Ĩvuku ya Kelĩ ya Asumbĩ

1 Ĩtina wa Aavu kũkwʼa, Moavi nĩyangʼendeie Isilaeli.

2 Ĩvindanĩ yĩu, Aasia e Samalia nĩwavalũkile kuma mwanyanĩ wakelanĩtwʼe mĩtĩ ũla waĩ kasũmbanĩ ka ĩũlũ ka nyũmba yake na aũmĩa. Na kwoou atũma andũ, aimea atĩĩ: “Endai mũkakũlye Mbaali-nzevuvu ngai ya Ekiloni mũmanye kana nĩngũvoa vala nĩũmĩĩte.” 3 Ĩndĩ mũlaĩka wa Yeova amwĩa Eliya,* ũla waĩ Mũtisivi: “Ũkĩla ũkakomane na andũ ala matũmĩtwe nĩ mũsumbĩ wa Samalia na ũimea atĩĩ: ‘Mũendete kũkũlya ũndũ ũũ vala ve Mbaali-nzevuvu ngai ya Ekiloni nĩkwĩthĩwa kũi Ngai Isilaeli? 4 Nũndũ wa ũu, ũũ nĩwʼo Yeova ũkwasya: “Ndwĩũkĩla kĩtandanĩ kĩla ũkomete, nĩkwĩthĩwa vate ndĩi nũũkwʼa.”’” Na ĩtina wa ũu, Eliya athi.

5 Na yĩla andũ asu mamũsyokeie, vau kwa vau amakũlya: “Mwasyoka nĩkĩ?” 6 Namo mamwĩa: “Ve mũndũũme wooka akomane naitũ, na atwĩa: ‘Syokai kwa mũsumbĩ ũla wamũtũma na mũimwĩa atĩĩ: “Ũũ nĩwʼo Yeova ũkwasya: ‘Ũtũmanĩte ũkakũlĩlwʼe ũndũ ũũ vala ve Mbaali-nzevuvu ngai ya Ekiloni nĩkwĩthĩwa kũi Ngai Isilaeli? Nũndũ wa ũu, ndwĩũkĩla kĩtandanĩ kĩla ũkomete, nĩkwĩthĩwa vate ndĩi nũũkwʼa.’”’” 7 Na ĩndĩ amakũlya: “Mũndũ ũla wooka akomana nenyu na amũtavya ndeto isu eeilye ata?” 8 Namo mamũsũngĩa mamwĩa: “Mũndũ ũsu eĩ na ngũa yĩ na wʼĩa na eĩyovete mũsivi wa kĩthuma kĩnyunyunĩ kyake.” Na vau kwa vau amea: “Ũsu nĩ Eliya ũla Mũtisivi.”

9 Na ĩndĩ mũsumbĩ amũtũmĩa mũnene wa asikalĩ 50 vamwe na asikalĩ make 50. Na yĩla maendie vala ũĩ, mamwĩthĩa ekalĩte kĩĩmanĩ ĩũlũ. Na mũnene ũsu amwĩa: “We mũndũ wa Ngai ũla wa wʼo, mũsumbĩ easya, ‘Theea.’” 10 Ĩndĩ Eliya asũngĩa mũnene ũsu wa asikalĩ 50 amwĩa: “Ethĩwa nĩ wʼo nĩ mũndũ wa Ngai, mwaki nũtheee kuma matunĩ na ũikũvĩvanĩsya na aũme maku 50.” Na mwaki watheea kuma matunĩ na wamũvĩvanĩsya na aũme make 50.

11 Na kwoou mũsumbĩ amũtũmanĩa mũnene ũngĩ wa asikalĩ 50 vamwe na asikalĩ make 50. Na athi vala ve Eliya na amwĩa: “We mũndũ wa Ngai ũla wa wʼo, ũũ nĩwʼo mũsumbĩ ũkwasya, ‘Theea na mĩtũkĩ.’” 12 Ĩndĩ Eliya amasũngĩa atĩĩ: “Ethĩwa nĩ wʼo nĩ mũndũ wa Ngai ũla wa wʼo, mwaki nũtheee kuma matunĩ na ũikũvĩvanĩsya na aũme maku 50.” Na mwaki wa Ngai watheea kuma matunĩ na wamũvĩvanĩsya na aũme make 50.

13 Na ĩndĩ mũsumbĩ atũma ĩngĩ mũnene wa katatũ wa asikalĩ 50 vamwe na asikalĩ make 50. Ĩndĩ mũnene ũsu wa katatũ wa asikalĩ 50 ambata na akumanĩa Eliya atulĩtye ndu na ambĩĩa kũmwĩsũva amwonyʼe ũseo, aimwĩa: “We mũndũ wa Ngai ũla wa wʼo, nĩngũkwĩsũva, eka thayũ wakwa na thayũ wa athũkũmi aa maku 50 wĩthĩwe wĩ wa vata methonĩ maku. 14 Yu mwaki nũminĩte kũtheea kuma matunĩ na ũkavĩvya anene elĩ ma asikalĩ 50 vamwe na ikundi syoo sya asikalĩ 50, ĩndĩ yu eka thayũ wakwa wĩthĩwe wĩ wa vata methonĩ maku.”

15 Nĩvo ĩndĩ mũlaĩka wa Yeova wamwĩie Eliya: “Theea vamwe nake. Ndũkamũkĩe.” Na kwoou ookĩla na atheeanyʼa nake vala ve mũsumbĩ. 16 Na ĩndĩ Eliya amwĩa mũsumbĩ, “Ũũ nĩwʼo Yeova ũkwasya: ‘Nũtũmie andũ makakũlye Mbaali-nzevuvu ngai ya Ekiloni ĩũlũ wa ũndũ ũũ. Wĩkie ũu nĩkwĩthĩwa kũi Ngai Isilaeli? Nĩkĩ ũtanakũlya kuma kwake? Nũndũ wa ũu, ndwĩũkĩla kĩtandanĩ kĩla ũkomete, nĩkwĩthĩwa vate ndĩi nũũkwʼa.’” 17 Na kwoou akwʼa, kwosana na ndeto ya Yeova ĩla Eliya waneenete; na nũndũ ndaĩ na kĩmwana, Yeolamu* atwʼĩka mũsumbĩ vandũ vake, mwakanĩ wa kelĩ wa Yeolamu mwana wa Yeosavati mũsumbĩ wa Yuta.

18 Na ngewa ĩla ĩngĩ ya Aasia, maũndũ ala weekie, yo ti mbandĩke ĩvukunĩ ya ngewa ya mavinda ma asumbĩ ma Isilaeli?