“Yu Nĩnendete Kũtavanyʼa!”

NĨNAAISYE ŨTANU WAKWA

Ũndũ wa kũmakya nĩ kana nĩ vakuvĩ myaka 13, ngwatanĩo yakwa na Yeova nĩyambĩĩie kwonza. Noonaa syana ila nasomaa nasyo syĩ na ũthasyo mwingĩ, na kwoou nĩnambĩĩie kwona ta ve kĩndũ nakosete. O na nambĩĩie kwĩwʼa novetwe nĩ mĩao ĩla asyai makwa mambĩkĩĩe vamwe na myolooto ya Kĩklĩsto, na nambĩĩie kwona maũndũ ma kĩ-veva ta wĩa mwingĩ. O na kau vai ĩvinda naaya nzika kana Yeova e kwʼo, ndyeewʼaa nĩ mũnyanyae.

Natavanasya tũmasaa tũnini vyũ nĩ kana ndikoneke ta navoie. O na naendaa ũtavanyʼa ndeyũmbanĩtye, na kwoou nĩnangʼangʼanaa kwambĩĩsya kana kũendeesya ũneenanyʼa. Nũndũ wa ũu, ndyaĩ na mosyao ũtavanyʼanĩ na ndyaĩ mũtanu, na kĩu kyatumie nĩendeea kũũmena. Neekũlasya, ‘Mũndũ atonya kũendeea kũtavanyʼa kyumwa kĩmwe kũthi kĩla kĩngĩ kana mwei ũmwe kũthi ũla ũngĩ ata?’

Yĩla navikisye myaka 17, neewie ndaendeea kũtavwʼa ũndũ ngwĩka. Kwoou nĩnoovie mĩio yakwa na nathamĩĩa Australia. Asyai makwa mayaatana moona ndyuma mũsyĩ. Nĩmamakie, ĩndĩ moonaa no ngũendeea kũmũthũkũma Yeova.

Navika Australia, ngwatanĩo yakwa na Yeova yeekie kũthũkĩĩa. Naendaa maũmbano mataĩla. Kĩu kyatumie nendeewʼa nĩ kũtindanyʼa na amũika ala, o takwa, matanĩaa kũthi ũmbano wĩoo ũmwe na ũũngĩ maithi ilavu kũnywʼa na kũsũnga. Natũnga kĩlĩko ĩtina, nĩnonaa kana nĩ ta nakinyĩtye kũũ kũmwe ũwʼonĩ na kũla kũngĩ maũndũnĩ ma nthĩ, ĩndĩ vai vamwe neewʼaa nĩ mwĩanĩe.

NĨNEEMANYĨISYE ŨNDŨ WA VATA NDASŨANĨAA NŨTONYEKA

Ĩtina wa myaka ĩlĩ ũu, nĩnakomanie na mwĩĩtu-a-asa wandethisye o na atesi. Twekalaa eĩtu-a-asa atano nyũmba ĩmwe, na nĩtwathokisye mũsyaĩĩsya wa mũthyũlũlũko na mũka, Tamara, mekale naitũ kyumwa kĩmwe. Tamara atindanasya naitũ tũiea ngewa na tũitheka yĩla mũũme ũendeee kũthĩnĩkĩa maũndũ ma kĩkundi. Kĩu nĩkyambendeeisye. Tamara aĩ na wĩnyivyo, na yaĩ laisi kũea ngewa nake. Nĩnasengʼie kwona kana, o na kau aĩ mũndũ wa kĩ-veva, nĩwatumaa tũtanĩa kũtindanyʼa nake.

Tamara aĩ mũthangaau mũno. Endete ũwʼo na ũtavanyʼa mũno, na kĩu kyatumaa ala me vakuvĩ nake menda kwĩyĩelekanyʼa nake. Nĩwatanĩaa kũmũnenga Yeova kĩla kĩseo vyũ, ĩndĩ nyie ndyaĩ mũtanu nũndũ ndyeekaa kyonthe kĩla ndonya ũtavanyʼanĩ. Nĩnakiitiwe mũno nĩ woni wake ĩũlũ wa ũtavanyʼa na ũtanu mwingĩ ũla waĩ nawʼo. Ngelekanyʼo yake yatumie nĩsũanĩa ũwʼo ũũ wa vata wĩ Maandĩkonĩ: Yeova endaa ithyonthe tũmũthũkũme “na mũyo,” na tũmũthũkũme ‘twinĩte’ na ũtanu.—Sav. 100:2.

