Nĩkĩ Yesũ Wonaa Ĩsyĩtwa ya Yeova yĩ ya Vata Mũno?

1-2. (a) Yesũ eekie ata ũtukũ wa mũthya atanoawa? (b) Twĩneenea makũlyo meva ĩsomonĩ yĩĩ?

TWAĨ Wakana ĩ ya wĩoo, matukũ 14, mwei wa Nisani, mwaka wa 33 ĩtina wa Klĩsto, na Yesũ akilyĩ kũvũnyanĩwa, kũsilĩlwa, kũthekeewa, kũthĩnwʼa, na kũawa. Aĩ anamina kũya kyaũya kya mwanya e nyũmbanĩ ya ĩũlũ na atũmwa make aĩkĩĩku. Ĩtina wa kyaũya kĩu, nĩwatavisye atũmwa make ndeto sya mũthya ila syamekĩie vinya. Na kavinda kakuvĩ matanamba kuma nyũmbanĩ ĩsu ya ĩũlũ, Yesũ nĩwaumisye mboya ya mwanya mũno. Na no tũmĩsome nthĩnĩ wa Yoana kĩlungu kya 17.

² Yo mboya ĩla Yesũ waumisye yĩonanyʼa nĩ kyaũ wathĩnĩkĩaa mũno ĩvinda yĩu? Na nĩ kyaũ woonaa kĩ kya vata ĩvinda yonthe ya ũtavanyʼa wake kũũ ĩũlũ wa nthĩ? Ekai tũneenee makũlyo asu.

“NĨNĨMAMANYĨTHĨTYE ĨSYĨTWA YAKU”

3. Yesũ awetie kyaũ ĩũlũ wa ĩsyĩtwa ya Yeova, na we oonanasya ata? (Yoana 17:​6, 26)

³ Yesũ avoyie ũũ: “Nĩnĩmamanyĩthĩtye ĩsyĩtwa yaku.” Oonaa ũndũ ũsu wĩ wa vata mũno kwake nũndũ awetie mavinda elĩ kana nĩwamanyĩthĩtye amanyĩwʼa make ĩsyĩtwa ya Yeova. (Soma Yoana 17:​6, 26.) We oonanasya ata? Nĩwĩthĩwa amatavasya ĩũlũ wa ĩsyĩtwa matayĩsĩ? Amanyĩwʼa ma Yesũ maĩ Ayuti, na kwoou nĩmeesĩ kana ĩsyĩtwa ya Ngai nĩ Yeova. Ĩsyĩtwa yĩu yĩkwatĩkanaa Maandĩkonĩ ma Kĩevelania mavinda ta 7,000. Kwoou Yesũ ndesa kwĩthĩwa awetaa ũndũ Ngai wĩtawa, vandũ va ũu, amamanyĩasya kĩla ĩsyĩtwa yĩu yonanasya. Nĩwatetheeisye amanyĩwʼa make mamũmanye Yeova nesanga, na ũu nĩ kwasya, nĩwamamanyĩisye ieleelo syake, maũndũ ala weekĩte, na nguma syake. Na vai mũndũ ũngĩ waĩ atonya kwĩka ũu nesa eka we nũndũ nĩwe ũmwĩsĩ Yeova nesa vyũ.

4-5. (a) Nĩ ngelekanyʼo yĩva tũtonya kũtũmĩa kũelesya kĩla kĩtonya kũtuma twona ĩsyĩtwa ya mũndũ mũna yĩ ya vata mũnango? (b) Nĩ kyaũ kyatetheeisye amanyĩwʼa ma Yesũ kwonaa ĩsyĩtwa ya Yeova yĩ ya vata mũnango?

⁴ Kwasũanĩa ngelekanyʼo ĩno: Twasye kĩkundinĩ kyenyu ve mũtumĩa wa kĩkundi wĩtawa David wĩthĩawa e ndakĩtalĩ wa kũthĩnza awau. Wĩthĩĩtwe wĩsĩ mwana-a-asa ũsu kwa myaka mingĩ. Ĩndĩ mũthenya ũmwe ũiwaa mũno na ũyĩthĩa waĩle kũkwata ũiiti na mĩtũkĩ. Nũndũ wa ũu, ũisembwa sivitalĩnĩ ĩla mwana-a-asa ũsu ũthũkũmaa, na ĩndĩ aitũmĩa ũtũĩka wake kũtangĩĩa thayũ waku. We tyo wambĩĩe kwona ĩsyĩtwa ya mwana-a-asa ũsu yĩ ya vata mũnango kwaku? Vate nzika, yĩthĩwa yĩ ya vata! Kuma vau na kũendeea, ndwĩthĩwa ũimwona o ta mũtumĩa wa kĩkundi ũla wĩsĩ wĩtawa David tu, ĩndĩ wambĩĩa kũmwona ta ndakĩtalĩ ũla watangĩĩie thayũ waku.

