Yo Ndeto ya Ngai Nĩyavĩndũiwe?

Andũ amwe nĩmekũlasya ethĩwa Ndeto ya Ngai nĩyĩthĩwa yavĩndũiwe. Ĩndĩ mwathani Isaia aisye kana Ndeto ya Ngai ‘ĩkekalaa tene na tene.’ (Isaia 40:8) Tũtonya kwĩthĩwa na mũĩkĩĩo ata kana maũndũ ala Ngai wathanĩte mayaavĩndũwa?

Ngai e vinya wa kũsũvĩa Ndeto yake ndĩkanangwe na ndĩkavetwe kana kwongelwa kĩndũ. Kwa ngelekanyʼo, ĩvindanĩ ya tene yĩla andũ maumĩĩasya maũndũ ala maandĩkĩtwe Ndetonĩ yake, meethĩawa me metho, o na nĩmatalaa kĩla ndeto ya maandĩko asu matheu nĩ kana maĩkĩĩthye mainongela, kũvĩndũa, kana kũveta kĩndũ. Ĩndĩ o na ũu wĩ o vo, nũndũ andũ nĩ ene naĩ, andũ ala maumĩĩasya maandĩko asu no meekaa tũmavĩtyo tũnini.

TWĨSĨ ATA KANA MAANDĨKO MATHEU ALA TWĨ NAMO ME NA ŨVOO O ŨLA NGAI WAANDĨKĨTHISYE MWAMBĨĨONĨ?

Ũmũnthĩ kwĩ kovi sya tene ngili mbingĩ sya Maandĩko Matheu. Kwoou, ethĩwa kovi ĩmwe ĩandĩkĩtwe kĩvathũkanyʼo, no ĩsianĩwʼe na kovi ingĩ mbingĩ. Nũndũ wa ũu, nĩ laisi kũmanya mavĩtyo ala meekiwe kovi ĩsu ĩyumĩĩwʼa.—Wenda kũmanya mũnango, sisya kĩlungu kĩ na kyongo, “Je, Biblia Imebadilishwa au Kupotoshwa?,” kĩla kĩ nthĩnĩ wa jw.org.

Kwa ngelekanyʼo, kwasũanĩa mavuku ma tene metawa Mavuku ma Ũkanga wa Mũnyũ, ala meethĩiwe ngunganĩ syĩ vakuvĩ na Ũkanga wa Mũnyũ mwaka wa 1947. Mavuku asu me na ilungu sya Maandĩko Matheu maandĩkiwe myaka mbee wa ngili ilĩ mĩvĩtu. Asomi amwe nĩmasianĩisye maũndũ ala me mavukunĩ asu ma tene na Maandĩko Matheu ala twĩ namo ũmũnthĩ. Meethĩie ata?

Asomi asu meethĩie kana maandĩko ala tũsomaa Ndetonĩ ya Ngai ũmũnthĩ nĩmavwʼanene na maandĩko asu ma tene.a Ũkunĩkĩli mwingĩ wa mavuku ta asu ma tene wonanasya kana kĩla tũsomaa ũmũnthĩ Ndetonĩ ya Ngai nĩkyo Ngai waandĩkĩthisye. Kwoou tũi na nzika kana Ngai nũtũmĩĩte ũĩ na ũtonyi wake kũĩkĩĩthya kana ũmũnthĩ twĩ na Maandĩko Matheu ala ma wʼo.

Kwoou, no tũsome Ndeto ya Ngai tũte na nzika o na vanini kana kĩla tũũsoma nĩ kya wʼo na nĩ kya kwĩkwatwʼa. Yu twĩsĩ ũu, ekai twone maũndũ ala tũkwĩmanyĩsya ĩũlũ wa Ngai kuma kwa athani make.