Syo Syĩndũ Syaumie Va?

Mbivilia yaĩtye kana Ngai nĩwe “wĩ na mbuluti ya thayũ.” (Savuli 36:9) We nũĩkĩĩaa ũu? Andũ amwe maasya kana kũi mũmbi. Ethĩwa ũu maasya nĩ wʼo, kĩu kĩonanyʼa kana twĩ thayũ nũndũ wa kĩndũ kyeekĩkie oou kĩtumbo, vate mũvango. Ĩndĩ wĩona ata? Ethĩwa Yeova Ngai nĩwe woombie syĩndũ syonthe, tyo nginya ethĩwe eekie ũu e na kĩtumi?a Eka twone Mbivilia ĩwetete ata ĩũlũ wa vala syĩndũ syaumie, na tũyona maũndũ matonya kũtũĩkĩĩthya kana kĩu ĩwetete nĩ kya wʼo.

1. Nthĩ na matu syaumie va?

Mbivilia yaĩtye atĩĩ: “Mwambĩlĩlyonĩ Ngai nĩwatwʼĩkĩthisye matu na nthĩ.” (Mwambĩlĩlyo 1:1) Andũ aingĩ ma saenzi nĩmetĩkĩlaa kana nthĩ na matu syĩ mwambĩlĩlyo. Ngai asyũmbangie ata? Atũmĩie ‘veva wake’ kũmba kĩla kĩndũ kĩ ĩũlũ wa nthĩ na matunĩ, o vamwe na ndata, ikundi sya ndata, na syĩndũ ingĩ.—Mwambĩlĩlyo 1:2.

2. Nĩkĩ Ngai woombie nthĩ?

Yeova ndaaũmba nthĩ yĩkale ‘yĩ nthei, amyũmbie yĩthĩwe ya kũtũa andũ.’ (Isaia 45:18) Oombie nthĩ yĩ mbanake nĩ kana yĩthĩwe ũtũo wa andũ tene na tene. (Soma Isaia 40:28; 42:5.) Andũ ma saenzi nĩmetĩkĩlaa kana nthĩ nĩ ya mwanya nũndũ yĩ kĩvathũkanyʼo na ndata ila ingĩ. Noyo yĩ yoka ĩtonya kũtũa andũ.

3. Nĩ kyaũ kĩtumaa andũ methĩwa me kĩvathũkanyʼo na nyamũ?

Yeova amina kũmba nthĩ, nĩwoombie syĩndũ syonthe ila syĩ nthĩnĩ wayo. Nĩwoombie mĩtĩ na nyamũ. Na ĩndĩ Ngai “atwʼĩkĩthya mũndũ na mũvwʼano wake.” (Soma Mwambĩlĩlyo 1:27.) Nĩ kyaũ kĩtumaa andũ methĩwa me kĩvathũkanyʼo na syĩndũ ila ingĩ? Nũndũ tũmbĩtwe na mũvwʼano wa Ngai, no twonanyʼe nguma syake, ta wendo na ũsili wa katĩ. O na ĩngĩ nĩwatũmbie twĩ na ũtonyi wa kwĩmanyĩsya ithyomo, tũtonya kwendeewʼa nĩ syĩndũ mbanake, na tũtonya kũtanĩa wathi. Na kĩvathũkanyʼo na nyamũ, nĩtũtonya kũmũthaitha Mũmbi waitũ.

ĨMANYĨSYE MŨNANGO

Ĩmanyĩsye wone kana syĩndũ syeekie kũmbwa, na kana maũndũ ala Mbivilia ĩwetete ĩũlũ wa wũmbi nĩmosanĩte na kĩlĩko. Sisya wone ũndũ nguma nzeo ila andũ methĩawa nasyo itũmanyĩasya ĩũlũ wa Ngai.

4. Syĩndũ syeekie kũmbwa

Andũ makathawa nũndũ wa syĩndũ mbingĩ ila maseũvasya masisya wũmbi. Kwoou nũũ waĩle kũkathwa nũndũ wa syĩndũ isu masyaasya nĩ kana maseũvye syoo? Ĩloelei VITIO, na ĩndĩ mũineenea ĩkũlyo yĩĩ yĩatĩĩe:

VITIO: Kũĩkĩĩa Kana kwĩ Ngai (2:43)

• Nĩ syĩndũ syĩva syoombiwe andũ masyaasya yĩla mekwenda kũseũvya syoo?

Kĩla nyũmba ĩsolawa na ĩyakwa nĩ mũndũ mũna. Ĩndĩ we nũũ ũla woombie syĩndũ syonthe? Somai Aevelania 3:4, na ĩndĩ mũineenea makũlyo aa:

• Nĩ syĩndũ syĩva syoombiwe wĩwʼaa iikwendeesya?