⁵ O ta ũu, amanyĩwʼa ma Yesũ nĩmeesĩ ĩsyĩtwa ya Yeova. Ĩndĩ ũthũkũmi wa Yesũ nĩwatumie mambĩĩa kwona ĩsyĩtwa yĩu yĩ ya vata mũnango. Nĩkĩ tũtonya kwasya ũu? Nũndũ we nĩwaatĩĩaa ngelekanyʼo ya Ĩthe wake maũndũnĩ ala weekaa na wawetaa. Kwoou atũmwa make ‘nĩmamũmanyie’ Yeova nesanga ĩtina wa kwĩthukĩĩsya ũndũ Yesũ wamanyĩasya na kwona ũndũ wakuaa andũ ala angĩ.—Yoa. 14:9; 17:3.

“ĨSYĨTWA YAKU, YĨLA ŨNENGETE”

6. Yesũ oonanasya ata yĩla waisye kana Yeova nĩwamũnengete ĩsyĩtwa yake? (Yoana 17:​11, 12)

⁶ Nthĩnĩ wa ĩla mboya Yesũ wavoyie kwondũ wa amanyĩwʼa make, aisye: “Masũvĩe kwondũ wa ĩsyĩtwa yaku, yĩla ũnengete.” (Soma Yoana 17:​11, 12.) Ĩndĩ kĩu kyoonanasya kana yu Yesũ aĩ etawe Yeova? Aiee. Nĩwoona kana mboyanĩ ĩsu Yesũ aiweta ĩsyĩtwa ya Yeova atũmĩie ndeto, “ĩsyĩtwa yaku”? Kwoou ũu ti kwasya kana yu Yesũ aĩ ambĩĩe kwĩtwa Yeova. Ĩndĩ we oonanasya ata yĩla waisye kana Ngai nĩwamũnengete ĩsyĩtwa yake? Mbee, Yesũ atũmĩtwe nĩ Yeova na aĩ mũneeni wake. Ookĩte ĩsyĩtwanĩ ya Ĩthe wake na eekaa syama ĩsyĩtwanĩ o yĩu. (Yoa. 5:43; 10:25) Na kwongela ũu, ĩsyĩtwa “Yesũ” yonanasya “Yeova Nĩ Ũtangĩĩo.” Kwoou ĩsyĩtwa ya Yesũ nĩyĩkonanĩtye na ĩsyĩtwa, Yeova.

7. Nengane ngelekanyʼo ĩkwonanyʼa ũndũ Yesũ waĩ atonya kũneena kwondũ wa Yeova.

⁷ Kwavindĩĩsya ngelekanyʼo ĩĩ: Twasye mũsumbĩ nĩwatũma mũndũ mũna aneene kwondũ wake. Ndeto ila mũndũ ũsu ũkũneena wĩthĩaa no ta mũsumbĩ ũsu waineena. O ta ũu, Yesũ aĩ na ũkũmũ wa kũneena kwondũ wa Yeova nũndũ ũ Yeova nĩwe wamũtũmĩte.—Mt. 21:9; Luka 13:35.

8. Ĩsyĩtwa ya Yeova yaĩ “nthĩnĩ” wa Yesũ ata atanamba kũka vaa ĩũlũ wa nthĩ? (Kuma 23:​20, 21)

⁸ Mbivilia ĩmwĩtĩte Yesũ, ĩla Ndeto, nũndũ Yeova nĩwamũtũmĩaa ta Mũneeni wake nĩ kana atavye alaĩka na andũ maũndũ ala wendaa mamanye na kĩla wendaa meke. (Yoa. 1:​1-3) Nĩvatonyeka akethĩwa newe ũla mũlaĩka Yeova wamũtũmie akasũvĩe ana ma Isilaeli yĩla maĩ weũnĩ. Yĩla Yeova watavasya ana ma Isilaeli kana nĩmaaĩlĩte kwĩwʼa mũlaĩka ũsu, nĩwamaeleisye nĩkĩ maaĩlĩte kwĩka ũu. Ameie: “Nũndũ syĩtwa yakwa yĩ nthĩnĩ wake.”a (Soma Kuma 23:​20, 21.) Ĩsyĩtwa ya Yeova yaĩ “nthĩnĩ” wa Yesũ nũndũ nĩwe ũneenaa kwondũ wa Ĩthe wake na nĩwe wĩthĩawa mũsitalĩnĩ wa mbee kũthesya ĩsyĩtwa yake na kũĩkĩĩthya kana ekaa maũndũ kwa nzĩa ĩla yaĩlĩte.

