Onaa Nthembo ya Wovosyo yĩ ya Vata

1-2. Nthembo ya wovosyo nĩ kyaũ, na nĩkĩ twĩ na vata nayo?

YĨLA Atamu weekie naĩ, we na nzyawa syake nĩmaaisye mwanya wa kwĩkala tene na tene. Atamu ndaĩ na kĩtumi kĩseo kya kwĩka ĩvĩtyo yĩla weekie. Eekie naĩ na ngũlũ. Ĩndĩ nata nzyawa syake? Vai naĩ syaaĩka, o na tisyo syatumie eka naĩ. (Alo. 5:12, 14) Vo ve ũndũ waaĩle kwĩkwa nĩ kana nzyawa isu ivonokwʼe ũkombonĩ wa kĩkwʼũ ũla Atamu walikĩte? Ĩĩ, wĩ vo! Ĩvinda ĩkuvĩ ĩtina wa Atamu kũvĩtya, Yeova nĩwoonanisye kavola kwa kavola ũndũ wavangĩte kũvonokya nzyawa sya Atamu milioni mbingĩ kuma kĩumonĩ kya naĩ na kĩkwʼũ. (Mwa. 3:15) Na yĩla ĩvinda yake yavikie, nĩwatũmie Mwana wake kuma ĩtunĩ oke “kũnengane thayũ wake wĩthĩwe wovosyo kwondũ wa aingĩ.”—Mko. 10:45; Yoa. 6:51.

² Nthembo ya wovosyo nĩ kyaũ? Yĩla yatũmĩwa Maandĩkonĩ ma Kĩkiliki ma Kĩklĩsto, yĩthĩawa ĩyonanyʼa ndĩvi ĩla Yesũ waĩvĩie nĩ kana kĩla Atamu waaĩtye kĩtũngĩĩwe. (1 Ako. 15:22) Nĩkĩ twĩ na vata wa wovosyo? Nũndũ Mĩao ya Yeova yaĩtye mũndũ aaĩle kumya thayũ vandũ va thayũ nĩ kana ũsili wa katĩ ũatĩĩwe. (Kuma 21:23, 24) Atamu aaisye thayũ wake ũte na naĩ. O ta ũu, Yesũ aumisye thayũ wake ũte na naĩ nĩ kana ũsili wa Ngai wa katĩ ũatĩĩwe. (Alo. 5:17) Nũndũ wa ũu, Yesũ atwʼĩkie “Ĩthe wa Tene na Tene” kwa onthe ala maĩkĩĩaa nthembo ya wovosyo.—Isa. 9:6; Alo. 3:23, 24.

3. Kwosana na Yoana 14:31 na 15:13, nĩkĩ Yesũ weeyũmbanĩtye kumya thayũ wake ta nthembo?

³ Yesũ aumisye thayũ wake na ngenda nũndũ nũtwendete mũno na nĩwendete Ĩthe wake wa ĩtunĩ mũno. (Soma Yoana 14:31; 15:13.) Kĩu nĩkyo kyatumie atwʼa kwĩkala e mũĩkĩĩku nginya mũthya na aianĩsya kwenda kwa Ĩthe wake. Nake nĩwalũmanilye na ũtwi ũsu nginya kĩkwʼũ. Nũndũ wa ũu, Yeova akeanĩsya kĩeleelo kĩla waĩ nakyo ayũmba andũ na nthĩ. Ĩsomonĩ yĩĩ nĩtũkwona nĩkĩ Ngai waekie Yesũ athĩne mũno atanakwʼa. O na ĩngĩ, nĩtũkwona kwa ũkuvĩ ngelekanyʼo ya mũandĩki ũmwe wa Mbivilia woonaa nthembo ya wovosyo yĩ ya vata mũno. Na mũthya, nĩtũkwona ũndũ tũtonya kwonanyʼa kana nĩtwonaa nthembo ya wovosyo yĩ ya vata mũno, na kĩla kĩtonya kũtũtetheesya tũkonaa nthembo ĩsu Yeova na Yesũ manenganie yĩ ya vata mũno.

NĨKĨ NGAI WAEKIE YESŨ ATHĨNE?

