Ĩvuku ya Kwĩmanyĩsya Mbivilia yĩ Kĩvathũkanyʼo Vyũ

Mwei wa 1, 2021 Nzama Ĩla Ĩtongoesye nĩyatangaasie kumwʼa kwa ĩvuku yeũ ya kũmanyĩsya andũ Mbivilia yĩtawa, Tanĩa Thayũ Tene na Tene!a We weewie ata yĩla weewie kĩmanyĩthya kĩu? Matthew ũla wĩkalaa Canada, aĩtye: “Natanie mũno! Na ũtanu wakwa nĩwongelekile yĩla neethukĩĩisye maũvoo mayumwʼa na vitio iyonanwʼa ila syaeleisye nĩkĩ ĩvuku yĩu yaseũviwʼe na maũndũ ala meekĩtwe nĩ kenda yĩmanyĩke kana nĩyaĩlĩte. Naĩ na mea maingĩ mũno ma kwona ĩvuku yĩu na kwambĩĩa kũyĩtũmĩa.”

Ĩvuku Tanĩa Thayũ Tene na Tene! nĩyambĩĩisye nzĩa nzaũ ya kũmanyĩsya andũ Mbivilia. Ĩndĩ kĩu tikyo kĩvathũkanyʼo kyoka katĩ wa ĩvuku yĩĩ yeũ na mavuku ala angĩ meethĩĩtwe maitũmĩwa kũmanyĩsya Mbivilia. Ethĩwa nũtũmĩaa ĩvuku yĩla ĩtumbĩthye ya Tanĩa Thayũ Tene na Tene! nũtonya kwĩthĩwa wonete kana yĩ kĩvathũkanyʼo. Nĩ kana tũmanye nĩkĩ, ekai twone ũndũ ĩvuku yĩu yĩseũvĩtwʼe.

Ĩvuku Yeũ Yĩseũvĩtwʼe kwa Nzĩa yĩ Kĩvathũkanyʼo

Yĩ na ĩthangũ yũũmu. Nĩkĩ nĩ ya vata? Ĩvuku Tanĩa Thayũ Tene na Tene! yĩ na mavisa manake mbee wa 600, na ũtalo ũsu nĩ vakuvĩ kũndũ 10 kwa mavisa ala me nthĩnĩ wa ĩvuku Mbivilia Ĩtũmanyĩasya! O na ĩvuku yĩu yĩ na myanya mingĩ ĩte mĩandĩke na ĩte na mavisa. Itumi isu syelĩ no iete thĩna nũndũ ethĩwa ĩthangũ yĩseũvĩtwʼe yĩ ĩvũthũ, mũndũ no one mavisa ala me ngalĩko ĩla ĩngĩ. Nĩ kana mathĩna asu maikethĩwe, ana-a-asa ala mathũkũmaa Mũvĩanĩ wa Nthĩ Yonthe wa Kũtumbĩthya (IPD), Wallkill, New York, Amelika, nĩmatatie mĩthemba ĩna ya mathangũ ĩla tũtũmĩaa kũla tũtumbĩthĩasya mavuku. Kamitii ya Ũandĩki ya Nzama Ĩla Ĩtongoesye nĩyasyaisye nesa mĩthemba ĩsu yĩ ĩna na yanyuva ĩthangũ ũtatonya kwona ndeto ila syĩ ĩthangũnĩ yĩla yingĩ. O na kau thooa wa ĩthangũ yĩu nũthonokete thooa wa mathangũ maingĩ ala tũtũmĩaa kũtumbĩthya mavuku maitũ kwa kĩlungu kya 16 ĩũlũ wa 100, ĩthangũ yĩu nĩyĩtetheeasya amanyĩwʼa ma Mbivilia kũsoma maũndũ onthe ala me Ĩvukunĩ Tanĩa Thayũ Tene na Tene!, mate kwelelũkwʼa nĩ mavisa ala me ngalĩko ĩla ĩngĩ ya ĩthangũ.

