa makũlyo ala me ĩthangũnĩ ya 6 na ũimũkũlya nĩ yĩva yĩũmwendeesya mũno.
Tũmĩa nzĩa ya ĩmwe kwa ĩmwe ya kwambĩĩa kwĩmanyĩsya Mbivilia na mũndũ. No wasye, “Twĩonasya atũi maitũ ĩvuku yĩĩ yĩtonya kũmatetheesya kwĩmanyĩsya Mbivilia. Waayona? [Eteela asũngĩe.] Ethĩwa wĩ na mwanya, no nende ũkwonyʼa ũndũ ũtonya kwĩmanyĩsya Mbivilia ũtũmĩĩte ĩvuku yĩĩ na Mbivilia yaku.”

Tata Kwĩka Ũndũ Ũũ Mweinĩ Ũũ:

Ĩmanyĩsyei ũndũ mũtonya kũtũmĩa ĩvuku yĩĩ ũthaithinĩ wenyu wa mũsyĩ.
Ĩla wĩ ũtavanyʼanĩ, neenea na atavanyʼa ala angĩ ũndũ ũvangĩte kũnengane ĩvuku yĩu. (Nth. 27:17) Nzĩa ĩsu yeethĩwa ĩte na mosyao maseo, tũmĩa ĩngĩ.