“Nĩmwĩta Anyanyawa”

1. Waĩle kwĩka ata nĩ kana ũtume ndũũ na mũndũ?

MAVINDA maingĩ, nĩ kana tũtume ndũũ na mũndũ wĩthĩaa no nginya tũtũmĩe ĩvinda yingĩ nake. Mwaea ngewa na mũieleanyʼa ũndũ mũkwĩwʼa na maũndũ ala mũũsũanĩa, kĩu no kĩtume mũtwʼĩka anyanya. Ĩndĩ kũtwʼĩka anyanyae ma Yesũ kũi laisi. Nĩ maũndũ meva matonya kũtuma tũemwa nĩ kũtwʼĩka anyanyae?

2. Ũndũ wa mbee ũla ũtonya kũtuma tũemwa nĩ kũtwʼĩka anyanya ma Yesũ nĩ wĩva?

² Ũndũ wa mbee ũla ũtonya kũtuma tũemwa nĩ kũtwʼĩka anyanya ma Yesũ nĩ kana, vai ũmwe waitũ waakomana nake metho kwa metho. O namo Aklĩsto aingĩ ĩvindanĩ ya atũmwa mayaĩ maakomana nake. Ĩndĩ o na vailye ũu, mũtũmwa Vetelo aisye: “O na kau mũyaamwona, nĩmũmwendete. O na kau mũimwene yu, nĩmũmũĩkĩĩĩte.” (1 Vet. 1:8) Ũu wĩonanyʼa kana nĩ ũndũ ũtonyeka tũkatwʼĩka anyanya ma Yesũ o na tũtaamwona.

3. Ũndũ wa kelĩ ũla ũtonya kũtuma tũemwa nĩ kũtwʼĩka anyanya ma Yesũ nĩ wĩva?

³ Ũndũ wa kelĩ nĩ kana tũitonya kũneena na Yesũ. Yĩla tũũvoya, twĩthĩawa tũineena na Yeova. Nĩ wʼo kana tũvoyaa ĩsyĩtwanĩ ya Yesũ, ĩndĩ tũyĩthĩawa tũineena nake. Na eka ũu, Yesũ ndendaa tũmũvoye. Nĩkĩ? Nũndũ mboya nĩ kĩlungu kĩmwe kya ũthaithi, na no Yeova e weka waĩle kũthaithwa. (Mt. 4:10) Ĩndĩ o na vailye ũu, no twonanyʼe kana nĩtũmwendete Yesũ.

4. Ũndũ wa katatũ ũla ũtonya kũtuma tũemwa nĩ kũtwʼĩka anyanya ma Yesũ nĩ wĩva, na twĩneenea kyaũ ĩsomonĩ yĩĩ?

⁴ Ũndũ wa katatũ nĩ kana Yesũ ekalaa ĩtunĩ, na kwoou tũyĩsa kũtindanyʼa nake. Ĩndĩ no twĩmanyĩsye maũndũ maingĩ ĩũlũ wake o na tũte vakuvĩ nake. Nĩtũũneenea maũndũ ana tũtonya kwĩka nĩ kana tũlũlũmĩlye ndũũ yitũ nake. Ĩndĩ mbee, ekai tũneenee nĩkĩ nĩ ũndũ wa vata kũtwʼĩka anyanya ma Yesũ.

NĨKĨ TWAĨLE KŨTWʼĨKA ANYANYA MA YESŨ?

5. Nĩkĩ no nginya tũtwʼĩke anyanyae ma Yesũ? (O na ĩngĩ sisya masandũkũ aa elĩ: “Kũtwʼĩka Anyanya ma Yesũ Nĩkũtumaa Tũtwʼĩka Anyanya ma Yeova” na “Kũnenga Yesũ Ndaĩa Ĩla Ĩmwaĩle.”)