Kava yĩ kĩvathũkanyʼo. Kava ya ĩvuku yĩu yeũ yĩ kĩvathũkanyʼo na kava sya mavuku ala angĩ nũndũ yũmbĩĩwe kathangũ ke kĩvathũkanyʼo namo kala kayĩsũvĩĩte yĩikanangĩke na mĩtũkĩ. Vandũ va kũmbĩĩa ĩthangũ ĩtendeu yĩla tũmbĩĩaa kavanĩ sya mavuku ala angĩ, ĩvukunĩ yĩu yeũ tũtũmĩĩte ĩthangũ yĩla yĩtumĩte mavisa ala me kavanĩ moneka nesa. O na ĩngĩ, kĩu nĩkĩsũvĩĩte ĩvuku yĩu yĩikakũe na mĩtũkĩ o na ethĩwa nĩyĩũtũmĩwa mũno. Ĩndĩ thooa wa kava ĩsu nĩ kũndũ kũtano kwa ũla twĩthĩĩtwe tũitũmĩa. Kwoou mĩvĩa ya kũtumbĩthya mavuku yĩ kĩvathũkanyʼo nĩyathũkũmie yĩ ngwatanĩo nĩ kana ĩkwate kava ĩsu na thooa mũninangi.

Nĩkĩ ana-a-asa matwie kũtũmĩa syĩndũ sya thooa mũnenange? Mwana-a-asa ũmwe ũthũkũmanaa na Mũvĩa wa Nthĩ Yonthe wa Kũtumbĩthya aisye: “Twĩĩkwatya ĩvuku yĩĩ nĩyĩũtũmĩwa nesa, kwoou twĩenda yĩendeee kwĩthĩwa yĩ ya kwendeesya o na kau nĩyĩkũtũmĩwa mũno.” Nake Eduardo, ũla ũthũkũmaa Ovisinĩ wa Ũvonge wa Brazil, aĩtye: “Twĩ na ũtanu kwona ũndũ ũseũvyo wa Yeova ũtũmĩĩte syĩndũ nzeo kũseũvya ĩvuku yĩĩ yanake, yĩtatonya kwanangĩka mĩtũkĩ, na ya kwendeesya, o vamwe na kũtũmĩa nesa mĩvothi ĩla yũmĩtwʼe.”

Kũtumbĩthya Ĩvindanĩ ya Ũwau wa COVID-19.

Twambĩĩie kũtumbĩthya ĩvuku Tanĩa Thayũ Tene na Tene! Mwei wa 3, 2021. Ũyaĩ ũndũ wĩ laisi kwĩka ũu nũndũ ĩvindanĩ yĩu kwaĩ na ũwau wa COVID-19. Nĩkwĩthĩwa ĩvindanĩ yĩu andũ mayaaĩlĩte kũka Mbetheli kana kumaalũka, mĩvĩa yitũ ya kũtumbĩthya ĩyaĩ ĩtonya kũtetheka nĩ ũtethyo ũla ĩkwataa kuma kwa ala mokaa kũtetheesya Mbetheli, o na ĩyaĩ ĩtonya kũthokya ana-a-asa matwʼĩke athũkũmi ma Mbetheli. Na nũndũ wa ũu, kũyaĩ na athũkũmi meanĩtye kũla kũtumbĩthĩawʼa mavuku, na kũndũ kũngĩ nĩkwavingiwe kwa kavinda nũndũ wa mĩao ĩla silikalĩ yeekĩĩte.

Twakĩlilye vinya mathĩna asu ata? Ĩla wĩa wambĩĩie kũla kũtumbĩthĩawʼa mavuku, ana-a-asa na eĩtu-asa kuma mĩvĩanĩ ĩla ĩngĩ ya Mbetheli nĩmakũlilwʼe matetheesye kũtumbĩthya kwa kavinda. Mwana-a-asa wĩtawa Joel ũla ũthũkũmanaa na Mũvĩa wa Nthĩ Yonthe wa Kũtumbĩthya aĩtye atĩĩ: “Veva wa kwĩyumya ũla waĩ na ana-a-asa na eĩtu-asa asu o vamwe na kwĩthĩwa meyũmbanĩtye kũmanyĩwʼa wĩanĩ ũsu mweũ kwatũtetheeisye mũno wĩanĩ wa kũtumbĩthya.”

