Nĩ Kyaũ kya Kwĩkwatwʼa Kĩtonya Kũũtethya?

O tondũ ilungu ila ingĩ syonanĩtye, andũ nĩmatatĩte kũmantha kĩla kĩkamatethya kwa kwĩkwatya ĩvuso, kĩsomo, ũthwii, na kwa kũtata methĩwe andũ aseo. Ĩndĩ kwĩkwatya maũndũ asu no ũndũ ũmwe na kũthi vandũ ũtũmĩĩte mevu nthũku. Ũu nĩ kwasya vai kĩndũ kĩtonya ũkũtetheesya wĩtanĩa thayũ ĩvinda yũkĩte? Aiee!

ŨLA ŨTONYA KŨTŨTETHEESYA NESA

Yĩla tũkwĩka motwi, tũkothaa kũmantha ũtao kwa mũndũ mũkũũ kwĩ ithyĩ na mũĩ kwĩ ithyĩ. O ta ũu, ũla ũtonya kũtũtetheesya twĩtanĩa thayũ ĩvinda yũkĩte nĩ mũkũũ kwĩ ithyĩ na mũĩ kwĩ ithyĩ na vaasa. No tũsome ũtao wake ĩvukunĩ yĩtawa Mbivilia, yĩla yambĩĩie kũandĩkwa myaka ta 3,500 mĩvĩtu.

Nĩkĩ ũtonya kũĩkĩĩa Mbivilia? Nũndũ Mũandĩkĩthya wayo nĩwe mũkũũ vyũ na mũĩ vyũ kwĩ onthe. Eĩtwe nĩ “mũtumĩa wa matukũ,” na kana nĩ wa “kuma tene na tene kũvika tene na tene.” (Ndanieli 7:9; Savuli 90:2) Nĩwe “watwʼĩkĩthisye matu, Ngai ũla watwʼĩkĩthisye nthĩ na kũmyũmba.” (Isaia 45:18) Nake nũtũtavĩtye kana etawa Yeova.—Savuli 83:18.

Nũndũ Mbivilia yaandĩkĩthiwʼe nĩ Mũmbi wa andũ onthe, ndyũkĩlasya kĩthĩo kĩmwe ĩũlũ wa kĩngĩ kana ũko ũmwe wa andũ ĩũlũ wa ũngĩ. Ũtao ũla wĩ Mbivilianĩ ndwĩsaa kũkũa, na nũtethasya andũ ma nthĩ syonthe. Vai ĩvuku yĩngĩ yĩalyũlĩtwe na ithyomo mbingĩ ta Mbivilia kana yĩnyaĩĩkĩtwʼe mũno tayo.a Nũndũ wa ũu, andũ kuma kĩla vandũ no mamĩsome na makamĩelewa, na no ĩmatetheesye. O na ĩ Mbivilia mbene nĩkwete mbau ndeto isu nũndũ yaĩtye:

“Ngai nde kyende, ĩndĩ mbaĩnĩ syonthe mũndũ ũla ũmũkĩaa na wĩkaa ũla waĩle nĩwĩtĩkĩlawa nĩwe.”—MEKO MA ATŨMWA 10:34, 35.

O tondũ mũsyai wendete syana syake ũitaaa, Yeova Ngai nĩ Asa witũ ũtwendete na kwoou nũtũtaaa atũmĩĩte Ndeto yake, Mbivilia. (2 Timotheo 3:16) No ũĩkĩĩe vyũ Ndeto yake, na kĩtumi nũndũ nĩwe watũmbie na nĩwĩsĩ kĩla kĩtonya kũtũuna.

ŨTAO WA MBIVILIA NĨ WA KWĨKWATWʼA

No twĩthĩwe na mũĩkĩĩo kana Mbivilia no ĩtũnenge wĩkwatyo wa kũtanĩa thayũ ĩvinda yũkĩte nũndũ ta myaka 2,000 mĩvĩtu, nĩyathanie ĩteũvĩtya maũndũ ala me kwʼo na mĩkalĩle ya andũ ũmũnthĩ.

MAŨNDŨ ALA MATHANIWE

“Mbaĩ ĩkookĩlĩla mbaĩ na ũsumbĩ ũkookĩlĩla ũsumbĩ. Kũkeethĩwa ithingitho nene sya nthĩ, na kũkeethĩwa ũnyivu wa lĩu kũũ na kũũ na mowau ma kũkwatanwʼa.”—Luka 21:10, 11.