“ASA, YĨKUMYE ĨSYĨTWA YAKU”

9. Yesũ oonaa ĩsyĩtwa ya Yeova yĩ ya vata mũno wĩana ata? Elesya.

⁹ O tondũ twoona, o na Yesũ atanamba kũka vaa ĩũlũ wa nthĩ, oonaa ĩsyĩtwa ya Yeova yĩ ya vata mũno vyũ. Kwoou ti ũsengyʼo kwona maũndũ onthe ala weekaa e kũũ ĩũlũ wa nthĩ makonanawʼa na ĩsyĩtwa ya Yeova. Na akilyĩ kũmina ũtavanyʼa wake, eeie Ĩthe wake atĩĩ: “Asa, yĩkumye ĩsyĩtwa yaku.” Na vau kwa vau, Ĩthe wake nĩwamũsũngĩie na wasya mũnene kuma ĩtunĩ amwĩa: “Nĩnĩyĩkumĩtye na ngayĩkumya ĩngĩ.”—Yoa. 12:28.

10-11. (a) Yesũ akumisye ĩsyĩtwa ya Yeova ata? (O na ĩngĩ, sisya visa.) (b) Nĩkĩ ĩsyĩtwa ya Yeova yaĩlĩte kũthewʼa na kũtetewa?

¹⁰ O nake Yesũ nĩwakumisye ĩsyĩtwa ya Ĩthe wake. Eekie ũu ata? Nĩwaeleisye angĩ ĩũlũ wa nguma sya mwanya sya Ĩthe wake na maũndũ ma mwanya ala wĩkaa kwondũ wa andũ. Ĩndĩ ve ũndũ ũngĩ weekie eka o kũkumya ĩsyĩtwa ya Ĩthe wake. Ĩsyĩtwa ya Yeova nĩyendaa kũthewʼa na kũtetewa.b Na Yesũ nĩwoonanisye ũndũ kĩu kyaĩ kya vata yĩla wamanyĩisye aatĩĩi make ĩla mboya ya ngelekanyʼo. Ameie mavoyae atĩĩ: “Asa waitũ ũla wĩ ĩtunĩ, ĩsyĩtwa yaku yĩtaĩwe.”—Mt. 6:9.

¹¹ Nĩkĩ ĩsyĩtwa ya Yeova yaĩlĩte kũthewʼa na kũtetewa? Nũndũ Satani, ũla nĩwe Ndevili, nĩwaneenie maũndũ ma ũvũngũ ma kũmwanangĩa Yeova Ngai ĩsyĩtwa mũũndanĩ wa Eteni. Aisye kana Yeova nĩ mũkengani na kana ve ũndũ mũseo waimĩte Atamu na Awa. (Mwa. 3:​1-5) O na asyokie oonanyʼa kana nzĩa ya Yeova ya kwĩka maũndũ ndyaaĩlĩte. Maũndũ asu onthe mathũku Satani wawetie nĩmamwanangĩie Yeova ĩsyĩtwa. Ĩtina, mĩthenyanĩ ya Yovu, Satani aisye kana andũ mamũthũkũmaa Yeova aĩ no ũndũ wa syĩndũ ila ũmanengae. Mũkengani ũsu ongelile kwasya kana vai mũndũ o na ũmwe ũmwendete Yeova kuma ngoonĩ nginya ũkethĩa no aendeee kũmũthũkũma o na akwatwa nĩ mathĩna. (Yovu 1:​9-11; 2:4) Nũndũ wa ũu, ĩvinda nĩyendekaa nĩ kana vamanyĩke nĩ Yeova wakenganĩte-ĩ kana nĩ Satani.

