Kũmanyĩsya Andũ Tũtũmĩĩte Mbulosua Ũvoo Mũseo
1. Ũvoo ũla wĩ mbulosuanĩ Ũvoo Mũseo ũvangĩtwe ata?
1 O tondũ Ũthũkũmi Witũ wa Ũsumbĩ wa Mwei wa 7 waeleisye, ĩvuku yĩmwe ya vata mũno yĩla tũtũmĩaa kũmanyĩsya andũ nĩ mbulosua Ũvoo Mũseo Kuma kwa Ngai! Maandĩko ti maumĩĩsye, na kwoou mwene nyũmba no atanĩe kũmasoma kuma Mbivilianĩ. Mavuku maingĩ maitũ ala makwĩmanyĩsya na andũ methĩawa maandĩkĩtwe ũkethĩa mũndũ no emanyĩsye e weka, ĩndĩ mbulosua ĩno ĩandĩkĩtwe ũkethĩa mũndũ ndemanyĩsya e weka, ĩndĩ aĩle kwĩthĩwa na mũndũ wa kũmũmanyĩsya. Kwoou, ĩla twanenga mũndũ mbulosua ĩsu nĩtwaĩle kũmwonyʼa ũndũ ũtonya kwĩmanyĩsya na ayona ũseo wa kwĩmanyĩsya ũvoo mũseo kuma Mbivilianĩ.—Mt. 13:44.
2. Tũtonya kũtũmĩa ata mbulosua Ũvoo Mũseo ĩla twathokea mũndũ ya mbee?
2 Kũmĩtũmĩa Ĩla Twathokea Mũndũ ya Mbee: No wasye: “Andũ aingĩ ũmũnthĩ nĩmasengʼaa ũndũ ĩvinda yũkĩte yĩkethĩwa yĩilyĩ. We nĩwonaa maũndũ ta makavĩndũka? [Eteela asũngĩe.] Mbivilianĩ ve ũvoo mũseo ũla ũtũnengae wĩkwatyo. Vaa ve makũlyo amwe Mbivilia ĩsũngĩĩte.” Nenga mwene nyũmba mbulosua ĩsu na ũimũkũlya anyuve ĩkũlyo yĩmwe katĩ wa ala me ĩthangũnĩ ya ĩtina. Na ĩndĩ ũimwonyʼa ũndũ mũtonya kwĩmanyĩsya nake mbulosua ĩsu ũtũmĩĩte kalungu ka mbee ka kĩlungu kĩla wanyuva. O na no ũkũlye mwene nyũmba ĩkũlyo yĩtonya kũtuma endeewʼa kuma kĩlungunĩ kĩla wamũnyuvĩa, na ũimwonyʼa ũndũ ũtonya kũtũmĩa mbulosua ĩno kũkwata ũsũngĩo kuma Mbivilianĩ. Atavanyʼa amwe nĩmonasya amanyĩwʼa moo vitio yĩ Kĩsesenĩ kya jw.org, ethĩwa ve ĩmwe yosanĩte na kĩla mekwĩmanyĩsya.
3. Elesya ũndũ tũtonya kwĩmanyĩsya na mũndũ mbulosua Ũvoo Mũseo.
3 Kũmĩtũmĩa Ũimanyĩsya Mũndũ: (1) Soma ĩkũlyo yĩla yĩandĩkĩtwe na langi mũkwatu nĩ kana ũtetheesye mwene nyũmba akwate ũndũ ũla wa vata kalungunĩ. (2) Soma kalungu kala ke ĩtheo wa ĩkũlyo yĩu. (3) Soma maandĩko ala maandĩkĩtwe “Soma” na ũitũmĩa makũlyo nĩ kana ũtetheesye mwene nyũmba one ũndũ maandĩko asu masũngĩĩte ĩkũlyo yĩla yĩ na namba. (4) Ethĩwa ĩkũlyo yĩu yĩ na kalungu ka kelĩ, ĩka ũndũ weeka kalungunĩ ka mbee kwa kũsyokeleela ũndũ wa 2 na wa 3. Ethĩwa vitio nĩyosanĩte na ĩkũlyo na ndwaamwonyʼa mwene nyũmba, mwonyʼe saa ĩla mũendeee na kwĩmanyĩsya. (5) Wamina kwĩka ũu, mũkũlye mwene nyũmba asũngĩe ĩkũlyo yĩla yĩ na namba nĩ kana wone kana nĩwaelewa.
4. Nĩ kyaũ kĩkatũtetheesya kũtũmĩa mbulosua ĩno nesa?
4 Ĩmanyĩsye mbulosua ĩno nginya ũmĩelewe nesa. Mĩtũmĩe ĩla vaumĩla mwanya. Ũtanathi kwĩmanyĩsya na mũndũ, amba kũsũanĩa ĩũlũ wake na ũndũ ũtonya kũtũmĩa maandĩko ala me kĩlungunĩ kĩu nĩ kana ũmũtetheesye. (Nth. 15:28; Meko 17:2, 3) O ũndũ waendeea kũmanya kũtũmĩa mbulosua ĩno nesa, nowʼo ũkona yĩ ĩvuku ya vata mũno ya kũmanyĩasya andũ ũla wʼo!