NĨNAMBĨĨIE KWENDA ŨTAVANYʼA ĨNGĨ

Nĩnendaa kwĩthĩwa na ũtanu ta wa Tamara, ĩndĩ nĩneesĩ kana ndiwona ndekĩte moalyũku manene. Nĩnakuie ĩvinda yĩasa, ĩndĩ mũthya nĩnambĩĩie kwosa matambya o kavola kwa kavola. Kwa ngelekanyʼo, nĩnambĩĩie kwĩyũmbanĩsya ũtavanyʼa, na mavinda kwa mavinda nĩnoosaa ũvainia mũtetheesya. Kĩu nĩkyatumie wia wakwa ũoleka na nĩyĩĩkĩĩa mũnango. Na o ũndũ natũmĩie Mbivilia mũnango ũtavanyʼanĩ, nowʼo naendeeie kũũtanĩa mũnango. Ĩtina wa ĩvinda, nĩnambĩĩie kwosaa ũvainia mũtetheesya kĩla mwei.

Kĩu kyatumie nambĩĩa kũnyuva anyanya ala meekaa kyonthe kĩla matonya ũtavanyʼanĩ na matanĩaa kũmũthũkũma Yeova, ndeũsisya ũkũũ woo. Ngelekanyʼo yoo nĩyandetheeisye kũvĩtya mbee maũndũ ala ma vata na kwĩthĩwa na mũvango mũseo wa maũndũ ma kĩ-veva. O na nĩnambĩĩie kũtanĩa ũtavanyʼa mũnango, na mũthya natwʼĩka vainia wa kĩla ĩvinda. Yĩu nĩyo yaĩ ĩvinda ya mbee ĩtina wa myaka mingĩ kwĩwʼa nĩ mũtanu na nĩ mwĩanĩe nĩ kĩkundinĩ.

NĨNAKWATIE MŨTINDANYʼA VAINIA

Ĩtina wa mwaka ũmwe, nĩnakomanie na Alex, ũla waĩ na ngoo nzeo, wendete kwĩka angĩ nesa, na wamwendete Yeova vamwe na ũtavanyʼa. Ĩvinda yĩu aĩ mũtetheesya wa kĩkundi, na eethĩĩtwe e vainia kwa ĩvinda ya myaka thanthatũ. O na ĩngĩ, ve ĩvinda weetũmĩte kĩsionĩ kĩ na vata mũnene wa atavanyʼa nthĩ ya Malawi. E kũu, nĩwatindanasya na amisonalĩ na nĩmamwiĩe ngelekanyʼo nzeo, na mamwĩkĩa vinya aendeee kũvĩtya mbee maũndũ ma Ũsumbĩ.

Mwaka wa 2003 nĩtwatwaanie, na twaendeea na ũthũkũmi wa ĩvinda yonthe. Nĩtwĩmanyĩĩtye maũndũ maingĩ ma vata, na Yeova nũtũathimĩte mũno.

ŨVAINIA NĨWATŨETEIE MOATHIMO MAINGĨ

Mwaka wa 2009, nĩtwatũmiwe ta amisonalĩ nthĩ nini yĩ kĩthamanĩ kĩmwe kya Indonesia yĩtawa Timor-Leste. Twasengʼie, twatana, na no twalikilwe nĩ wia. Ĩtina wa myei ĩtano, nĩtwavikie taoni ĩla nene ya Timor-Leste yĩtawa Dili.

Maũndũ kũu maĩ kĩvathũkanyʼo vyũ. Yaĩ no nginya twĩkale ũndũ andũ ma kũu mekalaa, na tũimanyĩa kĩthĩo kyeũ, kĩthyomo, na malĩu ma kũu. Kaingĩ twĩ ũtavanyʼa twakomanaa na andũ ngya vyũ, mataasoma nesa, na makomanĩte na mathĩna maingĩ. Na nĩtwoonaa aingĩ me na malanga nũndũ wa kaũ na ũngʼendu ũla waĩ kwʼo, na nĩmatũlĩtwe ngoo nĩ maũndũ asu.a

