Maũndũ Ala Tũkwĩmanyĩsya Ĩũlũ wa Ngai Kuma kwa Athani Make
Ĩvinda ya tene, Ngai nĩwanengae athani make ũvoo wa vata ũkonetye andũ. Wʼo ũvoo ũsu wamanengae no ũtũtetheesye kũmanya ũndũ tũtonya kũkwata moathimo make? Ĩĩ. Ekai twone maũndũ ala tũkwĩmanyĩsya kuma kwa athani atatũ maĩ aĩkĩĩku.
AVALAAMU
Ngai nde kyende na nĩwendaa kũathima andũ onthe.
Ngai amwathie mwathani Avalaamu atĩĩ: “Nthĩnĩ waku, we, mĩvĩa yonthe ya nthĩ ĩkaathimwa.”—Mwambĩlĩlyo 12:3.
Twĩĩmanyĩsya kyaũ? Ngai nũtwendete mũno na nĩwendaa kũathima onthe ala mamwĩwʼaa, methĩwe nĩ aũme, aka, kana nĩ syana.
MOSE
Ngai e tei na nũathimaa ala meekĩa kĩthito mamũmanye.
Ngai Mwene Vinya Wʼonthe nĩwanengie mwathani wake Mose ũtonyi wa kwĩka syama nene. Ĩndĩ o na anengetwe vinya ũsu, avoyie atĩĩ: “Mbonʼya yu mĩendele yaku, nĩkũmanye, nĩ kana none ũseo methonĩ maku.” (Kuma 33:13) Ngai nĩwendeeiwʼe nĩ mboya ya Mose na amũathima na ũĩ na ũmanyi wa mĩendele yake na nguma syake. Kwa ngelekanyʼo, nĩweemanyĩisye kana Mũmbi witũ nĩ “Ngai wĩ tei na mũseo.”—Kuma 34:6, 7.
Twĩĩmanyĩsya kyaũ? Ngai nũtũathimaa ithyonthe tweekĩa kĩthito tũmũmanye nesa, twĩthĩwe twĩ aũme, aka, kana syana. O na nũtwonetye Maandĩkonĩ Matheu ũndũ tũtonya kũmũthaitha, na kana nĩwĩthĩawa na mea maingĩ ma kũtũathima na kũtũtwʼĩkĩthya anyanyae.
YESŨ
Nũndũ Yesũ aĩ ĩnee, nĩwavoisye andũ mowau ma mĩthemba yonthe
No tũtanĩe moathimo matakathela kuma kwa Ngai tweemanyĩsya ĩũlũ wa Yesũ, maũndũ ala weekie, na ala wamanyĩisye.
Ndeto ya Ngai nĩtũtavĩtye maũndũ maingĩ ĩũlũ wa Yesũ yĩla waĩ kũũ nthĩ na maũndũ ala wamanyĩisye. Ngai nĩwamũnengete ũtonyi wa kwĩka syama mbingĩ ta kũvosya ilalinda, ala au matũ, o na iema. O na nĩwathayũũkisye akwʼũ. Maũndũ asu Yesũ weekie moonanasya moathimo ala Ngai ũkatũetee. O na Yesũ nĩwaeleisye ũndũ kĩla ũmwe witũ ũtonya kwĩka akwate moathimo asu. Aisye: “Thayũ wa tene na tene nĩwʼo ũũ, maendeee kũkwata ũmanyi ĩũlũ waku, Ngai ũla wa wʼo weka, na ĩũlũ wa ũla wamũtũmie, nake nĩ Yesũ Klĩsto.”—Yoana 17:3.
Yesũ aĩ mũndũ wĩ ĩnee, mũuu, na weekaa angĩ nesa. Kĩu nĩkyo kĩtumi aũme, aka, syana, o na andũ akũũ maendie kwake yĩla wameie: “[Ĩmanyĩsyei] kuma vala nĩĩ nũndũ nyie nĩ mũuu na nĩ wĩnyivyo ngoonĩ, nenyu mũkakwata ũthũmũo.” (Mathayo 11:29) Kĩvathũkanyʼo na andũ aingĩ ala makuaa iveti naĩ, Yesũ nĩwainengete ndaĩa, nĩwoonaa syĩ sya vata, na nĩwasyĩkaa maũndũ maseo.
Twĩĩmanyĩsya kyaũ? Yesũ nĩwoonanisye nĩwendete andũ mũno, na nĩwatũtiĩe ngelekanyʼo nzeo vyũ ya ũndũ tũtonya kwĩkalanasya na ala angĩ.
YESŨ TI NGAI
Maandĩko Matheu mamanyĩasya kana “ithyĩ twĩ na Ngai ũmwe,” na Yesũ Klĩsto nĩwe watũmĩawa nĩ Ngai kũvikya ũtũmane wake kũla kwĩ andũ. (1 Akolintho 8:6) Yesũ nĩwawetie ũtheinĩ kana Ngai nĩ mũnene kwĩ we na kana nĩwe wamũtũmĩte kũũ nthĩ.—Yoana 11:41, 42; 14:28.a
a Nĩ kana wĩmanyĩsye maũndũ maingangĩ ĩũlũ wa Yesũ Klĩsto, sisya kĩlungu kya 8 na kya 9 kya mbulosua Imani ya Kweli—Siri ya Kuwa na Maisha Yenye Furaha nthĩnĩ wa www.jw.org/sw.