“NĨNGUMYA THAYŨ WAKWA”

12. Nĩ ũndũ wĩva Yesũ watwʼĩte kwĩka na ngenda nũndũ nĩwendete ĩsyĩtwa ya Yeova?

¹² Nũndũ Yesũ nũmwendete Yeova, nĩwatwʼĩte kwĩka kyonthe kĩla waĩ atonya nĩ kana athesye na aitetea ĩsyĩtwa yĩu. Nĩkyo kĩtumi waisye atĩĩ: “Nĩngumya thayũ wakwa.” (Yoa. 10:​17, 18) Kwa wʼo, we nĩweeyũmbanĩtye kũkwʼa kwondũ wa ĩsyĩtwa ya Yeova.c Andũ ma mbee ala mataĩ na naĩ, Atamu na Awa, nĩmaleanile na Yeova na makwata Satani mbau. Kĩvathũkanyʼo namo, Yesũ nĩweeyũmbanĩtye kũka kũũ ĩũlũ wa nthĩ na kwonanyʼa kana nĩwamwendete Yeova. Na eekie ũu kwa kũmwĩwʼa maũndũnĩ onthe ala weekaa na wawetaa. (Aevl. 4:15; 5:​7-10) Aendeeie kũlũmanyʼa na wĩanĩu wake nginya yĩla wesie kũkwʼa kĩkwʼũ kĩ woo mũtĩnĩ wa mathĩna. (Aevl. 12:2) Nũndũ wa ũu, nĩwoonanisye nesa kana nĩwamwendete Yeova na nĩwendete ĩsyĩtwa yake.

13. Nĩkĩ Yesũ nowe e weka waĩ atonya kũĩkĩĩthya nesa vyũ kana Satani nĩ mũkengani? (O na ĩngĩ, sisya visa.)

¹³ Yesũ nĩwoonanisye thayũnĩ wake wʼonthe kana Satani nĩwe waĩ mũkengani, ĩndĩ ti Yeova! (Yoa. 8:44) Vai mũndũ o na ũmwe waaĩthĩwa thayũ ũmwĩsĩ Yeova nesa vyũ ta Yesũ. Ta kethĩwa vaĩ kaũndũ o na ethĩwa no kamwe ka wʼo katĩ wa maũndũ ala Satani wawetie ĩũlũ wa Yeova, Yesũ ethĩwa akesĩ. Ĩndĩ we nĩwatwʼĩte vyũ kũtetea ĩsyĩtwa ya Yeova. O na ĩvinda yĩla woonaa Yeova ta wamũtiĩte, we nĩwatwʼĩte vyũ kũendeea kwĩkala e mũĩkĩĩku nginya kĩkwʼũ.—Mt. 27:46.d

“NĨNĨMINĨTE WĨA ŨLA WANENGIE NĨTETHYE”

14. Yeova amũtuvie Yesũ ata nũndũ wa ũĩkĩĩku wake?

¹⁴ Mboyanĩ ĩla Yesũ wavoyie ũtukũ wa mũthya atanoawa, aisye: “Nĩnĩminĩte wĩa ũla wanengie nĩtethye.” Ndaĩ na nzika kana Yeova nũkũmũtuva nũndũ wa ũĩkĩĩku wake. (Yoa. 17:​4, 5) Nake Ĩthe wake ndaamũsonokya. Yeova ndaaeka aendeee kwĩkala mbũanĩ. (Meko 2:​23, 24) Nĩwamũthayũũkisye na amũnenevya mũno ĩtunĩ. (Avi. 2:​8, 9) Ĩtina, Yesũ nĩwambĩĩie kũsumbĩka e Mũsumbĩ wa Ũsumbĩ wa Ngai. Wʼo Ũsumbĩ ũsu waĩ wĩanĩsye kyaũ? Yesũ aisye ũũ kĩlungunĩ kya kelĩ kya ĩla mboya ya ngelekanyʼo: “Ũsumbĩ waku wũke. Kwenda kwaku [Yeova] kwĩke kũũ nthĩ o ta kũya ĩtunĩ.”—Mt. 6:10.

15. Nĩ kyaũ kĩngĩ Yesũ ũkeanĩsya?

¹⁵ O mĩtũkĩ, Yesũ nũkũkita amaitha ma Ngai na ayananga andũ onthe athũku kaũnĩ wa Alimaketoni. (Ũvu. 16:​14, 16; 19:​11-16) Ĩvinda ĩkuvĩ ĩtina wa ũu, akamwĩkya Satani nthĩnĩ wa “ĩima yĩte kĩtulu,” vala ũkethĩwa atatonya kwĩka ũndũ o na ũmwe. (Ũvu. 20:​1-3) Na ĩndĩ ĩvindanĩ ya ũla Ũsumbĩ wa Myaka Ngili, Yesũ akaete mũuo vaa ĩũlũ wa nthĩ na aitetheesya andũ mavikĩe wĩanĩu. O na akathayũũkya andũ ala makwie. Eka ũu, akatwʼĩkĩthya nthĩ yonthe nzaũ. Yu kĩeleelo kya Yeova kĩkeethĩwa kyeanĩa vyũ!—Ũvu. 21:​1-4.

