Ĩvuku ya Kelĩ ya Asumbĩ
7 Na ĩndĩ Elisa asya, “Ĩthukĩĩsyei ndeto ya Yeova. Ũũ nĩwʼo Yeova ũkwasya: ‘Ũnĩ saa ta ii mũvĩanĩ wa* Samalia, kĩthimo kĩmwe kya sea* kya mũtu mũvinyu kĩkeethĩwa kĩithoowʼa sekeli ĩmwe,* na ithimo ilĩ sya sea sya mbaale ikeethĩwa iithoowʼa sekeli ĩmwe.’” 2 Nĩvo ĩndĩ kavuteni ũla mũsumbĩ waĩkĩĩe vyũ weeie mũndũ ũsu wa Ngai ũla wa w’o atĩĩ: “O na Yeova akavingũa mbũthi sya matunĩ, ũndũ ũsu* nũtonyeka?” Nake amũsũngĩa amwĩa: “Ũkoona ũndũ ũsu na metho maku, ĩndĩ ndũkaya ũ lĩu.”
3 Yu ĩndĩ, mũvĩanĩ wa ndũa ĩsu vaĩ andũ ana maĩ na mangũ. Andũ asu meeanie atĩĩ: “Twĩĩkala vaa nginya tũkwʼe nĩkĩ? 4 Twasya, ‘Nĩtũlike ndũanĩ,’ nĩtũũkwʼĩĩa vo nũndũ yũa yĩinamba kũthela ndũanĩ. Na twaendeea kwĩkala vaa, no tũũkwʼa. Kwoou nĩtũendei kambinĩ ya Asilia. Matũeka, nĩtũkwĩkala thayũ, ĩndĩ matwʼa kũtũaa, noou nĩtũũkwʼa.” 5 Yĩla kwambĩĩe kũmesya ũmololi, nĩmookĩlile na mathi kambinĩ ya Asilia. Na yĩla mavikie ndeenĩ sya kambi ya Asilia, mayaaona mũndũ o na ũmwe.
6 Nĩkwĩthĩwa Yeova nĩwatumie Asilia ala maĩ kambinĩ mewʼa kelele wa makasya ma kaũ na mbalasi, o ta kelele wa nguthu nene ya asikalĩ. Na kwoou meeana atĩĩ: “Sisya! Mũsumbĩ wa Isilaeli nũĩvĩte asumbĩ ma Aititi na asumbĩ ma Misili nĩ kana moke kũkita naitũ!” 7 Na kwoou mookĩla na mĩtũkĩ kwĩ na ũmololi na masemba makĩĩte; nĩmatiie maeema moo, mbalasi syoo, mangʼoi moo, na kambi yonthe iilye o ũndũ yailye, na masemba makĩsye mathayũ moo.
8 Yĩla ala andũ maĩ na mangũ mavikie ndeenĩ sya kambi, nĩmalikile ĩeemanĩ yĩmwe na mambĩĩa kũya na kũnywʼa. Na moosa vo vetha, thaavu, na ngũa na mathi kũivitha. Na masyoka ĩngĩ na malika ĩeemanĩ yĩngĩ na moosa syĩndũ vo na mathi kũivitha.
9 Mũthya, meeanie atĩĩ: “Ũndũ ũũ tũkwĩka ti mũseo. Ũũ nĩ mũthenya wa ũvoo mũseo! Twaendeea kwĩkala nginya kũkye, twĩĩthĩwa twaĩlĩte kwosewa ĩtambya. Kwoou nĩtũendei nyũmbanĩ ya mũsumbĩ na tũiweta ũndũ ũũ.” 10 Na kwoou mathi na meeta asũvĩi ma mĩomo ya ndũa na wasya mũnene na mamea atĩĩ: “Nĩtũendie kambinĩ ya Asilia, ĩndĩ tũinethĩa mũndũ vo; tũinewʼa wasya wa mũndũ o na ũmwe. Kĩla kĩĩ vo no mbalasi syovetwe na mangʼoi movetwe na maeema matiĩtwe mailye o ũndũ meeilye.” 11 Na vau kwa vau asũvĩi asu maĩ mũvĩanĩ wa ndũa meetana na wasya, na ũndũ ũsu watavwʼa ala maĩ nyũmbanĩ ya mũsumbĩ.
