“Yeova akanengane kĩla kĩseo; na nthĩ yaitũ ĩkaingĩvasya ũsyao wayo.”—SAVULI 85:12

Tanĩa Moathimo ma Mũmbi Witũ Tene na Tene

Ngai athie mwathani Avalaamu kana “mbaĩ syonthe sya nthĩ” ĩkaathimwa kwĩsĩla ũsyao wake. (Mwambĩlĩlyo 22:18) Nũũ watwʼĩkie ũsyao ũsu?

Vakuvĩ myaka 2,000 mĩvĩtu, Ngai nĩwanengie Yesũ, ũla waĩ ũsyao wa Avalaamu, ũtonyi wa kwĩka syama nene. Syama isu Yesũ weekie syoonanisye kana ũndũ ũla Ngai wathĩte Avalaamu ũkeanĩa kwĩsĩla vala ve Yesũ.—Akalatia 3:14.

Syama ila Yesũ weekie syoonanisye kana nĩwe wanyuvĩtwe nĩ Ngai aathime andũ. O na nĩsyoonanisye ũndũ Ngai ũkamũtũmĩa kũathima mĩvĩa yonthe ya andũ tene na tene. Kwaekai twone nguma imwe sya kwendeesya sya Yesũ kwa kũsisya syama ila weekie.

Tei—Yesũ nĩwavoasya awau.

Ĩvinda yĩmwe, mũndũ ũmwe wawaĩte mangũ nĩwakũlilye Yesũ amũvosye. Yesũ nĩwamũkiitie, na amwĩa: “Nĩngwenda!” Na vau kwa vau, mũndũ ũsu avoa.—Maliko 1:40-42.

Ũlau—Yesũ nĩwaĩthasya ala maĩ na nzaa.

Yesũ ndendaa andũ maũmĩwʼe nĩ nzaa. Na ũu nĩ wʼo nũndũ ve mavinda kauta weekie syama na aĩthya andũ ngili mbingĩ kwa kwingĩvya mĩkate mĩnini na makũyũ manini. (Mathayo 14:17-21; 15:32-38) Andũ asu maĩe mavũna vyũ, na matialya lĩu mwingĩ mũno.

Ĩnee—Yesũ nĩwathayũũkisye akwʼũ.

“Tei” nĩwatumie Yesũ athayũũkya mwana wa kĩveti ndiwa kĩla kĩtaĩ na mwana ũngĩ, kana mũndũ wa kũkĩsũvĩa.—Luka 7:12-15.

MOATHIMO MATAKATHELA ALA NGAI ŨKAETE ĨŨLŨ WA NTHĨ

Yĩla Yesũ waĩ ĩũlũ wa nthĩ nĩwoonanisye kana Ngai e vinya wa kũetee andũ moathimo. Yesũ aisye akasyoka, na akilyĩ kũsyoka. Ooka, Ngai Mwene Vinya Wʼonthe akamũtũmĩa kwĩka syama nene ĩũlũ wa nthĩ yonthe o na kwĩ ila weekie e kũũ nthĩ.

We wĩona maũndũ makethĩwa mailye ata ĩũlũ wa nthĩ yĩla Ngai ũkeanĩsya watho ũla wamwathie Avalaamu? Ala mamwendete Ngai na mamũnengete ndaĩa “makatiĩwa nthĩ na makeetanʼya mũuonĩ mwingĩ.” (Savuli 37:11) “Kĩkwʼũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo.”—Ũvuanyʼo 21:4.

Ũkethĩwa wĩ ũathimo mũnene mũno kwĩkala tene na tene ĩũlũ wa nthĩ kwĩ mũuo! Twĩkũthokya wĩmanyĩsye maũndũ maingĩ ĩũlũ wa moathimo ala Ngai ũkilyĩ kũete, nthĩnĩ wa www.jw.org/kam.