Ũndũ Tũtonya Kwĩthĩwa Atavanyʼa Aseo​—Kũtetheesya Amanyĩwʼa ma Mbivilia Meke Maendeeo Nĩ Kana Meyumye na Kũvatiswa

NĨKĨ NĨ ŨNDŨ WA VATA: Nĩ kana amanyĩwʼa ma Mbivilia metĩkĩlwe nĩ Yeova, no nginya meyumye na kũvatiswa. (1Vet 3:21) Meeka ũu methĩawa malika ũsũvĩonĩ wa kĩ-veva ũla ũtanĩawa nĩ ala meyumĩtye mamũthũkũme Yeova na mekaa kwenda kwake. (Sav 91:1, 2) Mũklĩsto eyumasya na ngoo yonthe amũthũkũme Yeova, ĩndĩ ti andũ, wĩa, kana kambunĩ. Kwoou amanyĩwʼa nĩmaĩle kwĩmanyĩsya kũmwenda Ngai.—Alo 14:7, 8.

ŨNDŨ ŨTONYA KWĨKA:

• Mũyĩmanyĩsya, neeneai ũndũ maũndũ asu mũkwĩmanyĩsya maeleetye ĩũlũ wa Yeova. Mũthuthye asomae Mbivilia kĩla mũthenya na aivoyaa ‘atekũeka.’—1Ath 5:17; Yak 4:8

• Tetheesya mũmanyĩwʼa waku wa Mbivilia eke mĩvango ya kwĩyumya na kũvatiswa. O na mũtetheesye eke mĩvango ũtonya kwĩanĩsya mĩtũkĩ, ta kumya maelesyo ũmbanonĩ, kana kũtavya atũi na ala mathũkũmaa ĩmwe maũndũ ala ũkwĩmanyĩsya. Lilikana kana Yeova ndalasimĩthasya andũ mamũthũkũme. Mũndũ nĩwe wĩyĩkĩaa ũtwi wa kwĩyumya amũthũkũme Yeova.—Kũt 30:19, 20

• Ĩkĩa mũmanyĩwʼa vinya eke moalyũku nĩ kana amwendeesye Yeova na ayĩthĩwa aĩle kwondũ wa kũvatiswa. (Nth 27:11) Nũndũ imanyĩo imwe ikuaa ĩvinda ĩasa iyuma, mũmanyĩwʼa wa Mbivilia nĩwaĩle kwĩkalaa aitetheewʼa nĩ kana aumye mũndũ wa tene na ayĩvwʼĩka mũndũ mweũ. (Aev 4:22-24) Mwonyʼe ilungu imwe kuma ĩkasetinĩ ya Mũsyaĩĩsya ila syĩthĩawa na kyongo “Mbivilia Nĩalyũlaa Andũ”

• Mũtavye ũtanu ũla ũkwatĩte ĩvinda yĩla wĩthĩĩtwe ũimũthũkũma Yeova.—Isa 48:17, 18