16. Maũndũ makeethĩwa mailye ata ĩtina wa ũla Ũsumbĩ wa Myaka Ngili?

¹⁶ Maũndũ makeethĩwa mailye ata ĩtina wa ũla Ũsumbĩ wa Myaka Ngili? Andũ makeethĩwa mavetangĩwe naĩ vyũ. Kwoou maikethĩwa ĩngĩ na vata wa nthembo ya wovosyo, mũndũ wa kũmewʼanĩthya na Ngai, kana mũvango wa kwĩthĩwa na athembi. O na ĩngĩ, “mũmaitha wa mũthya,” kĩkwʼũ, akeethĩwa aminĩtwe vyũ. Mbũa ikeethĩwa syĩ nthei. Na andũ onthe ala makwie makeethĩwa mathayũũkĩtwʼe. Kĩla mũndũ ĩũlũ wa nthĩ akeethĩwa e mwĩanĩu.—1 Ako. 15:​25, 26.

17-18. (a) Nĩ kyaũ kĩkekĩka mũthyanĩ wa ũla Ũsumbĩ wa Myaka Ngili? (b) Yesũ akeeka ata amina kũsumbĩka? (1 Akolintho 15:​24, 28) (O na ĩngĩ, sisya visa.)

¹⁷ Nĩ kyaũ kĩkekĩka mũthyanĩ wa ũla Ũsumbĩ wa Myaka Ngili? Ĩvindanĩ yĩu, ve ũndũ wa mwanya mũno ũkekĩka. Ĩsyĩtwa ya Yeova yĩkeethĩwa yĩtheetwʼe vyũ na nzika syonthe ila Satani waumĩlilye ikeethĩwa inaminwa. Ũu ũtonyeka ata? Mũũndanĩ wa Eteni, Satani avangie kana Yeova nĩ mũkengani na kana ndasumbĩkaa andũ nũndũ nũmendete. Ĩndĩ kuma ĩvinda yĩu nginya ũmũnthĩ, andũ ala mamũthũkũmaa Yeova nĩmethĩĩtwe maithesya ĩsyĩtwa yake ĩngĩ na ĩngĩ nũndũ nĩmamũtaĩaa na nĩmamũnengete ndaĩa. Kwoou mũthyanĩ wa ũla Ũsumbĩ wa Myaka Ngili, ĩsyĩtwa ya Yeova yĩkeethĩwa yĩteteetwe vyũ. Eka ũu, akeethĩwa aĩkĩĩthĩtye vyũ kana we nĩ Ĩthe witũ ũtwendete.

¹⁸ Ĩtina wa Ũsumbĩ wa Myaka Ngili, kĩla mũndũ akamanya kana maũndũ ala Satani wawetie ĩũlũ wa Yeova mayaĩ ma wʼo. Ĩndĩ we Yesũ akeeka ata amina kũsumbĩka? We akaatĩĩa ngelekanyʼo ya Satani na aileana na Yeova? Aiee! (Soma 1 Akolintho 15:​24, 28.) Akatũngĩa Ĩthe wake Ũsumbĩ. Na ĩtina wa ũu, akeenyivya ungu wa Yeova. Kĩvathũkanyʼo na Satani, Yesũ nĩwĩyũmbanĩtye kũtũngĩa Yeova kĩla kĩndũ nũndũ nũmwendete.

19. Nĩkĩ Yesũ wonaa ĩsyĩtwa ya Yeova yĩ ya vata mũno?

¹⁹ Yeova aĩ na kĩtumi kĩseo kya kũmũnenga Yesũ ĩsyĩtwa yake! Twĩasya ũu nũndũ nĩwonanĩtye nesa vyũ ũndũ Ĩthe wake ũilye. Kwoou Yesũ ethĩawa na woni wĩva ĩũlũ wa ĩsyĩtwa ya Yeova? Vai kĩndũ kĩngĩ kya vata mũno kwake kũvĩtũka ĩsyĩtwa yĩu. Nĩweeyũmbanĩtye kũkwʼa nũndũ wa ĩsyĩtwa yĩu, na ĩtina wa ũla Ũsumbĩ wa Myaka Ngili, nĩwĩyũmbanĩtye kũmũtũngĩa Yeova kĩla kĩndũ. Tũtonya kũatĩĩa ngelekanyʼo ya Yesũ ata? Nĩtũũsũngĩa ĩkũlyo yĩu ĩsomonĩ yĩla yĩatĩĩe.