4. Elesya ũndũ Yesũ wakwie.

⁴ Kwasũanĩa thĩna ũla Yesũ woonie mũthenyanĩ wake wa mũthya. O na kau aĩ atonya kwĩtya nguthu sya alaĩka imũsũvĩe, nĩwaekie akwatwa nĩ asikalĩ Alomi, ala mamũvũie mũno mate na tei. (Mt. 26:52-54; Yoa. 18:3; 19:1) Mũtalisa ũla matũmĩie kũmũvũa watembũangie mwĩĩ wake mũno. Ĩtina wa ũu, o na kau mũongo wake nĩwauaa, moosie kĩtingʼĩ kĩito mamwilĩĩla. Nĩwambĩĩie kũkusĩthya mũtĩ ũsu aendete vala ũkũaĩwa, ĩndĩ atanaendanga mũno, mũvĩti ũmwe nĩwalasimĩthiwʼe amũkuĩe. (Mt. 27:32) Avika vala asikalĩ mamũtwaĩte, nĩmaathĩĩie moko make na nyaaĩ syake mũtĩnĩ ũsu. Yĩla mũtĩ wookĩlilwʼe, ũito wa mwĩĩ wake watumie kũla watonyetwe na mĩsumaa kũtembũka. Kwa kũna visa anyanyae maikwatwa nĩ kyeva kingĩ na inyia ayĩĩa mũno, ĩndĩ atongoi ma Kĩyuti makwetye kũmũthekeea. (Luka 23:32-38; Yoa. 19:25) Yesũ aendeeie kũthĩna mũno ĩsaa ĩtina wa yĩngĩ. Mũthya ngoo yake na mavũi make nĩmanoie, na weethĩa yu o na kũveva nĩ thĩna. Ndatĩkanĩ yake ya mũthya, nĩwavoyie mboya ya mũthya. Ĩtina wa ũu, nĩwakumanisye mũtwe wake na akwʼa. (Mko. 15:37; Luka 23:46; Yoa. 10:17, 18; 19:30) Mwa kĩu kyaĩ kĩkwʼũ kĩ woo na kĩ nthoni ta kĩ!

5. Nĩ kyaũ kyathĩnasya Yesũ mũno kwĩ ũndũ ũkwĩsa kũawa?

⁵ Ĩndĩ ve kĩndũ kĩmwe kyatumaa Yesũ athĩnĩka mũnango kwĩ ũndũ ũkwĩsa kũawa. Athĩnĩkaa mũno asũanĩa kĩla kĩutuma andũ masya nĩwaĩlĩte kũawa. Andũ maasya kana we nĩ mũumi wa Ngai, na nĩweesĩ kana mũndũ ũilye ũu ndethĩawa anengete Ngai ndaĩa kana ĩsyĩtwa yake. (Mt. 26:64-66) Kũsũanĩa kana andũ memwilĩĩla ũvũngũ ũsu kwatumie anyamaa mũno nginya weethĩa eĩkũlya ta keka Ĩthe nũmũvetangĩa nthoni isu. (Mt. 26:38, 39, 42) Nĩkĩ Yeova waekie Mwana wake mwendwa athĩne ũu na aikwʼa? Ekai twone itumi itatũ.

6. Nĩkĩ Ngai waekie Yesũ athĩĩwe mũtĩnĩ wa mathĩna?

⁶ Kĩtumi kya mbee, Yeova aekie Yesũ athĩĩwe mũtĩnĩ nĩ kana athasye Ayuti kuma kĩumonĩ. (Aka. 3:10, 13) Ayuti maĩ na kĩumo nũndũ nĩmeĩavĩte makasya nĩmeũkwata Mĩao ya Ngai, ĩndĩ mayaamĩkwata. Na eka kĩumo kĩu, maĩ ũkombonĩ wa kĩkwʼũ nũndũ maĩ nzyawa sya Atamu. (Alo. 5:12) Mĩao ĩla Ngai wanengete mbaĩ ya Isilaeli yaĩtye kana mũndũ eeka naĩ yaĩle kĩkwʼũ, aaĩlĩte kũawa. Akwʼa, mavinda amwe mwĩĩ wake nĩwasũawʼa mũtĩnĩ.b (Kũt. 21:22, 23; 27:26) Kwoou yĩla Yesũ waathĩĩiwe mũtĩnĩ, atumie Ayuti makwata mwanya wa kũtetheka nĩ nthembo yake o na kau nĩmamũleete.

