Ĩvuku ya Kelĩ ya Asumbĩ
11 Yĩla Athalia inyia wa Aasia woonie kana mwana wake nĩwakwʼa, nĩwookĩlile na amina onthe ala maaĩlĩte kũtwʼĩka asumbĩ.* 2 Ĩndĩ Yeosieva, ũla waĩ mwĩĩtu wa Mũsumbĩ Yeolamu na wasyaanĩwʼe na Aasia, nĩwooyie Yeoasi mwana wa Aasia amũvetanga katĩ wa ana ma mũsumbĩ ala maaĩlĩte kũawa, na amwia vamwe na mũsũvĩi wake lumunĩ ya nthĩnĩ ya kũkoma. Nĩmavotie kũmũvitha ndakoneke nĩ Athalia, na nũndũ wa ũu, ndaaũawa. 3 Yeoasi ekalile nake myaka thanthatũ, avithĩtwe nyũmbanĩ ya Yeova, ĩvindanĩ yĩla Athalia wasumbĩkĩte Yuta.
4 Mwakanĩ wa mũonza, Yeoiata nĩwatũmanie anene ma maana ala maũngamĩe asungi ma mũsumbĩ* na ala maũngamĩe asungi ma nyũmba ya mũsumbĩ,* na mooka vala waĩ nyũmbanĩ ya Yeova. Na aseũvya wĩwʼano* vamwe namo na atuma mevĩtĩa nyũmbanĩ ya Yeova kana nĩmeũlũmanyʼa nawʼo, na ĩndĩ amonyʼa mwana wa mũsumbĩ. 5 Na ameaĩa ũũ: “Ũũ nĩwʼo mũkwĩka: Kĩlungu kya katatũ kya ũtalo wenyu kĩkathũkũma mũthenya wa Savato na kĩisunga nesa vyũ nyũmba ya mũsumbĩ, 6 na kĩlungu kĩngĩ kya katatũ kĩkeethĩwa Mũvĩanĩ wa Mũsingi, na kĩlungu kĩla kĩngĩ kya katatũ kĩkeethĩwa mũvĩanĩ ũla wĩ ĩtina wa asungi ma nyũmba ya mũsumbĩ. Mũkaumanĩasya kũsunga nyũmba ĩsu. 7 Ikundi ilĩ ila syaĩlĩte kũthũmũa mũthenyanĩ wa Savato syaĩlĩte kũsunga nesa vyũ nyũmba ya Yeova nĩ kana isũvĩe mũsumbĩ. 8 No nginya mũthyũlũlũke mũsumbĩ kĩla ngalĩko, kĩla ũmwe akwete mĩio yake ya kaũ. Na mũndũ o na wĩva ũkũtata kũvĩtũka asungi, aĩlĩte kũawa. Ĩkalai vakuvĩ na mũsumbĩ vonthe vala ũkũthi.”*
9 Anene asu ma maana nĩmeekie o ũndũ mũthembi Yeoiata wameaĩe. Na kwoou kĩla ũmwe woo oosa aũme make ala maaĩlĩte kũthũkũma mũthenyanĩ wa Savato, o vamwe na ala maaĩlĩte kũthũmũa mũthenyanĩ wa Savato, na malika vala mũthembi Yeoiata waĩ. 10 Na ĩndĩ mũthembi anenga anene asu ma maana matumo na ngao sya kĩlinge sya Mũsumbĩ Ndaviti, ila syaĩ nyũmbanĩ ya Yeova. 11 Na asungi ma nyũmba ya mũsumbĩ maũngama, kĩla ũmwe vandũ vake akwete mĩio yake ya kaũ kwʼokonĩ kwake, kuma ngalĩko ya kwʼoko kwa aũme kwa nyũmba ĩsu nginya ngalĩko ya kwʼoko kwa aka kwa ĩ nyũmba, amwe ũtee wa kĩthembeo na angĩ ũtee wa ĩ nyũmba, mathyũlũlũkĩte mũsumbĩ. 12 Na ĩndĩ Yeoiata aumaalya mwana wa mũsumbĩ na amwĩkĩa ngovia ya ũsumbĩ* na amwilĩĩla ũla Ũkũsĩ,* na mamũtwʼĩkĩthya mũsumbĩ na mamwĩtĩkĩsya mauta. Na mambĩĩa kũkũnanga moko mayasya: “Mũsumbĩ nĩekale ĩvinda yĩasa!”
13 Yĩla Athalia weewie matuu ma andũ masembete, ndatĩkanĩ ĩsu nĩwaendie vala ve andũ asu nyũmbanĩ ya Yeova. 14 Na ĩndĩ Athalia oona mũsumbĩ aũngeme ũtee wa kĩla kĩtuĩ, o tondũ kweekawa. Na anene na avuvi ma masoo maĩ na mũsumbĩ, na andũ onthe ma ĩ nthĩ maĩ atanu na makwetye kũvuva masoo. Yĩla Athalia woonie ũu, nĩwatembũie ngũa syake na asya ũũ na wasya mũnene: “Avũnyanĩi! Avũnyanĩi!” 15 Ĩndĩ mũthembi Yeoiata eeaĩa anene ma maana ala manyuvĩtwe maũngamĩe ita, aimea atĩĩ: “Mũvetangei vaa ve asungi, na mũndũ o na wĩva amũatĩĩa, mũaei na ũvyũ!” Nũndũ mũthembi ũsu aĩtye: “Mũikamũaĩe nyũmbanĩ ya Yeova.” 16 Na kwoou mamũkwata na vinya, na yĩla wavikie vandũ vala mbalasi syalikĩlaa nyũmbanĩ ya mũsumbĩ, mamũaĩa vo.
17 Na ĩndĩ Yeoiata aseũvya ũtianĩo katĩ wa Yeova na mũsumbĩ na andũ, na meevĩta kana meendeea kwĩthĩwa andũ ma Yeova; o na ĩngĩ, nĩwaseũvisye ũtianĩo katĩ wa mũsumbĩ na andũ. 18 Ĩtina wa ũu, andũ onthe ma nthĩ ĩsu nĩmalikile nyũmbanĩ* ya Mbaali na maomboanga ithembeo syake, na matumbatumba vyũ mĩvwʼanano yake, na mooaĩa Matani mũthembi wa Mbaali vau mbee wa ithembeo.
Na ĩndĩ mũthembi Yeoiata anyuva asyaĩĩsya maũngamĩe nyũmba ya Yeova. 19 Eka ũu, nĩwoosie ala anene ma maana, asungi ma mũsumbĩ,* asungi ma nyũmba ya mũsumbĩ, na andũ onthe ma ĩ nthĩ nĩ kana maumaasye mũsumbĩ mamũtheesye kuma nyũmbanĩ ya Yeova, na mavika nyũmbanĩ ya mũsumbĩ maendete na nzĩa ĩla yĩsĩle mũvĩanĩ wa asungi ma nyũmba ya mũsumbĩ. Na ĩndĩ ekalĩla kĩvĩla kya asumbĩ. 20 Na kwoou andũ onthe ma nthĩ ĩsu matana na ndũa yausya, nĩkwĩthĩwa nĩmooaie Athalia na ũvyũ e nyũmbanĩ ya mũsumbĩ.
21 Yeoasi aĩ na myaka mũonza yĩla watwʼĩkie mũsumbĩ.