Ĩvuku ya Kelĩ ya Asumbĩ
2 Ĩvindanĩ yĩla Yeova waĩ vakuvĩ kwambatya Eliya matunĩ* na kĩuutani, Eliya na Elisa nĩmaumie Ngilikali. 2 Na Eliya amwĩa Elisa: “Ĩkala vaa, nĩngũkwĩsũva, nũndũ Yeova nũndũmĩte nĩthi Mbetheli.” Ĩndĩ Elisa asya: “Vate nzika, o tondũ Yeova wĩ thayũ na o tondũ we wĩ thayũ, ndiũtia.” Na kwoou matheea Mbetheli. 3 Na ĩndĩ ana ma athani* kũu Mbetheli mooka vala ve Elisa na mamwĩa: “Nĩwĩsĩ kana ũmũnthĩ Yeova nũkwosa vwana waku na ndakethĩawa mũtongoi ĩũlũ waku?” Nake Elisa amea: “Nĩnĩsĩ ũu. Vindyai.”
4 Na ĩndĩ Eliya amwĩa Elisa: “Ĩkala vaa Elisa, nĩngũkwĩsũva, nũndũ Yeova nũndũmĩte nĩthi Yeliko.” Ĩndĩ Elisa asya: “Vate nzika, o tondũ Yeova wĩ thayũ na o tondũ we wĩ thayũ, ndiũtia.” Na kwoou mathi Yeliko. 5 Na ana ma athani ala maĩ Yeliko mamũthengeea Elisa na mamwĩa: “Nĩwĩsĩ kana ũmũnthĩ Yeova nũkwosa vwana waku na ndakethĩawa mũtongoi ĩũlũ waku?” Nake Elisa amea: “Nĩnĩsĩ ũu. Vindyai.”
6 Na ĩndĩ Eliya amwĩa Elisa: “Ĩkala vaa, nĩngũkwĩsũva, nũndũ Yeova nũndũmĩte nĩthi Yolotani.” Ĩndĩ Elisa asya: “Vate nzika, o tondũ Yeova wĩ thayũ na o tondũ we wĩ thayũ, ndiũtia.” Na kwoou maendeea kũthi ĩmwe. 7 Na yĩla Eliya na Elisa maũngamie ũtee wa Yolotani, ana 50 ma athani o namo nĩmaendie na maũngama mamasyaĩĩsye me o vaasanga. 8 Nĩvo ĩndĩ Eliya waumisye ngũa yake* na amĩkũnza na akũna kĩwʼũ kĩu nayo, nakyo kyaanĩka ngalĩko ya kwʼoko kwa aka na ngalĩko ya kwʼoko kwa aũme, na elĩ mainga makinyĩle nthĩ nyũmũ.
9 Na mamina kũinganĩsya oou, Eliya amwĩa Elisa: “Weta kĩla ũkwenda ngwĩke ndanamba kwoswa kuma vala ũĩ.” Na Elisa amwĩa: “Mwa no nĩkwate ilungu ilĩ sya veva waku?” 10 Nake amũsũngĩa: “Wakũlya ũndũ wĩ vinya. Ethĩwa yĩla ngwĩthwa ndyoswa kuma vala ũĩ nũũmbona, ũndũ ũsu nũkwĩkĩka; ĩndĩ ethĩwa ndwĩmbona, ũndũ ũsu ndwĩĩkĩka.”
11 Na me o nzĩanĩ maendete maiea ngewa, ĩkasya ya mwaki na mbalasi sya mwaki syaumĩla na mĩtũkĩ na syamataananyʼa me elĩ, na Eliya ambatwʼa matunĩ* e kĩuutaninĩ. 12 Na Elisa asya ũũ na wasya mũnene amũsyaĩĩsye: “Ĩthe wakwa, ĩthe wakwa! Ĩkasya ya Isilaeli na atwai make ma mbalasi!” Na yĩla Eliya wathelekeilye weethĩa Elisa ndatonya kũmwona, Elisa nĩwakwatie ngũa syake na aitembũanĩlya katĩ syatwʼĩka ilungu ilĩ. 13 Ĩtina wa ũu, nĩwoosie ngũa* ĩla Eliya wavalũkĩtye na asyoka na aũngama ũtumonĩ wa Yolotani. 14 Na ĩndĩ oosa ngũa* ĩla Eliya wavalũkĩtye na akũna kĩwʼũ kĩu nayo na asya: “Aĩ va Yeova, Ngai wa Eliya?” Na yĩla wakũnie kĩwʼũ kĩu, kyaanĩka ngalĩko ya kwʼoko kwa aka na ngalĩko ya kwʼoko kwa aũme, na kwoou Elisa ainganĩsya.
15 Na yĩla ana ma athani kũu Yeliko mamwonie e o vaasanga, masya: “Veva wa Eliya wĩ ĩũlũ wa Elisa.” Na mathi makomane nake na mamũkumanĩa nginya nthĩ. 16 Na ĩndĩ mamwĩa: “Ithyĩ athũkũmi maku twĩ na aũme 50 vaa me na vinya. Nĩtũũkwĩsũva ũmaeke mathi makamanthe vwana waku. Kotethwa veva wa* Yeova wamũkĩlya na wamwĩkya kĩĩmanĩ kana o mwandanĩ.” Ĩndĩ amea: “Mũikamatũme.” 17 Ĩndĩ maendeea kũmũthingʼĩĩsya nginya esa kwĩwʼa nthoni, na kwoou asya: “Matũmei.” Nĩvo ĩndĩ matũmie aũme asu 50, na mamũmantha mĩthenya ĩtatũ ĩndĩ mayaamwona. 18 Yĩla masyokie vala ve Elisa, mamwĩthĩie ayĩkala Yeliko. Na ĩndĩ amea: “Ndineemwĩa mũikathi?”
19 Ĩtina wa ĩvinda, aũme ma ndũa ĩsu nĩmaneenie na Elisa, na mamwĩa: “We vwana wakwa, nĩwene kana ndũa ĩĩ yĩ vandũ vaseo; ĩndĩ kĩwʼu kyayo nĩ kĩthũku, na ĩ nthĩ ndĩsyaaa.”* 20 Nake amea: “Ndeteei kavakũli kataatũmĩwa ĩngĩ na mũikekĩa mũnyũ.” Na mamũetea. 21 Na Elisa athi vala ve nthongo ya* kĩwʼũ na ekya mũnyũ ũsu vo na asya: “Ũũ nĩwʼo Yeova ũkwasya, ‘Nĩnavosya kĩw’ũ kĩĩ. Kĩikaaete kĩkwʼũ ĩngĩ kana kĩtume kwĩthĩwa kũte na ũsyao.’”* 22 Na kĩwʼũ kĩu nĩkyavoiwʼe kũvika o na ũmũnthĩ, kwosana na ndeto ĩla Elisa waneenie.
23 Kuma vau nĩwambatie nginya Mbetheli. Na e nzĩanĩ aendete, tũmwana tũmwe twauma ndũanĩ na twaambĩĩa kũmũthekeea na kĩvũthya, na twatindĩaa kũmwĩa: “Ambata, ũvaa ũũ! Ambata, ũvaa ũũ!” 24 Mũthya, nĩwavĩndũkie atũsisya na atũumanĩa ĩsyĩtwanĩ ya Yeova. Na ĩndĩ nduva ilĩ nga syauma kĩthekanĩ na syatembũanga syana 42 katĩ wa isu syamũthekeaa. 25 Na athi nginya Kĩĩmanĩ kya Kalimeli, na kuma vau asyoka Samalia.