Motalo
10 Nĩvo ĩndĩ Yeova weeie Mose: 2 “Ĩseũvĩsye masoo elĩ; maseũvye na vetha mũtue, na ũkamatũmĩaa kũmbanyʼa ũmbano na kũmbũũkya kambi. 3 Yĩla masoo asu elĩ mavuvwa, no nginya ũmbano wʼonthe ũmbanawʼe mbee waku mũomonĩ wa ĩeema ya kũmbanĩa. 4 Ethĩwa soo ũmwe nĩwʼo wavuvwa, no anene me oka, ala aũngamĩi ma makili ma Isilaeli, makombanawʼa mbee waku.
5 “Yĩla mwavuva soo na wasya ũũvĩndũkanga, ala mambĩte kambi ngalĩko ya wumĩlonĩ wa sua makoombũũkaa. 6 Yĩla mwavuva wasya ũũvĩndũkanga ĩvinda ya kelĩ, ala mambĩte kambi ngalĩko ya ĩtheo makoombũũkaa. No nginya mũvuvae masoo na wasya ũsu kĩla ĩvinda kĩkundi kĩmwe kya mbaĩ kĩkũmbũũka.
7 “Yĩla mũkũmbanyʼa ũmbano vamwe, mũkavuvaa masoo, ĩndĩ mate na wasya ũũvĩndũkanga. 8 Ana ma Alũni, ala athembi, maĩlĩte kũvuvaa masoo, na kũvuvwa kwamo kũkeethĩawa ta ũtw’ĩo ĩvinda yonthe kwondũ wenyu nzyawanĩ syenyu syonthe.
9 “Yĩla mwatwʼa kũkita na mũmaitha ũkũmũthĩnyʼa mwĩ nthĩ yenyu, mwaĩlĩte kũvuva wasya wa kaũ masoonĩ menyu, na Yeova Ngai wenyu akamũlilikana na aimũtangĩĩa kuma kwa amaitha menyu.
10 “O na ĩngĩ, mavindanĩ menyu ma kũtana, yĩla mwĩ na mboka syenyu na mwambĩĩonĩ wa myei yenyu, mũkavuvaa masoo asu ĩũlũ wa nthembo syenyu sya kũvĩvw’a na nthembo syenyu sya ngwatanĩo; ikatumaa mũlilikanwa mbee wa Ngai wenyu. Ninyie Yeova Ngai wenyu.”
11 Yu ĩndĩ, mwakanĩ wa kelĩ, mweinĩ wa kelĩ, mũthenyanĩ wa 20 wa mwei, yĩla ĩtu nĩyookĩlile ĩũlũ wa ĩeema ya ũthaithi ya ũla Ũkũsĩ. 12 Na ĩndĩ Aisilaeli makũsya kuma weũnĩ wa Sinaĩ kwosana na ũndũ meeĩaĩtwe mombũũkae, na ĩtu yĩu yaũngamĩla weũnĩ wa Valani. 13 Yĩĩ nĩyo yaĩ ĩvinda ya mbee kũmbũũka kwosana na mwĩao wa Yeova o tondũ wamwĩaĩe Mose.
14 Na kwoou kĩkundi kya mbaĩ itatũ kya kambi ya ana ma Yuta nĩkyo kyaĩ kya mbee kũmbũũka kwosana na nguthu syakyo,* na Nasoni mwana wa Aminatavu nĩwe waũngamĩe nguthu ĩsu. 15 Nguthu ya mbaĩ ya ana ma Isakali yaũngamĩwe nĩ Nethaneli mwana wa Nzuali. 16 Nguthu ya mbaĩ ya ana ma Nzevuluni yaũngamĩwe nĩ Eliavu mwana wa Eeloni.
