Kwata Ũĩ kwa Kwĩmanyĩsya Kĩla Mũthenya Maũndũ Ala me Nthĩnĩ wa JW.ORG

Ndeto ya Ngai nĩtũnengae kyonthe kĩla tũkwenda nĩ kana tũmĩanĩsye na matatwa ala matũkwataa mĩthenyanĩ ĩno ya mũminũkĩlyo. (2Ti 3:1, 16, 17) Ĩndĩ mavinda angĩ no wĩthĩe tũyenda kũtetheewʼa tũkwate myolooto ya Mbivilia ĩtonya kũtũtethya ũndũnĩ mũna. Kwa ngelekanyʼo, we wĩ mũsyai ũũmantha ũtao ĩũlũ wa ũndũ ũtonya kũea syana syaku? Wĩ mũndũ wa mũika ũkomanĩte na maũndũ meũtata mũĩĩkĩo waku? Nĩwĩthĩwa ũendeee kũmĩanĩsya na kyeva nũndũ wa kũkwʼĩĩwa nĩ mũũme kana kĩveti kyaku? No ũkwate ũvoo nthĩnĩ wa jw.org ũtonya kũũtetheesya ũkwate myolooto ya Mbivilia ĩtonya ũkũtetheesya maũndũnĩ asu na angĩ maingĩ.—Nth 2:3-6.

Lika kĩsesenĩ kya jw.org na ũithi vala vaandĩkĩtwe MOMANYĨSYO MA MBIVILIA. (Sisya visa wa 1.) Watina vau, nĩvekumĩla maũndũ ala me nthĩnĩ, nyuva ũla ũkwenda. Kana no ũthi vala vaandĩkĩtwe, SYĨNDŨ ILA SYĨ VO > ILUNGU na ĩndĩ ũinyuva ũndũ ũla ũkwenda. (Sisya visa wa 2.) No wĩthĩe maũndũ asu o na nthĩnĩ wa JW Library^®.a No ũtanĩe kũsisya ilungu isu nthĩnĩ wa jw.org kana nthĩnĩ wa JW Library. Nzĩa ĩngĩ ũtonya kũtũmĩa nĩ kũthi nthĩnĩ wa jw.org vala vaandĩkĩtwe Mantha, na ũiandĩka kyongo kĩla ũkwendaa kũmantha.

Andĩka syongo ii iatĩĩe vala vaandĩkĩtwe Mantha, na katĩ wa ilungu ila ikumĩla ineneete ũvoo ũsu wamantha, andĩka ila ũkwenda kũsoma.

• Kũea syana

• Amũika kũkwʼa ngoo

• Kũkwʼĩĩwa nĩ mũndũ wendete