• We nũkwona ne ũndũ wosanĩte na kĩlĩko kũĩkĩĩa kana syĩndũ syonthe syeekie kũmbwa? Na nĩkĩ wasũngĩa ũu?

We nĩwĩsĩ?

No ũkwate mavuku na vitio ila ineeneete ĩsomo yĩĩ nthĩnĩ wa jw.org/kam ungu wa kyongo “Ve Ũla Woombie?” na “Maelesyo Ĩũlũ wa Vala Syĩndũ Syaumie.”

“Nĩ wʼo kana kĩla nyũmba yakawa nĩ mũndũ, ĩndĩ ũla woombie syĩndũ syonthe nĩ Ngai”

5. Ngewa ĩla yĩ Mbivilianĩ ĩneenete wũmbi nĩyosanĩte na kĩlĩko

VITIO: Nthĩ na Matu Syeekie Kũmbwa?—Kalungu ka Vitio (3:51)

• Yo Mbivilia ĩmanyĩasya kana nthĩ na syĩndũ syonthe ila syĩ nthĩnĩ wayo syoombiwe nthĩnĩ wa mĩthenya thanthatũ, kĩla mũthenya wĩ na masaa 24?

• We nũkwona ngewa ĩla yĩ Mbivilianĩ ĩkonetye wũmbi ta yosanĩte na kĩlĩko? Nĩkĩ wasũngĩa ũu?

Somai Mwambĩlĩlyo 1:1, na ĩndĩ mũineenea ĩkũlyo yĩĩ:

• Andũ ma saenzi nĩmetĩkĩlaa kana nthĩ na matu syĩ mwambĩlĩĩlyo. Woni ũsu woo wosanĩte ata na kĩla wasoma Mbivilianĩ?

Andũ amwe mekũlasya ethĩwa Ngai nĩwe watumie syũmbe syĩvĩndũa o kavola mũvaka syatwʼĩka syũmbe ingĩ. Somai Mwambĩlĩlyo 1:21, 25, 27, na ĩndĩ mũineenea makũlyo aa:

• Yo Mbivilia ĩmanyĩasya kana Ngai oombie kyũmbe kĩnini na ĩndĩ kyeevĩndũa o kavola kyesa kũtwʼĩka makũyũ, nyamũ, na andũ? Kana nĩwe woombie ‘mĩthemba’ yonthe ya syĩndũ ila syĩ thayũ?b

6. Ngai oombie andũ kwa nzĩa ya mwanya mũno

Twĩ kĩvathũkanyʼo vyũ na nyamũ ila Yeova woombie. Somai Mwambĩlĩlyo 1:26, na ĩndĩ mũineenea ĩkũlyo yĩĩ:

• Nũndũ tũmbĩtwe na mũvwʼano wa Ngai, ũtonyi witũ wa kwonanyʼa nguma ya wendo na tei, wonanasya ata ũndũ Ngai ũilyĩ?

KĨLA TWEEMANYĨSYA

Yeova nĩwe woombie nthĩ, matu, na syĩndũ ila syĩ nthĩnĩ wasyo.

Makũlyo ma Kũsyokeleela

• Mbivilia ĩmanyĩasya ata ĩũlũ wa vala nthĩ na matu syaumie?

• We Ngai oombie kyũmbe kĩnini na ĩndĩ kyeevĩndũa o kavola kyesa kũtwʼĩka mĩthemba yonthe ya syĩndũ ila syĩ thayũ, kana nĩwe wasyũmbie syonthe?

• Nĩkĩ andũ matesa kũelekanwʼa na syĩndũ ila ingĩ syoombiwe?

MAŨNDŨ ANGĨ MA KWĨMANYĨSYA

Soma wone ngelekanyʼo syĩkwonanyʼa kana kwĩ Mũmbi.

“Syĩndũ Ila Syĩ Thayũ Itũmanyĩasya Kyaũ?” (Amkeni!, Mwei wa 9, 2006)

Ĩloele wone ũndũ ĩthe ũtonya kũelesya kamwana kake kanini ngewa ĩla yĩ Mbivilianĩ ĩneeneete wũmbi.

Yeova Nĩwe Woombie Syĩndũ Syonthe (2:37)

Soma ũmanye ethĩwa Mbivilia nĩyĩtĩkĩlanĩte na ũmanyĩsyo wa kana syĩndũ syeekie kwĩyumĩlya.

“Ngai Oombie Kĩndũ Kĩmwe na Ĩndĩ Akĩeka Kyeevĩndũa o Kavola Kyaumĩlya Syĩndũ Ila Ingĩ Syonthe?” (Ũvoo wĩ kĩsesenĩ)

Soma wone syĩndũ sya tene na ũkunĩkĩli wa andũ ma saenzi wĩonanyʼa syĩndũ syeekie kũmbwa kana syeekie kwĩyumĩlya.

Makũlyo Atano ma Vata Ĩũlũ wa Vala Thayũ Waumie (kavuku)