No Ũlilikane?

Nũsomete nesa makaseti ma Mũsyaĩĩsya ma mwaka ũũ? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Nĩ ũĩkĩĩthyo wĩva tũkwataa yĩla twasoma kana Yeova e “wendo mwingĩ” na “tei” nthĩnĩ wa Yakovo 5:11?

Nĩtwĩsĩ kana nũndũ Yeova e tei, nĩwĩthĩawa na wendi wa kũtũekea twavĩtya. O na ĩngĩ, ĩandĩko ya Yakovo 5:11 yĩtũĩkĩĩthasya kana nũndũ nũtwendete, nĩwĩthĩawa eyũmbanĩtye atũtetheesye. Nũseo tũkekaa o take.—w21.01, ĩth. 21.

Nĩkĩ Yeova wavangĩthisye amwe methĩwe na ũkũmũ?

Eekie ũu nũndũ nũtwendete. Ũkũmũ ũtumaa athaithi make methĩwa na mũuo na ũituma maũndũ mekwa kwa mũvango. Ethĩwa kĩla ũmwe nthĩnĩ wa mũsyĩ nũkwataa mbau mũvango wa ũkũmũ, akamanyaa nũũ Yeova ũnyuvĩte atusae ũndũ maũndũ mekwĩkwa na ayĩĩkĩĩthya motwi ala meekwa nĩmeanĩwʼa.—w21.02, ĩth. 3.

Nĩkĩ Aklĩsto maĩle kwĩthĩwa me metho yĩla meũtũmĩa vulongulamu sya kũtũmanĩa mesengyi?

Twatwʼa kũtũmĩa vulongulamu isu twaĩle kũnyuva nesa ala tũũneena namo. Kwĩka ũu kwĩ vinya mũnango ethĩwa twĩ kĩkundinĩ kya anyanya kĩ na andũ aingĩ. (1 Tim. 5:13) O na ĩngĩ, nĩ laisi tũkalika mũisyonĩ wa kũnyaĩĩkya maũvoo mate maĩkĩĩthye, kana tũkambĩĩa kũtũmĩa ana-a-asa maitũ kũmantha mbesa.—w21.03, ĩth. 31.

Nĩ maũndũ amwe meva matumie Ngai aeka Yesũ athĩne na aikwʼa?

Mbee, yĩla Yesũ waathĩĩiwe mũtĩnĩ, atumie Ayuti mathawʼa kuma kĩumonĩ. (Aka. 3:10, 13) Kelĩ, Yeova akwete kũmũmanyĩsya kwondũ wa kĩanda kĩla ũkakwatĩĩa ta Mũthembi Mũnene. Na katatũ, yĩla Yesũ walũmilye wĩanĩu wake nginya kĩkwʼũ, oonanisye kana andũ no maendeee kũlũmanyʼa na Yeova o na matatwa mũno vyũ. (Yovu 1:9-11)—w21.04, ĩth. 16-17.

Ũtonya kwĩka ata yĩla andũ mateũkwatĩkana ũtavanyʼanĩ?

No ũtate kũmamantha masaa ala matonya kũkwatĩkana mũsyĩ. O na no ũtate kũtavanyʼa kũndũ kwĩ kĩvathũkanyʼo. Na no ũtate kũtũmĩa nzĩa syĩ kĩvathũkanyʼo sya kũtavanyʼa, ta kũandĩka valũa.—w21.05, ĩth. 15-16.

Mũtũmwa Vaulo oonanasya ata yĩla waisye: “Kwĩsĩla mĩao nĩnakwie maũndũnĩ ma mĩao”? (Aka. 2:19)

Mĩao ya Mose yatumaa andũ mona nesa mavĩtyo na nĩyo yatongoesye Isilaeli kwa Klĩsto. (Aka. 3:19, 24) Nĩyo yatumĩte Vaulo amwĩtĩkĩla Klĩsto. Kwoou ‘nĩwakwʼĩte maũndũnĩ ma mĩao’; yu ndoovetwe nĩyo ĩngĩ.—w21.06, ĩth. 31.

Nĩ kwa nzĩa yĩva Yeova wĩthĩĩtwe e ngelekanyʼo nzeo ya wũmĩĩsyo?

Yeova nĩwũmĩĩsye kwona ayanangĩwa ĩsyĩtwa, kwona ũsumbĩ wake mũnene ũivĩngwa, kwona syana imwe syake iimũlea, kwona Satani aitinda aneenete ũvũngũ, kwona athũkũmi make maithĩna, kwona aitaananwʼa na anyanyae yĩla makwʼa, kwona andũ maithĩnwʼa, na kwona nthĩ yake ĩyanangwa.—w21.07, ĩth. 9-12.

Yosevu atũtiĩe ngelekanyʼo yĩva nzeo ya wũmĩĩsyo?

Nĩwoomĩĩisye maũndũ mathũku mũno ala weekiwe nĩ ana-a-ĩthe. Ĩtina, nĩwasilĩilwe ũvũngũ na ekwʼa kolokolonĩ kwa myaka mingĩ Misili.—w21.08, ĩth. 12.

Ĩandĩko ya Akai 2:6-9, 20-22 yathanie kũthingithwʼa kwĩva kwa ngelekanyʼo?

Mbaĩ nileaa ũvoo wa Ũsumbĩ, ĩndĩ andũ aingĩ nĩmendeeawʼa nĩ ũwʼo. O na ĩngĩ, mbaĩ ikilye kũthingithwʼa ya mũthya iyanangwa.—w21.09, ĩth. 15-19.

Nĩkĩ tũtaĩle kũeka kũtavanyʼa?

Yeova nĩwonaa na nĩwendeeawʼa nĩ kĩthito kitũ. Twalea kũeka kana kũnoa, tũkakwata thayũ wa tene na tene.—w21.10, ĩth. 25-26.

Kĩlungu kya 19 kya Alivai kĩtonya kũtũtetheesya ata kũtũmĩa ũtao ũũ: “Ĩthĩwai atheu mwĩkalĩlenĩ wenyu wʼonthe”? (1 Vet. 1:15)

Mũsoa ũsu nũtonya kwĩthĩwa waumiwʼe nthĩnĩ wa Alivai 19:2. Kĩlungu kya 19 nĩkĩtũnengete ngelekanyʼo mbingĩ sya ũndũ tũtonya kũtũmĩa 1 Vetelo 1:15 thayũnĩ witũ.—w21.12, ĩth. 3-4.