ANDŨ MA MŨIKA MAKŨLASYA
Nĩkĩ Naĩle Kũvoya?
Kwosana na ũkunĩkĩli ũmwe, kĩlungu kya 80 ĩũlũ wa 100 kya andũ ma mũika nthĩ ya Amelika nĩmavoyaa, ĩndĩ no nusu ya andũ asu mavoyaa kĩla mũthenya. Kwoou ti ũsengyʼo kwĩthĩwa amwe mekũlasya atĩĩ: ‘Yo mboya no ya kũtũtetheesya twĩwʼe nesa-ĩ, kana nĩtethasya kwa nzĩa ĩngĩ?’
Mboya nĩ kyaũ?
Mboya nĩ nzĩa ya kũneena na Mũmbi wa syĩndũ syonthe. We kwasũanĩa ĩũlũ wa ũndũ ũsu! Yeova nĩ mũnene kwĩ mũndũ o na wĩva, ĩndĩ o na vailye ũu, “nde vaasa na kĩla ũmwe witũ.” (Meko ma Atũmwa 17:27) O na eka ũu, Mbivilia ĩtũthoketye ĩkatwĩa atĩĩ: “Thengeeai Ngai, nake akamũthengeea inywʼĩ.”—Yakovo 4:8.
Ũtonya kũmũthengeea Ngai ata?
Nzĩa ĩmwe nĩ kwĩsĩla mboya—ũu nĩwʼo ũneenaa na Ngai.
Nzĩa ĩngĩ nĩ kwĩmanyĩsya Mbivilia—ũu nĩwʼo Ngai ũneenaa naku.
Waneenaa na Ngai kwĩsĩla mboya na ũimwĩthukĩĩasya kwa kũsoma Mbivilia, ũu ũkaũtetheesya wĩthĩwe na ngwatanĩo ya vakuvĩ vamwe nake.
“Yĩla ũneena na Yeova, wĩthĩawa ũineena na Ũla wĩ Ĩũlũ wa Onthe, na vai kĩanda kĩngĩ kya mwanya kĩvĩtũkĩte kĩu.”—Jeremy.
“Kũtavya Yeova ũndũ ngwĩwʼa ngoonĩ kwĩsĩla mboya, kũtumaa nĩwʼa nĩ vakuvĩ mũno nake.”—Miranda.
We Ngai nũtwĩthukĩĩasya?
Ethĩwa nũmũĩkĩaa Ngai, kana o na ethĩwa nũmũvoyaa, nũtonya kwĩthĩwa wĩ ũndũ wĩ vinya kũĩkĩĩa kana nũkwĩthukĩĩasya yĩla wamũvoya. Ĩndĩ o na vailye ũu, Mbivilia ĩmwĩtĩte Yeova “ũla wĩwʼaa mboya.” (Savuli 65:2) O na ĩngĩ ĩkũthoketye ‘ũmwiĩe kwĩmakĩa kwaku kwʼonthe.’ Nĩkĩ? ‘Nũndũ nũkũthĩnĩkĩaa.’—1 Vetelo 5:7.
Sũanĩa ũndũ ũũ: We nĩwosaa ĩvinda ũkaneena na anyanyau kĩla ĩvinda? O nake Ngai endaa ũneenae nake oou. Mũvoyae kĩla ĩvinda na ũyĩka ũu ũitũmĩaa ĩsyĩtwa yake, Yeova. (Savuli 86:5-7; 88:9) Mbivilia ĩkũthoketye ‘ũvoyae ũtekũeka.’—1 Athesalonika 5:17.
“Yĩla ngũvoya nĩthĩawa ndineena na Ĩthe wakwa wa ĩtunĩ, na nĩmũtulũĩlaa ngoo yakwa yonthe.”—Moises.
“Nĩneenaa na Yeova ndeũmũvitha kĩndũ o na kĩmwe, o ũndũ ndonya kũneena na nyinyia wakwa kana mũnyanyawa wa vakuvĩ.”—Karen.
Ndonya kũvoya ĩũlũ wa kyaũ?
Mbivilia yaĩtye atĩĩ: “Kĩla ũndũnĩ mavata menyu nĩmatavanwʼe kwa Ngai kwĩsĩla mboya, o vamwe na kwĩsũvana na kũtũnga mũvea.”—Avilivi 4:6.
Ũu nĩkwonanyʼa kana no ũvoye ĩũlũ wa mathĩna maku? Ĩĩ! O na Mbivilia yaĩtye atĩĩ: “Mwaũĩe Yeova mũio waku, nake akakũtwʼĩĩka.”—Savuli 55:22.
Ĩndĩ o na vailye ũu, yĩla tũũmũvoya Ngai tũyaĩle o kũmũtavasya mathĩna maitũ me moka. Mũndũ mũka ũmwe wa mũika wĩtawa Chantelle aĩtye atĩĩ: “Ũnyanya wakwa na Yeova ndwĩsa kwĩthĩwa wĩ mũseo ethĩwa kĩla ĩvinda ngamũtavasya o mathĩna makwʼa. Nonaa nĩ ũseo ngamba kũmũtũngĩa Yeova mũvea, na maũndũ ala ngũmũtũngĩa mũvea kwondũ wamo maĩlĩte kwĩthĩwa me maingangĩ.”
Sũanĩa ũndũ ũũ: Nĩ maũndũ meva thayũnĩ waku ũtonya kwenda kũtũnga mũvea kwondũ wamo? No ũsũanĩe maũndũ atatũ ũkomanie namo ũmũnthĩ ũtonya kwenda kũmũtũngĩa Yeova mũvea?
“O na tũmaũndũ tũla tũnini vyũ ta kwona ĩlaa yanake, nĩtũtonya kũtuma wenda kũmũtũngĩa Yeova mũvea.”—Anita.
“Vindĩĩsya ĩũlũ wa wũmbi wa Yeova ũla ũkwendeeasya mũno kana ũsũanĩe o mũsoa wa Mbivilia ũla ũkũkitaa ngoo, na ĩndĩ ũimũtũngĩa Yeova mũvea.”—Brian.