MWĨKALĨLE WA AKLĨSTO
Kĩla Twaĩle Kwĩka Nĩ Kana Twende Ngai na Atũi Maitũ
O na kaũ Aklĩsto mai ungu wa Mĩao ya Mose, mĩao ĩlĩ ĩla mĩnene, nayo nĩ kũmwenda Ngai na kwenda atũi maitũ, nĩyonanasya kĩla Ngai wendaa twĩke. (Mt 22:37-39) Wendo ũsu tũisyaawa nawʼo, kwoou no nginya twĩkĩe kĩthito nĩ kana twĩthĩwe nawʼo. Tũtonya kwĩka ũu ata? Nzĩa ĩmwe ya vata nĩ kwa kũsoma Mbivilia kĩla mũthenya. Ĩla tweemanyĩsya ĩũlũ wa ndaĩa sya Ngai syĩ kĩvathũkanyʼo o tondũ syonanĩtwʼe Maandĩkonĩ, nĩtwonaa “ũseo wa Yeova.” (Sav 27:4) Tweeka ũu, wendo witũ kwa Ngai nĩwongelekaa na tũyĩthĩwa na mosũanĩo ta make. Wendo ũsu nũtumaa tũkwata mĩao ya Ngai. Kwa ngelekanyʼo, nĩtũkwataa mwĩao ũla wonanĩtye kana nĩtwaĩle kwenda andũ ala angĩ na ngoo yonthe. (Yoa 13:34, 35; 1Yoa 5:3) Maũndũ aa atatũ no matume ũtanĩa mũnango kũsoma Mbivilia:
Sũanĩa ta wĩ ũmwe waĩ vo maũndũ ala ũũsoma maendeee kwĩkĩka. Kũna visa kĩlĩkonĩ ta wĩ ũmwe wa andũ ala maĩ vo. Nĩ maũndũ meva ũkwĩwʼa, ũkwona, na nĩ mĩuke yĩva yĩ vo? Ala mawetetwe ũndũnĩ ũsu matonya kwĩthĩwa mayĩwʼa ata?
Tũmĩa nzĩa syĩ kĩvathũkanyʼo. Imwe sya nzĩa isu nĩ ta: Kũsoma na wasya, kana ũatĩanĩe na ũsomi ũlekotiĩtwe. Kũsoma ĩũlũ wa mũndũ mũna ũwetetwe Mbivilianĩ kana kũsoma ĩũlũ wa kyongo kĩna vandũ va kũsoma ilungu iatĩanĩe. Kwa ngelekanyʼo, tũmĩa kĩlungu kya Ũvoo wa Kwongeleela (Appendix A7 kana B12) nthĩnĩ wa New World Translation of the Holy Scriptures nĩ kana ũsome ĩũlũ wa Yesũ. Soma kĩlungu kyonthe kya Mbivilia vala ĩandĩko ya kĩla mũthenya yumĩtwʼe. Soma mavuku ma Mbivilia ũatĩanĩsye kwĩanana na ĩvinda yĩla maandĩkiwe.
Soma wĩ na kĩeleelo kya kũeleawa. Kũsoma na kũelewa o na ethĩwa no kĩlungu kĩmwe kĩla mũthenya, na ũivindĩĩsya kĩla wasoma nĩ ũndũ wa vata mũno kwĩ kũsoma ilungu mbingĩ nĩ kana ũmine kũsoma. Elewa vala kĩlungu kĩla ũũsoma kyaandĩkĩiwe na maũndũ onthe ala maendeee kĩyĩandĩkwa. Tũmĩa mevu na mĩsoa yĩeleetye mũnango kĩla ũũsoma (marginal references). Ĩka ũkunĩkĩli nĩ kana ũelewe ũndũ ũmwe ũtonya kwĩthĩwa ũtanaelewa ĩla ũũsomaa. Ethĩwa nĩvatonyeka, tũmĩa ĩvinda yĩanene na yĩla ũtũmĩaa ũisoma ũvindĩĩsye kĩla wasoma.