Asili
4 Ĩndĩ Euti akwʼa, Aisilaeli nĩmambĩĩie kwĩka ĩngĩ kĩla kĩthũku methonĩ ma Yeova. 2 Kwoou Yeova nĩwamathooisye kwʼokonĩ kwa Yavini mũsumbĩ wa Kanaanĩ, ũla wasumbĩkĩte Asoli. Mũnene wa ita syake eetawa Sisela, ũla wekalaa Alosethi ya mbaĩ.* 3 Aisilaeli nĩmamũĩĩie Yeova, nũndũ Yavini aĩ na makasya 900 ma kaũ me na mbyũ ndĩanĩ,* na nĩwathĩnĩtye Aisilaeli mũno myaka 20.
4 Yu Ndevola, mwathani mũndũ mũka, mũka wa Lavitothi, nĩwe wasilanasya Isilaeli ĩvindanĩ yĩu. 5 Akothaa kwĩkala ungu wa mũtende wa Ndevola katĩkatĩ wa Lama na Mbetheli kĩsionĩ kĩ iĩma kya Evilaimu; Aisilaeli maendaa kwake nĩ kana akamatavye motwʼĩo ma Ngai. 6 Nĩwatũmanie Mbalaka mwana wa Avinoamu aume Ketesi-navitali na amwĩa atĩĩ: “We Yeova Ngai wa Isilaeli ndanenganĩte mwĩao? ‘Enda na ũyambata* Kĩĩmanĩ kya Tavoli, na ũyosa aũme 10,000 ma Navitali na ma Nzevuluni maendanyʼe naku. 7 Ngakũetee Sisela, mũnene wa ita sya Yavini, vamwe na makasya make ma kaũ na ita syake sya asikalĩ kalũsĩnĩ ka* Kisoni, na ngamũnengane kwʼokonĩ kwaku.’”
8 Nũndũ wa ũu, Mbalaka amwĩa: “Waendanyʼa nakwa, nĩngũthi, ĩndĩ waema kũendanyʼa nakwa, ndithi.” 9 Nake Ndevola amwĩa atĩĩ: “Vate nzika, nĩngũendanyʼa naku. Ĩndĩ o na ũu wĩ o vo, kaũ ũla ũũthi kũkita ndwĩtuma ũkumwʼa, nũndũ Yeova enengane Sisela kwʼokonĩ kwa mũndũ mũka.” Nĩvo ĩndĩ Ndevola wookĩlile aendanyʼa na Mbalaka kũu Ketesi. 10 Mbalaka nĩweetie Nzevuluni na Navitali kũu Ketesi, na aũme 10,000 mamũatĩĩa. O na Ndevola nĩwaendanisye nake.
11 Yu, Eeveli, ũla waĩ Mũkeni, aĩ eevathie na Akeni, nzyawa sya Ovavu, mũthoni wa Mose, na ĩeema yake yambĩtwe vakuvĩ na mũtĩ mũnene ũla wĩ Nzaananimu, ĩla yĩ Ketesi.
12 Nĩmatavisye Sisela kana Mbalaka mwana wa Avinoamu aĩ anambata Kĩĩmanĩ kya Tavoli. 13 Sisela ate kwananga ĩvinda nĩwoombanisye makasya onthe ma kaũ, makasya 900 me na mbyũ ndĩanĩ,* vamwe na ita syonthe sya asikalĩ ila syaĩ vamwe nake kuma Alosethi ya mbaĩ mathi kalũsĩnĩ ka* Kisoni. 14 Nĩvo ĩndĩ Ndevola weeie Mbalaka atĩĩ: “Ũkĩla, nũndũ ũũ nĩwʼo mũthenya ũla Yeova ũkũnengane Sisela kwʼokonĩ kwaku. We Yeova ndaendete mbee waku?” Na Mbalaka atheea kuma Kĩĩmanĩ kya Tavoli aatĩĩwe nĩ aũme 10,000. 15 Nĩvo ĩndĩ Yeova wavũavũanisye Sisela na makasya make onthe ma kaũ na ita syake syonthe mbee wa ũvyũ wa Mbalaka. Mũthya, Sisela nĩwaumie ĩkasyanĩ yake na asemba na maaũ. 16 Mbalaka nĩwasembanisye makasya ma kaũ na ita isu sya kaũ kũvika Alosethi ya mbaĩ. Kwoou ita syonthe sya Sisela syooawa na ũvyũ; vai o na ũmwe waatiala.
17 Ĩndĩ Sisela nĩwasembie na maaũ athi ĩeemanĩ ya Yaeli mũka wa Eeveli, ũla waĩ Mũkeni, nũndũ vaĩ mũuo katĩ wa Yavini mũsumbĩ wa Asoli na nyũmba ya Eeveli, ũla waĩ Mũkeni. 18 Nĩvo ĩndĩ Yaeli waumaalile akomane na Sisela na amwĩa: “Lika, mwĩai wakwa, lika vaa. Ndũkakĩe.” Kwoou alika ĩeemanĩ yake, na amũvwʼĩka ĩvula. 19 Na ĩndĩ Sisela amwĩa: “Nĩngũkwĩsũva, mwa nenga kĩwʼũ kĩnini nĩnywʼe, nũndũ nĩĩwʼa waũni.” Kwoou Yaeli akunũa sũva wa kĩthuma wĩ na ĩia na amũnenga anywʼa, na ĩtina wa ũu amũvwʼĩka ĩngĩ. 20 Sisela amwĩie atĩĩ: “Ũngama mũomonĩ wa ĩeema, na mũndũ o na wĩva ooka na aũkũlya, ‘Ve mũndũũme wĩ vaa?’ mwĩe, ‘Aiee!’”
21 Ĩndĩ Yaeli mũka wa Eeveli nĩwoosie kyambo kya ĩeema na nyũndo. Na ĩndĩ yĩla Sisela wakomete akalĩkwa na e mũnou vyũ, Yaeli nĩwamũthengeeie kavola na akũnĩĩa kyambo kĩu ngalĩkonĩ ĩmwe ya mũtwe wake nginya amũkwatanyʼa na mũthanga, na akwʼa.
22 Mbalaka nĩwaendie vau aatĩĩe Sisela, na ĩndĩ Yaeli aumaala akomane nake na asya: “Ũka na nĩngũkwonyʼa mũndũũme ũla ũũmantha.” Mbalaka nĩwalikile ĩeemanĩ e na Yaeli na oona Sisela e mũkwʼũ, na kyambo kya ĩeema kĩathĩĩwe mũtwe kwake kĩkakuthũka.
23 Kwoou mũthenyanĩ ũsu, Ngai nĩwamũsindie Yavini mũsumbĩ wa Kanaanĩ mbee wa Aisilaeli. 24 Kwʼoko kwa Aisilaeli nĩkweethĩiwe kwĩ kũito mũno ĩũlũ wa Yavini mũsumbĩ wa Kanaanĩ, nginya mamwananga Yavini mũsumbĩ wa Kanaanĩ.