12 Na ndatĩkanĩ ĩsu, mũsumbĩ ookĩla ũtukũ na eea athũkũmi make atĩĩ: “Mwa ekai nĩmũtavye ũndũ ũla Asilia matwĩkĩte. Nĩmesĩ kana twĩ na nzaa, na kwoou matiie kambi na mathi kwĩvitha kĩthekanĩ, mayasya, ‘Nĩmekumaala nza wa ndũa, na nĩtũũmakwata me thayũ na tũilika ndũanĩ yoo.’” 13 Na ĩndĩ ũmwe wa athũkũmi make asya: “Nĩngũkwĩsũva, eka aũme meana ũna mose mbalasi itano katĩ wa ila itialĩte ndũanĩ. Sisya! Mũthya woo wĩĩthĩwa ũilye o ta wa ĩkomano yonthe ya Isilaeli yĩla yĩtialĩte vaa. Sisya! Mũthya woo wĩĩthĩwa ũilye o ta wa ĩkomano yonthe ya Isilaeli yĩla yĩkwʼĩte. Ekai ĩndĩ tũmatũme masisye kĩla kĩendeee.” 14 Na kwoou moosa makasya elĩ na mbalasi, na mũsumbĩ amatũma kambinĩ ya Asilia, aimea: “Endai mũkasisye kĩla kĩendeee.” 15 Na mamaatĩĩa nginya Yolotani, na nzĩa yonthe ĩla maendie nayo yausũĩte ngũa na mĩio ĩla Asilia masembie mekangĩtye nĩ kũtelema. Na aũme asu matũmĩtwe masyoka na matavya mũsumbĩ ũndũ ũsu.
16 Nĩvo ĩndĩ andũ maumaalile na mathi kwosa mũtavo kambinĩ ya Asilia, na moosa mũtavo mwingĩ nginya weethĩa kĩthimo kĩmwe kya sea kya mũtu mũvinyu kĩthoowʼa sekeli ĩmwe, na ithimo ilĩ sya sea sya mbaale syĩthoowʼa sekeli ĩmwe, kwosana na ndeto ya Yeova. 17 Na mũsumbĩ nĩwanyuvĩte kavuteni ũmũĩkĩĩe vyũ nĩ kana asungae mũvĩa wa ndũa, ĩndĩ andũ mamũkinyangĩa vau mũvĩanĩ nginya akwʼa, o tondũ mũndũ wa Ngai ũla wa w’o watavĩtye mũsumbĩ yĩla watheeie vala ũĩ. 18 Ũndũ ũsu weekĩkie o tondũ mũndũ wa Ngai ũla wa w’o watavĩtye mũsumbĩ yĩla wamwĩie: “Ithimo ilĩ sya sea sya mbaale ikeethĩwa iithoowʼa sekeli ĩmwe, na kĩthimo kĩmwe kya sea kya mũtu mũvinyu kĩkeethĩwa kĩithoowʼa sekeli ĩmwe ũnĩ saa ii mũvĩanĩ wa Samalia.” 19 Ĩndĩ ũla kavuteni eeĩte mũndũ wa Ngai ũla wa w’o atĩĩ: “O na Yeova akavingũa mbũthi sya matunĩ, ũndũ ta ũsu* nũtonyeka?” Nake Elisa amũsũngĩĩte akamwĩa: “Ũkoona ũndũ ũsu na metho maku, ĩndĩ ndũkaya ũ lĩu.” 20 Ũndũ ũsu nowʼo wamũkwatie, nũndũ andũ nĩmamũkinyangĩie mũvĩanĩ nginya akwʼa.