Mbivilia Yaĩtye Ata Ĩũlũ wa Mũndũũme na Mũndũ Mũka Kwĩkalanyʼa Vamwe Matatwaanĩte Kĩ-Mĩao?
Ũndũ Mbivilia yaasya
Mbivilia yaasya kana Ngai endaa andũ ‘mevathane na ũlaalai.’ (1 Athesalonika 4:3) Ndeto “ũlaalai” o tondũ ĩtũmĩkĩte Mbivilianĩ, yonanasya ũthaa kana kũthi nza wa mũtwaano, aũme kũkoma na aũme kana aka kũkoma na aka, na mũndũũme na mũndũ mũka kũkoma ĩmwe matatwaanĩte.
Nĩkĩ twaĩlĩte kũmanya woni wa Ngai ĩũlũ wa andũ kũtwaana na kwĩkalanyʼa matatwaanĩte?
Mũvango wa mũtwaano wumĩte kwa Ngai. Ngai ambĩĩisye mũtwaano yĩla wakwatanisye mũndũũme na mũndũ mũka ma mbee. (Mwambĩlĩlyo 2:22-24) Ndavangĩte mũndũũme na mũndũ mũka mekalanasye matatwaanĩte kĩ-mĩao.
Ngai nĩwĩsĩ kĩla kĩseo kwondũ wa andũ. Ngai ambĩĩisye mũtwaano ayenda mũndũũme na mũndũ mũka mekalanasye ĩvinda yonthe. Endaa mekalanyʼe vamwe nesa na onthe ala me nthĩnĩ wa mũsyĩ mayĩthĩwa na mũuo na me atanu. Kwasũanĩa ngelekanyʼo ĩĩ yĩ laisi. O tondũ mũndũ ũseũvĩtye kĩndũ ũkũnengae ũtao wa ũndũ ũtonya kũkĩtũmĩa, nowʼo ũtao wa Ngai ũtũtavasya kĩla tũtonya kwĩka nĩ kana twĩthĩwe na mĩsyĩ mĩseo. Ala maatĩĩa myolooto ya Ngai nĩmatethekaa ĩvinda yonthe.—Isaia 48:17, 18.
Mũndũ ũseũvĩtye kĩndũ nũkũnengae ũtao wa ũndũ ũtonya kũtũmĩa kĩndũ kĩu. O ta ũu, ũtao wa Ngai nũtũtavasya ũndũ tũtonya kwĩka nĩ kana twĩthĩwe na mĩsyĩ mĩseo.
Kũmanyana kĩ-mwĩĩ na mũndũ ũtambĩte kũtwaana kana kũtwawa nĩkũtonya kũete mawumĩlo mathũku. Kwa ngelekanyʼo, mũndũ no akue ĩvu, mũndũ no akwatwe nĩ mowau ala makwatanawʼa kwĩsĩla kũmanyana kĩ-mwĩĩ, na no kũtume mũndũ athĩnĩka ngoonĩ mũno na kwa ĩvinda yĩasa.
Ngai nĩwanengie aũme na aka ũtonyi wa kũsyaana kwĩsĩla kũmanyana kĩ-mwĩĩ. Ngai onaa thayũ wĩ mũtheu na ũtonyi wa kũsyaana nĩ mũthĩnzĩo wa mwanya kuma kwake. Ngai endaa twonanyʼe mũthĩnzĩo ũsu nĩ wa mwanya kwa kũnenga ndaĩa mũvango wake wa mũtwaano.—Aevelania 13:4.
Nao nata mũndũũme na mũndũ mũka kwĩkalanyʼa vamwe matambĩte kũtwaana nĩ kana masisye kana nĩmaĩlanĩte?
Andũ kwĩkalanyʼa kwa kavinda kanini matambĩte kũtwaana nĩ kana “masisye” kana nĩmaĩlanĩte kũituma mũtwaano wĩthĩwa wĩ mũseo. Ĩndĩ mũtwaano wĩthĩawa wĩ mũseo yĩla mũndũũme na mũndũ mũka matwʼa kũtwaana na kwĩkalanyʼa vamwe ĩvinda yonthe na maitetheanĩasya mathĩna maumĩla.a Mũtwaano nũlũlũmĩlasya ngwatanĩo ya ala matwaanĩte.—Mathayo 19:6.
Ala matwaanĩte matonya kũlũlũmĩĩlya mũtwaano woo ata?
Vaiĩ mĩtwaano ĩtethĩawa na mathĩna. Ĩndĩ, andũ no methĩwe na mũtwaano mũseo yĩla maatĩĩa ũtao wa Mbivilia. Kwasũanĩa myolooto ĩĩ yĩ vaa ĩtheo:
Vĩtasya mavata ma ũla ũtwaanĩte nake mbee wa ala maku.—1 Akolintho 7:3-5; Avilivi 2:3, 4.
Onya ũla ũtwaanĩte nake wendo na ũimũnenga ndaĩa.—Aeveso 5:25, 33.
Ĩmanyĩsye kũsiĩĩa ũneeni waku.—Nthimo 12:18.
Ĩthĩawa na wũmĩĩsyo na ũiekeaa na mĩtũkĩ.—Akolosai 3:13, 14.
a Sisya kĩlungu “Mafanikio Katika Familia—Ushikamanifu.”