⁵ No nginya twĩthĩwe anyanyae ma Yesũ ethĩwa nĩtũkwenda kwĩthĩwa na ngwatanĩo nzeo na Yeova. Nĩkĩ ũndũ ũsu nĩ wa vata? Sũanĩa maũndũ aa elĩ. Ũndũ wa mbee, Yesũ atavisye amanyĩwʼa make atĩĩ: “Asa mwene nũmwendete, nĩkwĩthĩwa inywʼĩ nĩmũmbendete.” (Yoa. 16:27) Asyokie asya: “Vaiĩ mũndũ wũkaa kwa Asa atesĩle kwakwa.” (Yoa. 14:6) Kũtata kũtwʼĩka anyanyae ma Yeova tũtambĩte kũtwʼĩka anyanya ma Yesũ no ta ũndũ ũmwe na kũtata kũlika nyũmba tũtesĩlĩte mũomonĩ. Yesũ nĩwatũmĩie ngelekanyʼo ta ĩsu asya kana we nĩwe “mũomo wa malondu.” (Yoa. 10:7) Ũndũ wa kelĩ nĩ kana Yesũ nĩwatutĩtye Ĩthe wake kwa kwĩthĩwa na nguma o ta syake. Atavisye amanyĩwʼa make atĩĩ: “Mũndũ o na wĩva ũla wambonie nĩwamwonie Asa o nake.” (Yoa. 14:9) Kwoou ũndũ ũla wa vata vyũ ũtumaa tũmũmanya Yeova nĩ kwĩmanyĩsya ĩũlũ wa Yesũ. O ũndũ twaendeea kwĩmanyĩsya ĩũlũ wa Yesũ, nowʼo tũmwendaa mũnango. Na twamwenda, kĩu kĩituma tũmwenda Ĩthe wake mũnango.

6. Nĩ ũndũ ũngĩ wĩva waĩle kũtuma tũtwʼĩka anyanya ma Yesũ? Elesya.

⁶ No nginya twĩthĩwe na ũnyanya mũseo na Yesũ nĩ kana mboya sitũ isũngĩwe. Ũu nĩ kwonanyʼa kana ve maũndũ angĩ twaĩle kwĩka, eka o kwasya “ĩsyĩtwanĩ ya Yesũ” tũiminĩĩa mboya sitũ. Kwoou no nginya tũelewe ũndũ Yeova ũtũmĩaa Yesũ kũsũngĩa mboya sitũ. Yesũ atavisye atũmwa make ũũ: “Ũndũ o na wĩva ũla mwĩvoya ĩsyĩtwanĩ yakwa, ngawĩka.” (Yoa. 14:13) O na kũtwʼĩka Yeova nĩwe wĩthukĩĩasya mboya sitũ na aisũngĩa, nũmũnengete Yesũ ũkũmũ wa kwĩanĩsya kĩla ũ Yeova ũtwʼĩte. (Mt. 28:18) Kwoou Ngai atanamba kũsũngĩa mboya sitũ, nũsiasya ethĩwa nĩtũatĩĩe ũtao ũla Yesũ wanenganie. Kwa ngelekanyʼo, Yesũ aisye: “Ethĩwa mũkamaekea andũ mavĩtyo moo, Ĩthe wenyu wa ĩtunĩ akamũekea; ĩndĩ mwalea kũmaekea andũ mavĩtyo moo, nake Ĩthe wenyu ndakamũekea mavĩtyo menyu.” (Mt. 6:14, 15) Kwoou nĩ ũndũ mũseo ta kĩ tũkakuaa angĩ nesa kwa nzĩa ĩsu o tondũ Yeova na Yesũ matũkuaa!