17 Yĩla ĩeema ya ũthaithi yathaiwʼe, ana ma Ngelisoni na ana ma Melali, ala makuaa ĩeema ya ũthaithi, nĩmoombũũkie.
18 Ĩtina wa ũu, kĩkundi kya mbaĩ itatũ kya kambi ya Leũveni nĩkyoombũũkie kwosana na nguthu syakyo,* na Elisuli mwana wa Seteuli nĩwe waũngamĩe nguthu ĩsu. 19 Nguthu ya mbaĩ ya ana ma Simeoni yaũngamĩwe nĩ Selumieli mwana wa Nzulisatai. 20 Nguthu ya mbaĩ ya ana ma Ngati yaũngamĩwe nĩ Eliasavu mwana wa Ndeueli.
21 Ĩtina wa ũu, Akoathi, ala makuaa syĩndũ sya vala vandũ vatheu, nĩmoombũũkie. Na ĩeema ya ũthaithi yaaĩlĩte kwambwa maitwʼĩka nĩmavika.
22 Ĩtina wa ũu, kĩkundi kya mbaĩ itatũ kya kambi ya ana ma Evilaimu nĩkyoombũũkie kwosana na nguthu syakyo,* na Elisama mwana wa Amiuti nĩwe waũngamĩe nguthu ĩsu. 23 Nguthu ya mbaĩ ya ana ma Manase yaũngamĩwe nĩ Ngamalieli mwana wa Vetasuli. 24 Nguthu ya mbaĩ ya ana ma Mbenyamini yaũngamĩwe nĩ Avitani mwana wa Kiteoni.
25 Ĩtina wa ũu, kĩkundi kya mbaĩ itatũ kya kambi ya ana ma Ndani nĩkyoombũũkie kwosana na nguthu syakyo,* na nĩkyo kyaseseee kambi ila ingĩ syonthe kuma ngalĩko ya ĩtina, na Aieseli mwana wa Amisatai nĩwe waũngamĩe nguthu ĩsu. 26 Nguthu ya mbaĩ ya ana ma Aseli yaũngamĩwe nĩ Vakieli mwana wa Okalani. 27 Nguthu ya mbaĩ ya ana ma Navitali yaũngamĩwe nĩ Aila mwana wa Enani. 28 Ũsu nĩwʼo mũvango ũla waatĩĩawa nĩ Aisilaeli na nguthu syoo* yĩla mekũmbũũka.
29 Nĩvo ĩndĩ Mose waneenie na Ovavu mwana wa Leueli,* ũla waĩ Mũmitiani na mũthoni wake, na amwĩa atĩĩ: “Yu twĩenda kũkũsya tũthi nthĩ ĩla Yeova watwĩie, ‘Ngamũnenga yo.’ Endanyʼa naitũ, na tũkekalanasya naku nesa, nũndũ Yeova nĩwathanĩte maũndũ maseo kwondũ wa Isilaeli.” 30 Ĩndĩ amwĩa: “Ndiendanyʼa nenyu. Nĩsyoka nthĩ yakwa na kwa andũ makwa ma mũsyĩ.” 31 Nake Mose amwĩa: “Nĩngũkwĩsũva, ndũkatũtie, nũndũ nue wĩsĩ vala twaĩle kwamba kambi weũnĩ, na nue ũtonya kũtwonyʼa vala twaĩle kwĩsĩla.* 32 Na waendanyʼa naitũ, ũseo o na wĩva ũla Yeova ũkatwonasya, vate ndĩi o naku tũkakwonasya.”
33 Kwoou nĩmoombũũkie me nguthu kuma kĩĩmanĩ kya Yeova na mathi kyalo kya mĩthenya ĩtatũ, na ĩsandũkũ ya ũtianĩo wa Yeova yakuĩtwe mbee woo kwa mĩthenya ĩtatũ nginya yĩla vandũ va kũthũmũa voonekie kwondũ woo. 34 Na yĩla mombũũka, ĩtu ya Yeova yeethĩawa ĩũlũ woo mũthenya.
35 Kĩla ĩvinda yĩla Ĩsandũkũ yĩũthamwʼa, Mose aasya: “Ũkĩla, ame Yeova, na amaitha maku nĩmanyaĩĩkwʼe, na eka ala maũmenaa masembe maũkĩĩte.” 36 Na yĩla yathũmũwʼa, aasya: “Syoka, ame Yeova, vala ve makili matatalĩka ma Isilaeli.”