Yesũ Akamina Makaũ

Yĩla Yesũ waĩ vaa ĩũlũ wa nthĩ, nĩwoonanisye ũndũ wendete andũ mũno wĩana, nginya aumya thayũ wake kwondũ woo. (Mathayo 20:28; Yoana 15:13) O mĩtũkĩ, nũkwonanyʼa ĩngĩ ũndũ wendete andũ mũno wĩana kwa kũtũmĩa ũkũmũ ũla wĩ nawʼo e Mũsumbĩ wa Ũsumbĩ wa Ngai kũtuma “makaũ mathela kũvika kĩtulu kya nthĩ.”—Savuli 46:9.

Kwona ũndũ Mbivilia ĩeleetye kĩla Yesũ ũkeka:

• “Nũndũ akavonokasya mũthĩni yĩla wĩkayaa, na ngya, ĩla ĩte mũtethya. Akeewʼĩa tei ngya na athĩni, na mathayũ ma athĩni akamatangĩĩa. Akoovosya mathayũ moo kuma thĩnanĩ na ũngʼendunĩ.”—Savuli 72:12-14.

Tũtonya kwonanyʼa ata kana nĩtũtũngaa mũvea nũndũ wa maũndũ ala Yesũ ũtwĩkĩte na ala ũkilye kũtwĩka? Nzĩa ĩmwe nĩ kwa kwĩmanyĩsya mũnango ĩũlũ wa “ũvoo mũseo wa Ũsumbĩ wa Ngai,” ũla nĩwʼo ũvoo ũla watavanasya. (Lũka 4:43) Soma kĩlungu “Ũsumbĩ wa Ngai Nĩ Kyaũ?”