O na kũtwʼĩka kwĩ mathĩna asu, nĩtũtumbĩthĩtye kovi milioni mbingĩ sya ĩvuku Tanĩa Thayũ Tene na Tene! Nĩ kenda tũtethye wĩa ũsu, nĩvendekaa syĩndũ mbingĩ ta tũsengea twa kũtumbĩthya, mathangũ ma kũseũvya kava, mathangũ, ingi, na ngamu. Kwa ĩvinda ya myei ĩtano, nĩtwatũmĩie mbee wa ndola milioni 2.3 sya Amelika kũthooa syĩndũ sya kũtumbĩthya ĩvuku yĩu syĩ syoka. Nĩ kana tũolange ngalama, twĩthĩĩtwe tũitumbĩthya mavuku o ala mekwendeka ikundinĩ.

“Nĩ Ĩvuku Yĩseũvĩtwʼe na Ũtũĩka Mũnene”

Alimũ ma Mbivilia o vamwe na amanyĩwʼa moo me na woni mwaũ ĩũlũ wa ĩvuku yĩĩ yeũ? Mwana-a-asa wĩtawa Paul ũla wĩkalaa Australia, aĩtye: “Nĩnĩtanĩaa kũtũmĩa ĩvuku Tanĩa Thayũ Tene na Tene! o na nĩnĩthĩawa na mea ma kũmanyĩsya mũndũ Mbivilia nĩtũmĩĩte ĩvuku yĩu. Yĩvangĩtwe kwa nzĩa ya kwendeesya na kĩu nĩkĩtumaa mũmanyĩwʼa eyĩelesya. Ĩvuku yĩu yĩthĩawa na ũvoo ũandĩkĩtwe kwa nzĩa ĩtonya kũeleeka nesa, nĩyĩthĩawa na makũlyo matonya kũkiita ngoo, vitio, mavisa, kyati, na maũndũ ala mũmanyĩwʼa ũtonya kwĩka. Nĩ ĩvuku yĩseũvĩtwʼe na ũtũĩka mũnene na kĩu nĩkĩnthangaasya o nakwa naĩlangye ũtũĩka wakwa wa kũmanyĩsya.”

Mũmanyĩwʼa ũmwe ũla wĩkalaa Amelika aĩtye: “Nĩnendete ĩvuku yĩu yeũ mũno. Mavisa ala me ĩvukunĩ yĩu nĩmandetheeasya kũelewa maũndũ ala manene. Nasyo vitio ila syĩ ĩvukunĩ yĩu ningiitaa ngoo mũno na nitumaa nĩatĩĩa maũndũ ala neemanyĩsya.” Mũmanyĩwʼa ũsu emanyĩasya kelĩ kwa kyumwa na nũendaa maũmbanonĩ ma kĩkundi ateũtĩĩa.

Kovi milioni mbingĩ sya ĩvuku Tanĩa Thayũ Tene na Tene! nĩsyaĩlĩte kũtumbĩthwʼa kwa ithyomo mbingĩ. Kũvika yu, Nzama Ĩla Ĩtongoesye nĩyĩtĩkĩlĩtye ĩvuku yĩu yumĩthwʼe nthĩnĩ wa ithyomo 710, na ũsu nĩ wongeleku wa ithyomo 340 ĩla syeetĩkĩlĩtwʼe kũmĩthya ĩvuku Mbivilia Ĩtũmanyĩasya!

Mbesa sya kũũngamĩa wĩa wa kũtumbĩthya syumaa va? Ikwatĩkanaa kwĩsĩla mĩvothi ĩla yumawʼa kwondũ wa wĩa wa nthĩ yonthe, na mingĩ yayo yumawʼa kwĩsĩla donate.jw.org. Nĩtũũkũtũngĩa mũvea mũno nũndũ wa ũlau waku wa kũmya mĩvothi, ĩla ĩtũtetheeasya kumya mavuku ma kũmanyĩsya andũ Mbivilia ala mekwenda kũmanya ĩũlũ wa Yeova na ‘[kũtanĩa] thayũ tene na tene.’—Savuli 22:26.