MĨKALĨLE ĨLA YATHANIWE

“Mĩthenyanĩ ya mũminũkĩlyo kũkeethĩwa mavinda ma mũisyo na momũ. Nũndũ andũ makeethĩwa makĩyenda ene, makyenda mbesa, me na mĩyono, me na mĩngʼathĩlĩĩlyo, aumani, matewʼaa asyai, mate mũvea, mate aĩkĩĩku, mate na wendo, mate na wĩwʼano, asukani, matesiĩĩaa, ai, matendete ũseo, avũnyanĩi, me na ngũlũ, me na mĩtũlyo, endi ma motanu ma nthĩ vandũ va kũmwenda Ngai.”—2 TIMOTHEO 3:1-4.

Ũtonya kwasya ata wasũanĩa ũndũ kĩu Mbivilia yathanie tene wĩana ũu kĩanĩĩte nesa? Vate nzika, ndũlea kwĩtĩkĩlana na Leung kuma Hong Kong, ũla waĩtye: “Mawathani ma Mbivilia maandĩkiwe tene mũno. Vayaĩ vatonyeka mũndũ akathana maũndũ asu ateũvĩtya. No nginya ũla waveveee Mbivilia akethĩwa e mũĩ kwĩ ithyĩ na vaasa.”

Ve maũndũ maana maingĩ Mbivilia yathanie na meanĩa.b Kĩu kĩĩkĩĩthasya vyũ kana Mbivilia nĩ Ndeto ya Ngai. Yeova aĩtye ũũ: “Ninyie Ngai, na vati ũngĩ takwa; ngĩtavanʼya mũminũkĩlyo kuma mwambĩlĩlyonĩ.” (Isaia 46:9, 10) Kwoou wĩ na kĩtumi kĩseo kya kũĩkĩĩa maũndũ ala Mbivilia yathanĩte ĩũlũ wa ĩvinda yũkĩte.

ŨTAO ŨTONYA KŨŨTETHYA YU NA TENE NA TENE

Waatĩĩa ũtao ũla wĩ Maandĩkonĩ Matheu, nũtethekaa. Kwoona ngelekanyʼo ii iatĩĩe.

WONI WAĨLE ĨŨLŨ WA MBESA NA WĨA

“Ũvĩ ũmwe wusĩe, vamwe na ũuu, wĩ kavaa kwĩ mbĩ ilĩ susĩe wĩa na kũsembanʼya na kĩseve.”—MŨTAVANʼYA 4:6.

MŨSYĨ WĨ NA ŨTANU

“Kĩla ũmwe wenyu no nginya ende kĩveti kyake o ũndũ wĩyendete mwene; nakyo kĩveti kyaĩle kũmũnenga mũũme wakyo ndaĩa nene.”—AEVESO 5:33.

KWĨKALANYʼA NESA NA ALA ANGĨ

“Eka ũthatu, na tia ũthilĩku: ndũkenyamasye, nĩkwʼo kũtumaa naĩ yĩkwa.”—SAVULI 37:8.

Ũtao wa Mbivilia no ũũtethye yu tũi na ũkatuma ũtanĩa thayũ ĩvinda yũkĩte. Mbivilianĩ Ngai nũtwathĩte moseo maingĩ ta aa:

KWĨKALA KWĨ MŨUO

“Makeetanʼya mũuonĩ mwingĩ.”—SAVULI 37:11.

KŨKWATA NYŨMBA NA LĨU WĨANĨTYE

“Makaaka nyũmba, na kũtũa nthĩnĩ wasyo; na makavanda mĩũnda ya mĩsavivũ, na makaya ũsyao wayo.”—ISAIA 65:21.

KWĨKALA KŨTE MOWAU KANA KĨKWʼŨ

“Kĩkwʼũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo.”—ŨVUANYʼO 21:4.

Waĩle kwĩka ata nĩ kana wĩona maũndũ asu maseo? Soma kĩlungu kĩla kĩatĩĩe wone.

a Wenda kũkwata ũvoo mwingangĩ ĩũlũ wa ũndũ Mbivilia ĩalyũlĩtwe na ĩkanyaĩĩkwʼa, lika nthĩnĩ wa www.jw.org/kam na ũisisya ungu wa MOMANYĨSYO MA MBIVILIA > ISITOLI NA MBIVILIA.

b Wenda kũkwata ũvoo mwingangĩ, sisya kĩlungu kya 9 kya ĩvuku Biblia—Neno la Mungu au la Binadamu? yĩla yumĩthĩtwʼe nĩ Ngũsĩ sya Yeova. No ũyĩkwate nthĩnĩ wa www.jw.org/sw. Sisya ungu wa MAKTABA > VITABU NA BROSHUA.