7. Nĩ ũndũ wĩva wa kelĩ watumie Ngai aeka Mwana wake athĩne?

⁷ Ekai twone ũndũ wa kelĩ ũla watumie Ngai aeka Mwana wake athĩne. Akwete kũmũmanyĩsya kwondũ wa kĩanda kĩla ũkakwatĩĩa ta Mũthembi Mũnene. Yesũ nĩweeyoneie ũndũ kũmwĩwʼa Ngai kwĩ vinya yĩla mũndũ wĩ ĩtatwanĩ yũmũ mũno. Anyamaie mũno vyũ nginya avoya “na kĩĩo kĩnene na methoi” nĩ kana atetheewʼe. Nũndũ Yesũ nĩwanyamaie mũno wĩana ũu, nũtũeleawa nesa vyũ na ‘nũtonya kũtũtetheesya yĩla tũũtatwa.’ Tũtũngaa mũvea mwingĩ ta kĩ nũndũ wa kwona Yeova atũnyuvĩie Mũthembi Mũnene ũla ũtonya “kũtwĩwʼĩa tei mawonzunĩ maitũ”!—Aevl. 2:17, 18; 4:14-16; 5:7-10.

8. Ũndũ wa katatũ ũla watumie Ngai aeka Yesũ atatwe mũno nĩ wĩva?

⁸ Kĩtumi kya katatũ, Yeova aekie Yesũ athĩnwʼe mũno vyũ nĩ kana ĩkũlyo yĩĩ yĩkwate ũsũngĩo: Yĩla mũndũ watatwa mũno vyũ, no aendeee kũlũmanyʼa na Yeova? Satani aasya vaitonyeka! Aasya tũmũthũkũmaa Ngai no kana atũtethye. Na we aĩkĩĩaa kana tũimwendete Yeova, o tondũ ĩthe witũ Atamu ũtamwendete. (Yovu 1:9-11; 2:4, 5) Ĩndĩ Yeova nĩweesĩ nesa ki kana Mwana wake, Yesũ, nũkũlũmanyʼa nake, na kwoou nĩwamũekie atatwe vyũ ũndũ vatonyeka. Yesũ nĩwalũmilye wĩanĩu wake na oonanyʼa ũtheinĩ kana Satani nĩ mũkengani.

MŨANDĨKI WA MBIVILIA WOONAA NTHEMBO YA WOVOSYO YĨ YA VATA MŨNO

9. Mũtũmwa Yoana atũtiĩe ngelekanyʼo yĩva?

⁹ Mũĩkĩĩo wa Aklĩsto aingĩ nĩwĩkĩĩtwe vinya nĩ ũmanyĩsyo wa wovosyo. Nũtumĩte maendeea kũtavanyʼa o na mavĩngwa, o na ũkatuma momĩĩsya matatwa ma mĩthemba yonthe thayũnĩ woo wʼonthe. Kwasũanĩa ĩũlũ wa mũtũmwa Yoana. Nĩvatonyeka akethĩwa atavanisye ũwʼo ĩũlũ wa Klĩsto na wovosyo kwa myaka mbee wa 60. Na aangĩe myaka 100, Ũsumbĩ wa Lomi wavangie kana we nĩ mũmaitha mũnene mũno na wamũtwaa kyovonĩ kĩthamanĩ kya Vatimo. Waasya ĩvĩtyo yake nĩ yĩva? “Kũneena ĩũlũ wa Ngai na kumya ũkũsĩ ĩũlũ wa Yesũ.” (Ũvu. 1:9) Ĩsu nĩ ngelekanyʼo nzeo vyũ ya mũndũ waĩ na mũĩkĩĩo na wũmĩĩsyo, kana ti wʼo?

10. Mavuku ala Yoana waandĩkie monanĩtye ata kana nĩwoonaa wovosyo wĩ wa vata mũno?

¹⁰ Mavukunĩ ma Mbivilia ala Yoana waandĩkie, nũwetete kaingĩ ũndũ wendete Yesũ mũno, na ũndũ woonaa nthembo ya wovosyo yĩ ya vata mũno. Awetete wovosyo kana moseo ma wovosyo mavinda mbee wa 100. Kwa ngelekanyʼo, aandĩkie: “Ethĩwa mũndũ nĩweeka naĩ, twĩ na mũtetheesya ũla wĩ vamwe na Asa, nake nĩ Yesũ Klĩsto, na nĩ mũlũngalu.” (1 Yoa. 2:1, 2) O na ĩngĩ, mavuku ala waandĩkie makindĩlĩĩle vata wa “kumya ũkũsĩ ĩũlũ wa Yesũ.” (Ũvu. 19:10) Vate nzika, Yoana oonaa wovosyo wĩ wa vata mũno. Tũtonya kwonanyʼa ata kana o naitũ nĩtwonaa wĩ wa vata mũno?