7. Naaũ matethekaa nĩ nthembo ya wovosyo ya Yesũ?

⁷ No anyanya ma Yesũ me oka matonya kũtetheka nĩ nthembo yake ya wovosyo. Twĩsĩ ũu ata? Yesũ aisye kana akeeyumya “akwʼe kwondũ wa anyanyae.” (Yoa. 15:13) No nginya andũ aĩkĩĩku ala maĩ kwʼo Yesũ atanamba kũka kũũ nthĩ meĩmanyĩsya ĩũlũ wake na maimwenda ĩtina wa kũthayũũkwʼa. O na kau andũ ta Avalaamu, Sala, Mose, na Laavi maĩ aĩkĩĩku, no nginya meamba kũtwʼĩka anyanya ma Yesũ nĩ kana makwate thayũ wa tene na tene.—Yoa. 17:3; Meko 24:15; Aevl. 11:8-12, 24-26, 31.

8-9. O tondũ vaeleetwʼe ĩandĩkonĩ ya Yoana 15:4, 5, kũtwʼĩka anyanya ma Yesũ kũtũtetheeasya kwĩka ata, na nĩkĩ ũsu nĩ ũndũ wa vata?

⁸ Nĩtũtanĩaa kũthũkũma vamwe na Yesũ wĩanĩ wa kũtavanyʼa na kũmanyĩsya andũ ĩũlũ wa ũvoo mũseo wa Ũsumbĩ. Yĩla Yesũ waĩ ĩũlũ wa nthĩ, aĩ mũmanyĩsya. Na kuma asyoka ĩtunĩ, nũendeee kũtongoesya wĩa wa kũtavanyʼa na kũmanyĩsya e mũtwe wa kĩkundi. Nĩwonaa kĩthito kĩla wĩkĩaa ũtetheesye andũ aingĩ ũndũ vatonyeka mamũmanye na maimanya Ĩthe wake kĩ kya vata. Kwa wʼo, tũyĩsa kwĩanĩsya nesa wĩa ũsu tũtatetheewʼe nĩ Yeova na Yesũ.—Soma Yoana 15:4, 5.

⁹ Ndeto ya Ngai nĩmanyĩasya ũtheinĩ kana no nginya twĩthĩawe tũmwendete Yesũ nĩ kana tũmwendeesye Yeova. Kwoou ekai tũneenee maũndũ ana monanĩtye ũndũ tũtonya kũtwʼĩka anyanya ma Yesũ.

ŨNDŨ TŨTONYA KŨTWʼĨKA ANYANYA MA YESŨ

10. Ĩtambya ya mbee yĩla twaĩle kwosa nĩ kana tũtwʼĩke anyanya ma Yesũ nĩ yĩva?

¹⁰ (1) Mũmanye Yesũ. Tũtonya kwĩka ũu kwa kũsoma ĩvuku ya Mathayo, Maliko, Luka, na Yoana. Kũvindĩĩsya ngewa ila ieleetye ĩũlũ wa Yesũ Mbivilianĩ no kũtume tũmanya ũndũ Yesũ wakuaa angĩ nesa, na kĩu kĩitũtetheesya tũmwende na tũimũnenga ndaĩa. Kwa ngelekanyʼo, o na kũtwʼĩka Yesũ aĩ Vwana wa amanyĩwʼa make, we ndaamakua ta ngombo. Vandũ va ũu, nĩwamaeleasya ũndũ ũkwĩwʼa na maũndũ ala ũkũsũanĩa. (Yoa. 15:15) Yĩla meũthĩnĩka nĩwathĩnĩkaa, na nĩwaĩaa vamwe namo. (Yoa. 11:32-36) Na eka ũu, o na ala mamũvĩngaa nĩmaisye kana we nĩ mũnyanya wa andũ ala meethukĩĩasya ũvoo wake. (Mt. 11:19) Twakua ala angĩ o ta ũndũ Yesũ wakuaa amanyĩwʼa make, tũkekalanasya nesa, tũkeewʼaa twĩ eanĩe na twĩ atanu mũnango, na tũkamwenda Klĩsto na tũimũnenga ndaĩa mũnango.

11. Ĩtambya ya kelĩ yĩla twaĩle kwosa nĩ kana tũtwʼĩke anyanya ma Yesũ nĩ yĩva, na nĩkĩ nĩ ya vata?

