Ũtavanyʼa Waku Nũilyĩ ta Ĩmwe?

ŨTAVANYʼA witũ nĩ wa vata mũno. Ĩndĩ ti andũ onthe tũmatavasya ũvoo mawonaa wĩ wa vata. O na kau andũ no mendeewʼe nĩ kĩla tũũmatavya, ti onthe monaa vata wa kũmanyĩwʼa Ndeto ya Ngai.

Ũu nĩwʼo Gavin wailyĩ. O na kau nĩwaendaa maũmbanonĩ, nĩwaleile kũmanyĩwʼa Mbivilia. Aĩtye ũũ: “Ndyeesĩ Maandĩko mũno, na ndyendaa andũ maimanya ũu. Nĩnakĩaa kũkengwa na ndyendaa kwĩyova.” We wĩsũanĩa ata? We wĩona Gavin ta waĩ mũndũ ũtatetheka? Ũu ti wʼo! Kwasũanĩa ũndũ momanyĩsyo ma Mbivilia matonya kũalyũla mwĩkalĩle wa mũndũ. Yeova eeie andũ make ma tene atĩĩ: “Kũneena kwakwa kũkavolotangaa ta ĩmwe, ta ũnyenyeũ nyekinĩ ya vuvĩ.” (Kũt. 31:19, 30; 32:2) Twasũanĩa nesa ũndũ ĩmwe yĩilyĩ no tũelewe ũndũ tũtonya kũtetheesya andũ ma mĩthemba yonthe nesa.—1 Tim. 2:3, 4.

ŨTAVANYʼA WITŨ ŨILYĨ ĨMWE ATA?

Ĩmwe yũmbanaa o kavola. Mĩthũmũ ĩla yĩ nzevenĩ yũmbanaa o kavola kavola ĩkesa kũtwʼĩka malovoto ma ĩmwe. Ndeto sya Yeova ‘syavolotangaa ta ĩmwe,’ na ũu nĩ kwasya kana ĩla ũkũneena na andũ make atũmĩaa ndeto nzeo, aneenaa auĩtye, na nĩwasũanĩaa kĩla ũkũweta. Twĩthĩawa twekala take ĩla twanenga ndaĩa mawoni ma ala angĩ. O na nĩtwĩkĩaa andũ vinya masũanĩe nemo, na kwa nzĩa ĩsu methĩawa matonya kwĩtwʼĩĩa maũndũ nemo ene. Ĩla tweeka maũndũ ta asu andũ nĩmatwĩthukĩĩasya mũno, na ũtavanyʼa witũ nĩwĩthĩawa na mosyao maingangĩ.

Ĩmwe nĩyĩsanzamũkasya syĩndũ. Ĩla twasũanĩa ũndũ tũtonya kũtetheesya andũ mendeewʼe mũnango, kĩla tũũmatavya nĩkĩmatethasya. Ũla Gavin wawetwa ndaathingʼĩĩwʼa nĩ mũndũ emanyĩsye Mbivilia. Mwana-a-asa ũla wamũkwatisye ya mbee etawa Chris, na vandũ va kũmũthingʼĩĩsya eekie kũmantha nzĩa syĩ kĩvathũkanyʼo sya kũmũtetheesya Gavin ewʼe e mwĩanĩe ĩla meũneenea maũndũ ala me Mbivilianĩ. Chris aeleisye Gavin kana ve ũndũ ũmwe mũnene Mbivilia ĩneenee, na kana kũmanya ũndũ ũsu nĩ wĩva no kũmũtetheesye akwatye kĩla kĩthĩawa kĩendeee maũmbanonĩ ala ũendaa. O na Chris nĩwesie kũmũtavya kana wathani ũla wĩ Mbivilianĩ nĩwʼo wamũĩkĩĩthisye kana Mbivilia nĩ ya wʼo. Ĩla wamũtavisye ũu, nĩmaneenie mavinda kauta ĩũlũ wa ũndũ mawathani meanĩĩte. Gavin eewie maũndũ asu mamwĩkĩa vinya na mũthya esa kwĩtĩkĩla kũmanyĩwʼa Mbivilia.

Ĩmwe nĩyĩtetheeasya syĩndũ iikome. Nthĩ ya Isilaeli nĩyĩthĩawa na thano wĩthĩawa wĩ mũvyũ, na mavinda asu nĩvathelaa myei kũtoneka mbua. Na kwoou mĩtĩ nĩvoovaa na ĩkoma yalea kũkwata kĩmeu kya ĩmwe. Ũmũnthĩ kwĩ mũnyao wa kĩ-veva o tondũ Yeova wathanie. (Amo. 8:11) Ĩndĩ nĩwathanie kana Aklĩsto etĩkĩwʼa mauta makethĩwa mailyĩ “ta ĩmwe kuma kwa Yeova,” maitavanyʼa ũvoo wa Ũsumbĩ makwetwe mbau nĩ “malondu angĩ.” (Mika 5:7; Yoa. 10:16) We nĩwonaa ũvoo mũseo wa Ũsumbĩ ta nzĩa ĩmwe ya Yeova ya kũtetheesya andũ maikakwʼe kĩ-veva?

Ĩmwe nĩ ũathimo Yeova ũtũnengete. (Kũt. 33:13) Ũtavanyʼa witũ no wĩthĩwe ũathimo kwa ala mekwĩthukĩĩsya. Gavin nĩwakwatie ũathimo ta ũsu. Ĩla wambĩĩe kũmanyĩwʼa Mbivilia nĩwakwatie mosũngĩo ma makũlyo ala weekũlasya. Eekie maendeeo mĩtũkĩ nginya avatiswa na ũmũnthĩ e na mũka, Joyce, nĩmatanĩaa kũtavanyʼa vyũ ũvoo mũseo wa Ũsumbĩ.

TALA ŨTAVANYʼA WAKU TA KĨNDŨ KYA VATA

Kũsũanĩa ĩũlũ wa ĩmwe nĩkũtonya kũũtetheesya we mwene wĩyumye ũtavanyʼe na kĩthito. Ata? Kalovoto kamwe ka ĩmwe kayĩsa kũkolya nthĩ, ĩndĩ kalovoto kau ke vamwe na tũngĩ twingĩ tũiema kũkolya nthĩ. O ta ũu ũtavanyʼa wa mũndũ ũmwe no woneke ta kaũndũ kanini. Ĩndĩ ũtavanyʼa wa athũkũmi onthe ma Yeova nũtumaa tumya ũkũsĩ ‘kwa mbaĩ syonthe.’ (Mt. 24:14) We nũkũeka angĩ mone ũtavanyʼa waku ta ũathimo kuma kwĩ Yeova? Ũkeethĩwa ũilyĩ ũu ethĩwa tũkaeka ũvoo ũla tũũtavanyʼa wĩkale ta ũndũ ĩmwe yĩthĩawa yĩilyĩ. Ĩmwe yũmbanaa o kavola, nĩyĩsanzamũkasya syĩndũ, na nĩyĩtetheeasya syĩndũ iikome.