Wakatatũ, Matukũ 29, Mwei wa 10
Mũtaĩe Yeova, we ngoo yakwa; na syonthe ila syĩ nthĩnĩ wakwa, taĩai syĩtwa yake ĩtheu.—Sav. 103:1.
Nũndũ andũ ala aĩkĩĩku nĩmamwendete Ngai, kĩu nĩkĩtumaa mataĩa ĩsyĩtwa yake na ngoo yonthe. Mũsumbĩ Ndaviti nĩweesĩ kana kũtaĩa ĩsyĩtwa ya Yeova no ũndũ ũmwe na kũmũtaĩa ũ Yeova mwene. Yĩla tweewʼa ĩsyĩtwa ya Yeova, tũsũanĩaa ũndũ we ũilye, nguma syake syonthe, na maũndũ ma kũsengyʼa ala wĩkĩte. Ndaviti nĩwendaa kũtaĩa ĩsyĩtwa ya Ĩthe wake na kũyĩkalya yĩ ĩtheu. Endaa kwĩka ũu na ‘kyonthe kĩla kĩ nthĩnĩ’ wake, na ũu nĩ kwasya, na ngoo yake yonthe. O namo Alivai maĩ mũsitalĩnĩ wa mbee nthĩnĩ wa kũmũtaĩa Yeova. Nĩmeesĩ nesa kana vayaĩ ndeto maĩ matonya kũtũmĩa makataĩa vyũ ĩsyĩtwa ĩtheu ya Yeova. (Nee. 9:5) Vate nzika, kũmũtaĩa Yeova menyivĩtye na meyumĩtye vyũ nĩkwamũtanĩthisye. w24.02 9 ¶6
Wakana, Matukũ 30, Mwei wa 10
Maendeeo ala twĩkĩte kũvika yu, nĩtũendeei kwĩkala mũendelenĩ o ũsu.—Avi. 3:16.
Yeova ndakakwonaa ũte wa vata aĩ nĩkwĩthĩwa ndũneanĩsya mũvango ũtanaĩ ũtonya kwĩanĩsya. (2 Ako. 8:12) Yĩla vaumĩla ũndũ watuma ũteanĩsya mũvango waku, wonae ta mwanya wa kwĩmanyĩsya ũndũ mũna. Lilikana maũndũ ala ũminĩte kwĩanĩsya. Mbivilia yaĩtye: “Nũndũ Ngai nĩ mũlũngalu, ndesa kũlwa nĩ wĩa [waku].” (Aevl. 6:10) Kwoou o naku ndwaĩlĩte kũlwa nĩ maũndũ ala wĩanĩĩtye. Sũanĩa ĩũlũ wa mĩvango ĩla ũminĩte kwĩanĩsya, yĩthĩwe nĩ kwaĩlangya ũnyanya waku na Yeova, kũtavya angĩ ĩũlũ wake, kana kũvatiswa. O ũndũ weanĩisye mĩvango ya kĩ-veva ĩla waĩ nayo tene, ũu nowʼo ũtonya kwĩanĩsya mĩvango ĩla wĩ nayo oyu. Yeova no aũtetheesye ũkeanĩsya mũvango waku. Yĩla ũendeee kwĩkĩa kĩthito wĩanĩsye mũvango waku wa kĩ-veva, ndũkolawe nĩ kũtanĩa kwona ũndũ Yeova ũendeee kũũtetheesya na ũkũathima. (2 Ako. 4:7) Na waema kũkwʼa ngoo, ũkakwata moathimo maingangĩ.—Aka. 6:9. w23.05 31 ¶16-18
Wakatano, Matukũ 31, Mwei wa 10
Asa mwene nũmwendete, nĩkwĩthĩwa inywʼĩ nĩmũmbendete na nĩmũĩkĩĩĩte kana natũmiwe nĩ Ngai.—Yoa. 16:27.
Yeova nũmanthaa nzĩa sya kwonyʼa andũ make kana nũmendete na nĩwendeeawʼa nĩmo. Maandĩko nĩmawetete mavinda elĩ wamũtavisye Yesũ kana nĩwe Mwana wake mwendwa, ũla wendeeawʼa nĩwe. (Mt. 3:17; 17:5) We no wende kwĩwʼa Yeova aikũĩkĩĩthya kana nĩwendeeawʼa nue? Yeova ndaneenaa naitũ ĩmwe kwa ĩmwe, ĩndĩ atũmĩaa Ndeto yake, Mbivilia. Yĩla twasoma ndeto sya kwendeesya ila Yesũ watavisye amanyĩwʼa make, twĩwʼaa Yeova tawe ũkũtũtavya ndeto isu. Yesũ nũatĩĩaa ngelekanyʼo ya Ĩthe wake nesa vyũ. Kwoou yĩla twasoma kana Yesũ nĩwendeeiwʼe nĩ atũmwa make o na kau maĩ na naĩ, no tũkũne visa kĩlĩkonĩ Yeova aitũtavya ndeto isu. (Yoa. 15:9, 15) Ethĩwa nĩtwakwatwa nĩ mathĩna, kĩu kĩyonanasya kana Ngai nũekete kwendeewʼa nithyĩ. Vandũ va ũu, kĩtũnengae myanya ya kũĩkĩĩthya ũndũ tũmwendete Ngai witũ mũno wĩana na ũndũ tũmũĩkĩĩe.—Yak. 1:12. w24.03 28 ¶10-11