Makusiwʼe no Kwona e Mũtanu!

MŨTHENYA ũmwe, ve eĩtu elĩ matembeete kĩsionĩ kya viasala taoninĩ ya Baguio, nthĩ ya Philippines. Nĩmoonie kakalĩ ka mavuku, ĩndĩ mayaakathengeea. Ũtee wako vaĩ mwĩĩtu-a-asa wĩtawa Helen, na amasyaĩĩsye e mũtanu mũno. O na kau eĩtu asu mayaaũngama, nĩmendeeiwʼe nĩ ũtanu wa Helen.

Mũthenya o ũsu eĩtu asu me mbasinĩ menũkĩte, nĩmoonie kĩvwaũ kĩnene kĩandĩkĩtwe jw.org kĩ Nyũmbanĩ ya Ũsumbĩ. Nĩvo malilikanile kana ndeto isu nosyo monie iandĩkĩtwe kala kakalĩnĩ ka mavuku. Ndatĩkanĩ ĩsu nĩmaumie mbasinĩ na maũngama ngeitinĩ ya Nyũmba ya Ũsumbĩ masisye mũvango wa maũmbano ma ikundi syĩ kĩvathũkanyʼo ũla waandĩkĩtwe vo.

Eĩtu asu nĩmaendie ũmbanonĩ ũla waatĩĩe. Na nĩwĩsĩ nũũ moonie mavika? Helen! Malilikanile na mĩtũkĩ kana ũsu nĩ ũla mũndũ mũka wĩ ũthyũ mũtanu. Helen aĩtye: “Yĩla manthengeeie, nalikilwe nĩ kawila. Nasũanĩie nĩ ta ve ũndũ mũthũku nĩthĩwa nĩkie.” Ĩndĩ nĩmamũeleisye vala mamwonete.

Eĩtu asu nĩmatanĩie ũmbano mũno, na meewʼaa ta me mũsyĩ. Na ĩtina wa maũmbano yĩla moonie ala angĩ maithambya Nyũmba ya Ũsumbĩ, makũlilye kana no matetheesye. O na kau mwĩĩtu ũmwe ũmũnthĩ ndekalaa nthĩ ĩsu, ũla ũngĩ nĩwambĩĩie kũendaa maũmbanonĩ, na ambĩĩa kwĩmanyĩsya Mbivilia. Kwa wʼo, makusiwʼe no kwona Helen e mũtanu!