Ĩvuku ya Kelĩ ya Asumbĩ
16 Mwakanĩ wa 17 wa Veka mwana wa Lemalia, Aasu mwana wa Mũsumbĩ Yothamu wa Yuta nĩwatwʼĩkie mũsumbĩ. 2 Aasu aĩ na myaka 20 yĩla watwʼĩkie mũsumbĩ, na asumbĩkie myaka 16 e Yelusalemu. Ndaaĩka kĩla kyaĩlĩte methonĩ ma Yeova Ngai wake o tondũ Ndaviti ũmae wake weekĩte. 3 Vandũ va ũu, akinyĩile nzĩanĩ ya asumbĩ ma Isilaeli; o na nĩwavĩtĩilye mwana wake mwakinĩ, aatĩĩe imanyĩo sya kũthatya sya mbaĩ ila Yeova walũngĩtye ikauma mbee wa Aisilaeli. 4 Na eka ũu, nĩwaendeeie kũthemba nthembo na kũtuma itoa kũndũnĩ kũtũlu, tũlĩmanĩ, na ungu wa kĩla mũtĩ wĩ matũ maingĩ.
5 Ĩvinda yĩu nĩwʼo Mũsumbĩ Lesini wa Silia na Veka mwana wa Lemalia mũsumbĩ wa Isilaeli mambatie mavithũkĩe Yelusalemu. Na mathyũlũlũka Aasu, ĩndĩ mayaatonya kũkwata ndũa ĩsu. 6 Ĩvindanĩ yĩu, Mũsumbĩ Lesini wa Silia nĩwatũngĩie andũ ma Etomu ndũa ya Elathi, na ĩtina wa ũu, alũngya Ayuti* mauma Elathi. Na ĩndĩ Aetomu malika Elathi, na nĩ vo matwĩe nginya ũmũnthĩ. 7 Na kwoou Aasu atũma andũ kũla kwĩ Mũsumbĩ Tikilathi-vileseli wa Asuli mamũtavye atĩĩ: “Nyie nĩ mũthũkũmi waku na mwana waku. Ambata ũmbonokye kuma kwʼokonĩ kwa mũsumbĩ wa Silia na kwʼokonĩ kwa mũsumbĩ wa Isilaeli, nũndũ nĩmambithũkĩĩte.” 8 Nĩvo ĩndĩ Aasu woosie vetha na thaavu ũla waĩ nyũmbanĩ ya Yeova na ũla waĩ kũla kwaiawa ũthwii wa nyũmba ya mũsumbĩ na aũnengane ũtwaĩwe mũsumbĩ wa Asuli nĩ kana wĩthĩwe ĩvaki. 9 Na mũsumbĩ wa Asuli eetĩkĩlana nake, na ambata nginya Ndamasikũ na amĩkwata na oosa andũ mayo ta mũtavo na amatwaa Kili, na ooaa Lesini.
10 Na ĩndĩ Mũsumbĩ Aasu athi akomanĩe na Mũsumbĩ Tikilathi-vileseli wa Asuli kũu Ndamasikũ. Yĩla Mũsumbĩ Aasu woonie kĩthembeo kĩla kyaĩ Ndamasikũ, atũmĩa mũthembi Uliya mũsolo wa kĩthembeo kĩu, wonanĩtye ũndũ kyailye na ũndũ kyaakĩtwe. 11 Na ĩndĩ mũthembi Uliya aaka kĩthembeo aatĩĩe mĩtalatala yonthe ĩla Mũsumbĩ Aasu watũmanie kuma Ndamasikũ. Mũthembi Uliya aminie kwaka kĩthembeo kĩu Mũsumbĩ Aasu atanamba kũsyoka kuma Ndamasikũ. 12 Yĩla mũsumbĩ wasyokie kuma Ndamasikũ na oona kĩthembeo kĩu, nĩwakĩthengeeie na athemba nthembo ĩũlũ wakyo. 13 Na aendeea kũtoeesya kĩthembeonĩ kĩu nthembo syake sya kũvĩvw’a na nthembo syake sya lĩu; o na ĩngĩ, nĩwetie nthembo syake sya kũnyuwa kĩthembeonĩ kĩu na aminzangĩsya ĩũlũ wakyo nthakame ya nthembo syake sya ngwatanĩo. 14 Na ĩndĩ avetanga kĩthembeo kya ũthuku vala kyaĩ mbee wa Yeova, ngalĩkonĩ ya mbee ya nyũmba ya Ngai; nĩwakĩvetangie katĩkatĩ wa kĩthembeo kyake na nyũmba ya Yeova, na akĩia ngalĩko ya ĩũlũ ya kĩthembeo kyake. 15 Na Mũsumbĩ Aasu eeaĩa mũthembi Uliya, aimwĩa: “Toeesya nthembo ya kũvĩvwʼa ya kwakya ĩũlũ wa kĩthembeo kĩu kĩnene, o na nthembo ya lĩu ya ĩ ya wĩoo, nthembo ya kũvĩvwʼa ya mũsumbĩ, na nthembo yake ya lĩu, o vamwe na nthembo sya kũvĩvw’a, nthembo sya lĩu, na nthembo sya kũnyuwa sya andũ onthe. O na nĩwaĩlĩte kũminzangĩsya ĩũlũ wakyo nthakame yonthe ya nthembo sya kũvĩvwʼa na nthakame yonthe ya nthembo ila ingĩ. Na kwondũ wa kĩthembeo kĩla kya ũthuku, nĩngũmanya ũndũ ngwĩkana nakyo.” 16 Na mũthembi Uliya eeka kyonthe kĩla Mũsumbĩ Aasu wamwĩaĩe.
17 Na eka ũu, Mũsumbĩ Aasu nĩwatilangile tũmĩsevũ twa ala makasya na avetanga tũla tũlaĩ ĩũlũ wamo, na aveta ũla Ũkanga ĩũlũ wa ila nzaũ sya ũthuku syaũtwʼĩĩkĩte na awia vandũ vaseũvĩtwʼe na mavia malanyʼe. 18 Na nĩwavetangie kuma nyũmbanĩ ya Yeova mwako mũkunĩkĩlye wa Savato ũla waakĩtwe nyũmbanĩ ĩsu, o vamwe na mũomo wa nza ũla mũsumbĩ walikaa nawʼo; eekie ũu nũndũ wa mũsumbĩ wa Asuli.
19 Na ngewa ĩla ĩngĩ ya Aasu, maũndũ ala weekie, yo ti mbandĩke ĩvukunĩ ya ngewa ya mavinda ma asumbĩ ma Yuta? 20 Na ĩndĩ Aasu akwʼa na athikwa vamwe na aa-ũmae make Ndũanĩ ya Ndaviti; na mwana wake Esekia* atwʼĩka mũsumbĩ vandũ vake.