Ũndũ Ngai Ũathimaa Ala Mamwĩwʼaa

Mwathani Mose aisye kana tweewʼa mĩao ya Ngai, akatũathimaa. (Kũtũngĩlĩlwa Kwa Mĩao 10:13; 11:27) Tũimwĩwʼaa Ngai aĩ nũndũ nĩtũũkĩa aitũsilĩla. Nguma nzeo mũno ila Ngai wĩthĩawa nasyo nitumaa tũmwenda, na ũu ũituma tũmwĩwʼa na tũyĩvathana na maũndũ ala mamũthatasya. Maandĩko matũĩkĩĩthĩtye atĩĩ: “Kũũ nĩkwʼo kũmwenda Ngai: tũkwatae mĩao yake; na mĩao yake ti mũio mũito.”—1 Yoana 5:3.

Ĩndĩ nĩ kwa nzĩa yĩva kũmwĩwʼa Ngai kũtumaa tũkwata moathimo? Ekai twone nzĩa ilĩ.

1. KŨMWĨWʼA NGAI NĨKŨTUMAA TWĨTHĨWA OĨ

“Ninyie Yeova Ngai waku, ũla ũkũmanyĩasya kwaĩla, ũla ũkũtongoeasya nzĩanĩ ĩla waĩle kũthi nayo.”—ISAIA 48:17.

Yeova Ngai nĩwe Mũmbi witũ, na kwoou nũtwĩsĩ nesa na nũtũnengae ũtao ũla ũtwaĩle. Nĩ kana ũtao wake ũtume twĩka motwi maseo, nĩtwaĩle kwĩmanyĩsya Maandĩko Matheu tũmanye kwenda kwake, na ĩndĩ tũitũmĩa kĩla tweemanyĩsya.

2. TWAMWĨWʼA NGAI TWĨKALAA TWĨ ATANU

“Nĩ atanu ala mewʼaa ndeto ya Ngai na kũmĩkwata!”—LUKA 11:28.

Ũmũnthĩ andũ milioni mbingĩ ala maatĩĩaa Ndeto ya Ngai methĩawa na ũtanu wa wʼo. Kwasũanĩa ngelekanyʼo ya mũndũũme ũmwe kuma Spain ũla wathataa mĩtũkĩ na wathĩnasya andũ angĩ, o vamwe na kĩveti kyake. Mũthenya ũmwe nĩwasomie ndeto ila syaandĩkiwe nĩ mwathani Mose ĩũlũ wa mwana wa Yakovo ũla weetawa Yosevu. Yosevu aĩ mũndũ mũuu mũno. Ve ĩvinda Yosevu wathooiwʼe ta ngombo na ekwʼa yela ate na makosa, ĩndĩ aendeeie kwĩkala e mũuu, e na mũuo, o na nĩwaekeaa andũ ala angĩ. (Mwambĩlĩlyo, kĩlungu kya 37-45) Yĩla mũndũũme ũsu wasomie maũndũ asu, aisye: “Kũmũsũanĩa Yosevu nĩkwatumie nĩmanyĩsya kwĩkala nĩuĩtye, kwĩkaa angĩ nesa, na kwĩsiĩĩa. Na nũndũ wa ũu, ũmũnthĩ nĩ mũtanu kwĩ tene.”

Maandĩko Matheu nĩmanenganĩte motao angĩ maingĩ ĩũlũ wa ũndũ tũtonya kwĩkalanyʼa na andũ ala angĩ. Soma kĩlungu kĩla kĩatĩĩe nĩ kana ũmanye motao asu.