¹¹ (2) Atĩĩa nzĩa ya Yesũ ya kũsũanĩa na kwĩka maũndũ. Twamanya ũndũ ũsũanĩaa na twatata tũsũanĩe take, ũnyanya witũ nake ũkaendeea kũlũlũmĩĩla. (1 Ako. 2:16) Tũtonya kwĩka ũu ata? Kwasũanĩa ngelekanyʼo ĩno. Yesũ asũanĩaa mũno ũndũ ũtonya kũtetheesya angĩ vandũ va kwĩyendeesya we mwene. (Mt. 20:28; Alo. 15:1-3) Na nũndũ asũanĩaa kwa nzĩa ĩsu, nĩweeyumasya kwondũ woo na nĩwamaekeaa. Ndathataa mĩtũkĩ eewʼa kĩla angĩ meũweta ĩũlũ wake. (Yoa. 1:46, 47) Na ndeetĩkĩlasya mavĩtyo ala mũndũ weekie tene matumae ethĩwa na woni mũthũku ĩũlũ wake. (1 Tim. 1:12-14) Yesũ aisye: “Andũ onthe makamanya kana mwĩ amanyĩwʼa makwa—ethĩwa mũkeethĩwa na wendo katĩ wenyu.” (Yoa. 13:35) Kwoou ĩkũlye-ĩ, “Nyie nĩnĩatĩĩaa ngelekanyʼo ya Yesũ kwa kwĩka kyonthe kĩla nĩtonya nĩmanthe mũuo na ana-a-asa na eĩtu-a-asa makwa?”

12. Ĩtambya ya katatũ yĩla twaĩle kwosa nĩ kana tũtwʼĩke anyanya ma Yesũ nĩ yĩva, na tũtonya kwosa ĩtambya yĩu ata?

¹² (3) Kwata mbau ana-a-asa ma Klĩsto. Yesũ onaa maũndũ ala twĩkaa ana-a-asa make etĩkĩwʼa mauta ta we tũũmwĩka. (Mt. 25:34-40) Ũndũ wa vata ũla twĩkaa tũkwate mbau etĩkĩwʼa mauta nĩ kũtethya na kĩthito wĩa ũla Yesũ wanengie aatĩĩi make wa kũtavanyʼa ũvoo wa Ũsumbĩ, na kũtwʼĩkĩthya andũ amanyĩwʼa. (Mt. 28:19, 20; Meko 10:42) Ana-a-asa ma Klĩsto maitonya kwĩanĩsya wĩa ũsu mũnene wa kũtavanyʼa nthĩ yonthe, ũla ũendeee yu, matatetheewʼe nĩ “malondu angĩ.” (Yoa. 10:16) Kwoou ethĩwa wĩ wa malondu angĩ, kĩla ĩvinda wathi kũtavanyʼa, wĩthĩawa ũyonanyʼa kana nũmwendete Yesũ vamwe na etĩkĩwʼa mauta.

13. Tũtonya kũatĩĩa ata ũtao wa Yesũ ũla wĩ nthĩnĩ wa Luka 16:9?

¹³ O na ĩngĩ, nĩtũtwʼĩkaa anyanya ma Yeova na Yesũ twaumya mĩvothi ya kũtetheesya wĩa ũla matongoesye. (Soma Luka 16:9.) Kwa ngelekanyʼo, no tumye mĩvothi kwondũ wa wĩa wa nthĩ yonthe. Mĩvothi ĩsu no ĩtũmĩwe kũtetheesya wĩa wa kũtavanyʼa ũvoo mũseo isionĩ sya vaasa, kwaka na kũtũngĩĩa myako ĩla ĩtũmĩawa maũndũnĩ makonetye ũthaithi wa wʼo, na kũtetheesya ana-a-asa na eĩtu-a-asa ala makwatwa nĩ mĩisyo. O na no tũtetheesye kũĩvĩa ngalama sya kĩkundi kitũ na no twĩyumye tũtetheesye ana-a-asa ala twĩsĩ me na vata wa ũtethyo. (Nth. 19:17) Asu nĩ maũndũ tũtonya kwĩka tũkonanyʼa nĩtũkwete mbau ana-a-asa ma Klĩsto.

