1 | Mboya—‘Mwiĩei Kwĩmakĩa Kwenyu Kwʼonthe’

MBIVILIA YAĨTYE: “[Mwiĩei Ngai] kwĩmakĩa kwenyu kwʼonthe, nũndũ nũmũthĩnĩkĩaa.”—1 VETELO 5:7.

Ũndũ Kĩu Kyonanasya

Yeova Ngai atũthoketye tũmũtavye ũndũ o na wĩva ũla ũũtuma twĩwʼa twĩ aitavĩe kĩlĩkonĩ na ngoonĩ. (Savuli 55:22) Vai thĩna tũtaũweta mboyanĩ, wĩthĩwe nĩ mũnene mũno kana nĩ mũnini mũno. Yeova nũtũthĩnĩkĩaa, na kwoou ethĩwa ve ũndũ mũna tũkwona wĩ wa vata, o nake awonaa oou. Kũmũvoya nĩ kwa vata mũno nũndũ kũtũtetheeasya kũkwata mũuo wa kĩlĩko.—Avilivi 4:6, 7.

Ũndũ Kĩu Kĩtonya Kũtethya

Yĩla tũũngʼangʼana na mathĩna ma kĩlĩko, no twĩwʼe ta twĩ ithyoka vyũ. Ti mavinda onthe andũ ala angĩ maeleawa nesa kĩla tũendeee kũngʼangʼana nakyo. (Nthimo 14:10) Ĩndĩ yĩla twamũvoya Ngai kuma ngoonĩ na twamũtavya ũndũ tũkwĩwʼa, mavinda onthe nũtwĩthukĩĩasya nesa na aitũelewa. Yeova nĩwĩthĩawa atwene, nĩwĩsĩ maũndũ onthe ala matũũmĩasya na ala tũngʼangʼanaa namo, na nĩwendaa tũmũelesye mboyanĩ kyonthe kĩla kĩũtũthĩnyʼa.—2 Mavinda 6:29, 30.

Kũneena na Yeova mboyanĩ kũtumaa twĩyĩĩkĩĩthya vyũ kana nũtũthĩnĩkĩaa. No twĩwʼe ũndũ mũandĩki wa Savuli weewie yĩla wamũvoyie Ngai ũũ: “Nĩwoonie thĩna wakwa: nĩwamanyie mathĩna ma ngoo yakwa.” (Savuli 31:7) O kũmanya kana Yeova nĩwĩthĩawa esĩ maũndũ ala tũendeee kũngʼangʼana namo no kũtũtetheesye mũno tũkaendeea kũmĩĩsya yĩla twakomana na maũndũ momũ. Ĩndĩ we ndekaa o kwona maũndũ ala meũtũthĩnyʼa. Nũeleawa nesa maũndũ ala tũendeee kũngʼangʼana namo kwĩ mũndũ o na wĩva, na nũtũtetheeasya kũkwata ũkiakisyo na ũtethyo Mbivilianĩ.

Ũndũ Mbivilia Ĩtetheesye Julian

Ũndũ Kĩũũyũ Kĩtumaa Nĩwʼa

“Nĩngʼangʼanaa na kĩũũyũ na ũwau ũngĩ ũtumaa nĩtinda nĩthĩnĩtwʼe nĩ mesilya mate maseo ala matumaa nĩkwatwa nĩ wia na ngatũngĩlĩĩla maũndũ mavinda maingĩ (OCD). Ngwatawa nĩ kĩũũyũ o na ndataĩĩe. Mavinda amwe wĩthĩaa o ndyĩwʼa nesa, ĩndĩ ĩtina wa kavinda kakuvĩ ndikwatwa nĩ kĩũũyũ kĩngĩ o na vate kĩtumi. Kĩu kĩkothaa kũngwata mũno mũno yĩla nĩ andũnĩ. Nĩthĩnĩkaa mũno ndisũanĩa ũndũ meũmbona.

“Ala mesĩ thĩna ũla nĩngʼangʼanaa nawʼo nĩmekaa kyonthe kĩla matonya mandetheesye. No nasye mavinda amwe mandavasya maũndũ mateũndethya. Ĩndĩ nĩndũngaa mũvea kwona mayĩkĩa kĩthito mandetheesye.

“Mavinda amwe, mathĩna asu matumaa nĩwʼa ve vinya kũvoya. Nĩthĩawa naĩlĩte kwĩkĩa kĩthito kingĩ nĩtũnge kĩlĩko vamwe na ndineena na Yeova mboyanĩ. Kĩlĩko kyakwa kĩsũanĩaa maũndũ maingĩ savalĩ ũmwe nginya ũkethĩa mavinda maingĩ nĩĩwʼa nĩ mũvũavũanu. Yĩla ngwĩwʼa ndasiĩĩa mesilya makwa, nonaa ve vinya mũno kũelesya Yeova maũndũ ala ngũsũanĩa na ũndũ ngwĩwʼa.”

Ũndũ Mbivilia Ĩndethasya

“Nĩnĩĩmanyĩĩtye Mbivilianĩ kana ti nginya nĩvoye mboya ndaasa kana nĩatĩanĩsye ndeto nesa nĩ kana Ngai etĩkĩle mboya syakwa. Mavinda amwe, yĩla naemwa nĩ kũelesya ũndũ ngwĩwʼa, nĩkaa o kwasya: ‘Yeova, mwa ndetheesye.’ Ĩndĩ o na mavindanĩ ta asu, nĩnĩyoneaa Yeova aingelewa na ainenga kĩla ngwenda saanĩ ũsu. Eka mboya, nĩnĩmanthĩte ũtao na ũiiti kuma kwa matakĩtalĩ. Nĩ na ũtanu kwasya kana Mbivilia na ũtethyo ũla ngwatĩte kuma kwa matakĩtalĩ, nũndetheesye ngewʼa kavaa. O na kau nĩthĩawa naĩlĩte kwĩkĩa kĩthito kingĩ nĩkũlye Ĩthe wakwa wa ĩtunĩ andetheesye, nĩkaa ũu nũndũ ndi na nzika kana nũmbendete na nĩwendaa kũndetheesya.”