ŨTONYA KWONANYʼA ATA KANA NĨWONAA NTHEMBO YA WOVOSYO YĨ YA VATA?

11. Nĩ kyaũ kĩtonya kũtũtetheesya tũngʼangʼane vyũ tũikeke naĩ?

¹¹ Ngʼangʼana vyũ ndũkeke naĩ. Ethĩwa nĩtwonaa nthembo ya wovosyo yĩ ya vata vyũ, tũikethĩwa na yĩsilya ta yĩĩ yĩla twatatwa: ‘Ndi na vata wa kũngʼangʼana mũno ndikeke naĩ. No nĩke naĩ na ndyĩsa kwĩtya ũekeo ĩtina.’ Vandũ va ũu, yĩla twatatwa tũkaasya: ‘Aiee! Ndonya kwĩka naĩ ĩno ata na nĩwʼo Yeova na Yesũ manthĩnĩkĩĩte mũno wĩana?’ Na nũndũ wa ũu, tũkamwĩkaĩlaa Yeova atũnenge vinya, tũkyasya: ‘Ndũkandeke nĩlike ĩtatwanĩ.’—Mt. 6:13.

12. Tũtonya kũatĩĩa ata ũtao ũla wĩ 1 Yoana 3:16-18?

¹² Mende ana-a-asa na eĩtu-a-asa maku. Yĩla twamenda, twĩthĩawa tũyonanyʼa nĩtwonaa nthembo ya wovosyo yĩ ya vata. Ata? O ũndũ Yesũ wakwie kwondũ witũ, nowʼo wakwie kwondũ woo. Na kwoou ethĩwa nĩwakwie kwondũ woo na ngenda, onaa me ma vata mũno vyũ. (Soma 1 Yoana 3:16-18.) Twonanasya nĩtwendete ana-a-asa na eĩtu-a-asa maitũ kwa kũmakua nesa. (Aev. 4:29, 31–5:2) Kwa ngelekanyʼo, nĩtũmatetheeasya yĩla mawaa kana makwatwa nĩ matatwa manene, ta ithingitho sya nthĩ. Ĩndĩ nata yĩla Mũklĩsto mũna weeka ũndũ kana waweta ũndũ watũthatya?

13. Nĩkĩ twaĩle kũekeaa ala angĩ?

¹³ Mavinda amwe we nũemawa nĩ kũekea mwana-a-asa kana mwĩĩtu-a-asa? (Ali. 19:18) Ethĩwa mavinda amwe nũemawa, atĩĩa ũtao ũũ: “Endeeai kũmĩanĩsya na kũekeanĩa na ngenda ethĩwa mũndũ o na wĩva e na ũndũ na ũngĩ. Na o tondũ Yeova wamũekeie inywʼĩ na ngenda, o nenyu no nginya mwĩke oou.” (Ako. 3:13) Kĩla ĩvinda twaekea mwana-a-asa kana mwĩĩtu-a-asa, twĩthĩawa twoonyʼa Ĩthe witũ wa ĩtunĩ kana nĩtwonaa wovosyo wĩ wa vata vyũ. Tũtonya kwĩka ata twonae mũthĩnzĩo ũũ Ngai watũnengie wĩ wa vata mũno?

ŨTONYA KWĨKA ATA WONAE NTHEMBO YA WOVOSYO YĨ YA VATA MŨNO?

14. Nĩ ũndũ ũmwe wĩva ũtonya kũtũtetheesya twonae nthembo ya wovosyo yĩ ya vata mũnango?

¹⁴ Mũtũngĩe Yeova mũvea nũndũ wa nthembo ya wovosyo. Mwĩĩtu-a-asa wĩ na myaka 83 wa kuma India wĩtawa Joanna, aĩtye, “Nonaa wĩ ũndũ wa vata kũweta wovosyo kĩla mũthenya mboyanĩ syakwa na kũmũtũngĩa Yeova mũvea nũndũ wawʼo.” Yĩla ũũmũvoya, mũtavasye nesa mavĩtyo ala wĩkie mũthenya ũsu na ũimwĩsũva akũekee. Ĩndĩ ethĩwa nĩwĩkĩte naĩ ngito, nĩwaĩlĩte kwosa ĩtambya yĩngĩ ya kũneena na atumĩa makũtetheesye. Makakwĩthukĩĩsya nesa na maikũnenga ũtao mũseo umĩte Ndetonĩ yake. O na makavoya vamwe naku na maimũkũlya Yeova aendeee kũtũmĩa nthembo ya wovosyo ‘nĩ kana ũvowʼe,’ kana kwa ndeto ingĩ, wĩthĩwe na ngwatanĩo nzeo nake ĩngĩ.—Yak. 5:14-16.