14. O tondũ vonanĩtwʼe ĩandĩkonĩ ya Aeveso 4:15, 16, nĩ ĩtambya yĩva ya kana twaĩle kwosa nĩ kana tũtwʼĩke anyanya ma Yesũ?

¹⁴ (4) Kwata mbau mĩvango ĩla ĩkwĩkwa kĩkundinĩ kya Kĩklĩsto. Nũndũ Yesũ nĩwe mũtwe wa kĩkundi, nĩtũtwʼĩkaa anyanya make aseango tweewʼa ala ũnyuvĩte matũsũvĩe. (Soma Aeveso 4:15, 16.) Kwa ngelekanyʼo, nĩtwĩthĩĩtwe tũitata kũĩkĩĩthya kana Nyũmba sya Ũsumbĩ nĩsyatũmĩwa nesanga. Nũndũ wa ũu, ikundi imwe nikwatanĩtwʼe, na isio sya ũtavanyʼa ikavangwa ũndũ ũngĩ. Mũvango ũsu nũtumĩte mĩvothi mingĩ ĩsũvĩwa. O na vailye ũu, ũsu wĩthĩĩtwe wĩ ũalyũku mũnene kwa atavanyʼa amwe. Atavanyʼa asu aĩkĩĩku nĩmatonya kwĩthĩwa mekalĩte kĩkundinĩ kyoo kya tene kwa ĩvinda ya myaka mingĩ, na nĩmatonya kwĩthĩwa mendete ana-a-asa na eĩtu-a-asa ma kĩkundi kĩu mũno. Ĩndĩ ĩtina wa ũalyũku ũsu no nginya maaĩwe kĩkundi kĩngĩ. No nginya Yesũ ethĩwe atanaa mũno oona amanyĩwʼa asu aĩkĩĩku maikwata mbau mũvango ũsu!

TWĨENDEEA KWĨTHĨWA TWĨ ANYANYA MA YESŨ TENE NA TENE

15. Ũnyanya witũ na Yesũ ũkalũlũmĩla ata ĩvinda yũkĩte?

¹⁵ Ala metĩkĩwʼe mauta kwĩsĩla veva mũtheu me na wĩkwatyo wa kwĩkala na Yesũ tene na tene masumbĩkĩte vamwe nake Ũsumbĩnĩ wa Ngai. Makamwona, makaneenaa nake, na maitindanasya nake. (Yoa. 14:2, 3) O namo ala me na wĩkwatyo wa kwĩkala ĩũlũ wa nthĩ, makoona ũndũ Yesũ ũmendete na ũndũ ũmathĩnĩkĩaa. O na kũtwʼĩka maikamwona Yesũ, ũnyanya woo nake ũkaendeea kũlũlũmĩla o ũndũ makaendeea kũtanĩa moathimo ala makaeteawe nĩ Yeova na Yesũ.—Isa. 9:6, 7.

16. Ũnyanya witũ na Yesũ ũtũtetheeasya kũkwata moathimo meva?

¹⁶ Tweetĩkĩla kũtwʼĩka anyanya ma Yesũ nĩtũkwataa moathimo maingĩ. Kwa ngelekanyʼo, nĩtwonaa ũndũ ũtwendete na ũtũtetheeasya ĩvindanĩ yĩĩ. Twĩ na wĩkwatyo wa kwĩkala tene na tene. Na ũndũ ũla wa vata vyũ nĩ kana kũtwʼĩka anyanya ma Yesũ kũtũtetheeasya kũkwata mũthĩnzĩo ũla wa vata vyũ, nawʼo nĩ kwĩthĩwa na ngwatanĩo nzeo na Ĩthe wake, Yeova. Nĩ ndaĩa nene ta kĩ kwĩtwa anyanya ma Yesũ!