Maũndũ Mathũku Nĩmekĩkaa Ĩvinda ya Kaũ
Maũndũ ta kaũ na ithokoo nĩ amwe katĩ wa maũndũ ala maũmĩasya andũ mũno. Asikalĩ na laiaa ala maaĩkala kũndũ kwĩ kaũ nĩmo mesĩ nesa maũndũ maingĩ mathũku ala mekĩkaa ĩvindanĩ yĩu.
ASIKALĨ
“Yĩla wĩ kaũnĩ, nĩwonaa maũndũ mathũku kĩla vandũ, ta andũ kũawa kana kũũmĩwʼa mũno. Mũndũ ndesaa kwĩwʼa e mũsũvĩĩku.”—Gary, Britain.
“Nĩnaathiwe na kĩsasi mũongo na ũthyũ, o na nĩnoonie andũ aingĩ mayũawa. Amwe katĩ woo maĩ syana na andũ akũũ. Kaũ ũtumaa mũndũ omya ngoo vyũ.”—Wilmar, Colombia.
“Yĩla mũndũ waathwa e vakuvĩ naku, ũndũ ũsu ndumaa kĩlĩkonĩ. Ũtindĩaa kwona kĩlĩkonĩ visa wa mũndũ ũsu na kwĩwʼa wasya ũla waumisye. Ndwĩsaa kũlwa nĩwe o na ĩndĩĩ.”—Zafirah, Amelika.
LAIAA
“Neewʼaa ta ndakesa kwĩthĩwa na ũtanu ĩngĩ. Nĩnakĩaa kũkwʼa, o na noonaa andũ makwa ma mũsyĩ na anyanyawa ta matonya kũawa.”—Oleksandra, Ukraine.
“Nĩtwakĩaa mũno tũyona ta tũtonya kũathwa nĩ isasi sya kaũ ũla waendeee o vau vakuvĩ, nũndũ yaĩ no nginya twolye lainĩ wa kwosa lĩu kuma saa 8:00 sya ũtukũ nginya saa 5:00 sya ũtukũ.”—Daler, Tajikistan.
“Asyai makwa nĩmakwie nũndũ wa kaũ. Natiiwe nde na mũndũ o na ũmwe ũtonya kũnzũvĩa kana kũngiakisya.”—Marie, Rwanda.
O na kũtwʼĩka andũ asu twaweta nĩmakwatiwe nĩ maũndũ mathũku mũno nũndũ wa kaũ, nĩmethĩĩtwe na mũuo. O na eka ũu, mai na nzika kana o mĩtũkĩ kaũ na ithokoo nikũthela. Ĩkaseti yĩĩ ya Mũsyaĩĩsya nĩyĩũtũmĩa Mbivilia kũelesya ũndũ kĩu kĩkekĩka.