Natanĩaa ũtavanyʼa mũno! Kwa ngelekanyʼo, ve ĩvinda nakomanie na kelĩtu ketawa Mariab kaĩ na myaka 13 na kekalaa kemakĩĩte. Inyia akwʼĩte myaka mĩvũthũ mĩvĩtu na kayonanangaa na ĩthe. Maria ndeesĩ kĩla wendaa kwĩka thayũnĩ, o ta syana mbingĩ sya ĩika yake. Nĩlilikana mũthenya ũmwe wambĩĩie kũĩa aingelesya ũndũ weewʼaa. Ĩndĩ ndyaeleawa ũndũ ũkũndavya nũndũ ndyeesĩ kĩthyomo kyoo nesa. Nĩnamũvoyie Yeova na namwĩsũva andetheesye kũmwĩkĩa vinya, na ĩndĩ nambĩĩa kũmũsomea maandĩko ma kũmũkiakisya. Myakanĩ mĩvũthũ ĩla yaatĩĩe, nĩnoonie ũndũ ũwʼo wavĩndũie mawoni, mwĩkĩĩle, na thayũ wake vyũ. Nĩwavatisiwe, na yu e na amanyĩwʼa make ma Mbivilia. Yu Maria e na mũsyĩ mũnene wa andũ ma Yeova na nĩwĩwʼaa endetwe.

Yeova nũathimĩte wĩa wake nthĩ ya Timor- Leste. O na kau atavanyʼa aingĩ mavatisĩtwe ĩvindanĩ ya myaka ĩkũmi mĩvĩtu, aingĩ nĩ mavainia, atetheesya ma ikundi, kana atumĩa. Angĩ mathũkũmaa ovisinĩ wa ũalyũli, kũla matetheeasya kũalyũla syĩndũ na ithyomo sya kũu. Nĩnatanĩaa kwĩwʼa ana-a-asa na eĩtu-a-asa mayina maũmbanonĩ, kwona me na mothyũ makenu, na kwona ũndũ maendeee nesa kĩ-veva.

NĨNĨKWATĨTE ŨTANU MWINGĨ NDAWONA VANGĨ

Kwĩkala Timor-Leste kwaĩ kĩvathũkanyʼo vyũ na Australia, ĩndĩ ũtanu ũla nakwatie kũu ndiwona vangĩ. Mavinda amwe twalikaa kamatatũ kausĩe andũ maumĩte sokonĩ makuĩte makũyũ momĩthye na makunia ma mboka. Mavinda angĩ, tweemanyĩasya Mbivilia na mũndũ twĩ kasũmbanĩ kavyũ mũno, kate na simiti, na ke na ngũkũ iũsembanga kũu. Ĩndĩ o na vailye ũu, neetavasya, ‘Kĩĩ nĩkyo ngwenda!’

Natũnga kĩlĩko ĩtina nĩndanaa kũmanya kana asyai makwa nĩmeekie kĩla matonya mamanyĩsya myolooto ya Yeova na mandwʼĩĩka, o na ĩvinda yĩla nĩ wa mũika ngwatanĩo yakwa na Yeova ĩtaĩ nzeo. Nĩnonete ũwʼo wa ĩandĩko ya Nthimo 22:6 thayũnĩ wakwa. Mami na Tata nĩmatanĩaa kwona nĩ na Alex tũitũmĩwa nĩ Yeova. Kuma 2016, twĩthĩĩtwe tũithyũlũlũka kĩsio kya ovisi wa ũvonge wa Australasia.

No nĩsengʼaa nasũanĩa kana tene noonaa kũtavanyʼa kwĩ kĩvalũa. Yu nĩnendete kũtavanyʼa! Na nĩnĩsĩte kũmanya o na kwaumĩla kyaũ, kũmũthũkũma Ngai na ngoo yonthe nokwʼo kũtonya kũndetee ũtanu wa wʼo. O na no nasye kana myaka 18 ĩla nĩthĩĩtwe ndimũthũkũma Yeova nĩ na Alex, nĩyo nĩthĩĩtwe nĩ mũtanu vyũ. Yu nĩngũelewa ũwʼo wa ndeto ii mũandĩki wa Savuli, Ndaviti, wamũtavisye Yeova: “Matane onthe ala mekwĩvitha nthĩnĩ waku, mokĩlasye mawasya mavinda onthe nũndũ wa kũtana . . . O na ala mendete syĩtwa yaku methĩwe na ũtanu nthĩnĩ waku.”—Sav. 5:11.