We Ũtonya Kũĩkĩĩa Ũũ?—Mbivilia Ĩmanyĩasya Ata?

Andũ mewʼaa makwʼa ngoo mũno yĩla ala maĩle kwĩkwatwʼa meethĩwa mate aĩkĩĩku. Andũ aingĩ nĩmaekete kũĩkĩĩa . . .

• atongoi ma siasa ala mavĩtasya mbee mavata moo vandũ va ma andũ.

• isese sya maũvoo ila itangasaa maũvoo mate ma wʼo na makwete mbau ngalĩko ĩmwe.

• andũ ma saenzi ala matekaa maũndũ ala matonya kũtethya andũ.

• atongoi ma ndĩni ala melikĩtye mũno siasanĩ vandũ va kwĩka kĩla Ngai wendaa.

Ti ũthũku andũ kwĩthwa me metho ĩũlũ wa ũla me kũĩkĩĩa. Mbivilia ĩtũkanĩtye ĩkatwĩa:

• “Ndũkaĩkĩĩe anene me mbee ũsumbĩnĩ, kana mwana wa mũndũ, ũla ũtatonya kũtethya.”—Savuli 146:3.

Ve ũmwe ũtonya kũĩkĩĩa

 Mbivilia yonanĩtye kana no tũmũĩkĩĩe Yesũ Klĩsto. Yesũ ndaĩ o mũndũ mũseo waĩ kwʼo tene. Ngai amũnyuvie Yesũ ‘asumbĩke e Mũsumbĩ . . . , na Ũsumbĩ wake ndũkethĩwa na mũminũkĩlyo.’ (Luka 1:32, 33) Yesũ nĩ Mũsumbĩ wa Ũsumbĩ wa Ngai, ũla nĩ silikalĩ ĩsumbĩkĩte ĩtunĩ yu tũĩ.—Mathayo 6:10.

• Nĩ kana ũmanye nĩkĩ ũtonya kũmũĩkĩĩa Yesũ, soma ilungu syĩ na kyongo, “Mũsumbĩ wa Ũsumbĩ wa Ngai Nũũ?” na “Ũsumbĩ wa Ngai Ũkeanĩsya Kyaũ?”