15. Nĩkĩ twaĩlĩte kwosa ĩvinda twĩmanyĩsye ĩũlũ wa nthembo ya wovosyo na tũimĩvindĩĩsya?

¹⁵ Vindĩĩsya ĩũlũ wa nthembo ya wovosyo. Mwĩĩtu-a-asa wĩ na ũkũũ wa myaka 73 wĩtawa Rajamani, easya, “Yĩla nasoma ũndũ Yesũ wathĩnie, nĩnĩkelemasya methoi.” O naku no wĩwʼe take yĩla wasoma ũndũ Mwana wa Ngai wathĩnie. Ĩndĩ o ũndũ wavindĩĩsya ĩũlũ wa nthembo ĩla Yesũ waumisye, nowʼo ũkewʼaa wamwenda e na Ĩthe wake mũnango. Wĩona ata ũkosa ĩvinda wĩmanyĩsye mũnango ĩũlũ wa nthembo ya wovosyo na ũimĩvindĩĩsya?

16. Kũmanyĩsya angĩ ĩũlũ wa nthembo ya wovosyo kũtũtethasya ata? (Sisya visa ĩthangũnĩ ya mbee vyũ.)

¹⁶ Manyĩsya angĩ ĩũlũ wa nthembo ya wovosyo. Kũtavya angĩ ĩũlũ wa wovosyo kũtumaa tũwona wĩ wa vata. Na twĩ na syĩndũ nzeo vyũ tũtonya kũtũmĩa yĩla tũũtetheesya angĩ maelewe nĩkĩ Yesũ wakwie kwondũ witũ. Kwa ngelekanyʼo, no tũtũmĩe ĩsomo ya 4 ya mbulosua Ũvoo Mũseo Kuma kwa Ngai! Ĩsomo yĩu yĩ na kyongo, “Yesũ Klĩsto Nũũ?” Kana no tũtũmĩe kĩlungu kya 5 kya ĩvuku Mbivilia Ĩtũmanyĩasya Kyaũ? Kĩlungu kĩu kĩ na kyongo, “Wovosyo Nĩ Mũthĩnzĩo wa Vata Vyũ Kuma kwa Ngai.” Ũndũ ũngĩ ũtũtetheeasya kwona nthembo ya wovosyo yĩ ya vata mũno nĩ kũthi ũmbanonĩ wa kũlilikana kĩkwʼũ kya Yesũ kĩla mwaka, na kũthokya angĩ na kĩthito mombane vamwe naitũ ũmbanonĩ ũsu. Ĩsu nĩ ndaĩa nene mũno Yeova ũtũnengete ya kũmanyĩsya angĩ ĩũlũ wa Mwana wake!

17. Nĩkĩ nthembo ya wovosyo nĩyo mũthĩnzĩo ũla mũnene vyũ Ngai ũnengete andũ?

¹⁷ Vate nzika, twĩ na itumi nzeo sya kwonaa nthembo ya wovosyo yĩ ya vata mũno. Nũndũ wa wovosyo, no twĩthĩwe na ngwatanĩo nzeo na Yeova o na kau twĩ ene naĩ. Nũndũ wa wovosyo, mawĩa ma Ndevili makaanangwa vyũ. (1 Yoa. 3:8) Nũndũ wa wovosyo, Yeova akeanĩsya kĩeleelo kĩla waĩ nakyo ayũmba nthĩ. Nthĩ yonthe ĩkatwʼĩka nzaũ. Kĩla mũndũ ũkakomanaa nake, akeethĩwa amwendete Yeova na aimũthũkũma. Ekai ĩndĩ kĩla mũthenya tũmanthe nzĩa sya kwonanyʼa ũndũ twonaa nthembo ya wovosyo yĩ ya vata, ĩla nĩyo mũthĩnzĩo ũla mũnene vyũ Ngai ũnengete andũ!