Nĩwĩyũmbanĩtye Kwĩka Moalyũku Ũtavanyʼanĩ?

1. No nginya twĩke ata nũndũ wa moalyũku ala me ĩũlũ wa nthĩ?

¹ Nthĩnĩ wa ĩandĩko ya 1 Akolintho 7:31, nthĩ yĩelekanĩtwʼe na ũndũ maũndũ mavĩndũkaa nthĩnĩ wa ĩthaũ ya ndulama. Kwoou no nginya tũvĩndũe nzĩa sitũ sya kũtavanyʼa, mĩvango yitũ, na ũndũ twambĩĩaa kũneena na andũ ũtavanyʼanĩ nũndũ wa moalyũku ala me ĩũlũ wa nthĩ. Nĩwĩyũmbanĩtye kwĩka ũu?

2. Nĩkĩ twaĩlĩte kwĩthĩwa tũtonya kũvĩndũka nĩ kana tũendanyʼe na ũseũvyo wa Yeova?

² Nzĩa Ila Ũtũmĩaa Kũtavanyʼa: Nĩkwĩthĩĩtwe kwĩ na moalyũku kĩkundinĩ kya Kĩklĩsto kwosana na ĩvinda. Ĩla Yesũ watũmaa amanyĩwʼa make ĩvinda ya mbee, ameie maikakue lĩu kana mbesa. (Mt. 10:9, 10) Ĩtina nĩwameie makue syĩndũ isu nũndũ nĩweesĩ andũ maikamathokasya na nũndũ wa kwongeleka kwa isio ila maaĩlĩte kũtavanyʼa. (Luka 22:36) Myaka mingĩ mĩvĩtu, ũseũvyo wa Yeova nĩwatũmĩaa nzĩa syĩ kĩvathũkanyʼo sya kũtavanyʼa ta kaati, letiũ, na ngalĩ syĩ na mĩtambo ya wasya; kwosana na vata wa ĩvinda yĩu. Nũndũ ũmũnthĩ andũ aingĩ mayĩthĩawa mũsyĩ, nĩtwĩkĩĩtwe vinya kũtavanyʼa kũla andũ aingĩ matonya kũkwatĩkana na ĩla mwanya weeyumĩlya, ti o nyũmba na nyũmba. Ĩngĩ, nĩtwĩkĩĩtwe vinya kũtavanyʼa nyũmba na nyũmba ĩ ya wĩoo andũ mauma wĩanĩ. Nĩwĩyũmbanĩtye kũthi o ũndũ ngalĩ ya Yeova ya ĩtunĩ yĩendete?—Esek. 1:20, 21.

3. Kũneenea kĩla kĩũthĩnyʼa ene nyũmba kũtonya kũtũtetheesya ata ũtavanyʼanĩ?

³ Kĩla Ũtonya Kũneenea: Nĩ kyaũ kĩ ilĩkonĩ sya andũ kĩsionĩ kyenyu? Nĩ mathĩna ma mbesa, mathĩna ma mĩsyĩ, kana nĩ makaũ? Nĩ ũseo kwĩthĩwa wĩsĩ maũndũ ala mekũthĩnyʼa andũ kĩsionĩ nĩ kana ũmaneenee nthĩnĩ wa ũtavanyʼa. (1 Ako. 9:20-23) Ĩla ene nyũmba meeyĩelesya, vandũ va kũmasũngĩa kwa ũkuvĩ na ũyĩendeea na ũndũ ũla wĩyũmbanĩtye kũneenea, nĩ ũseo kũneenea maũndũ ala mekũmathĩnyʼa.

4. Nĩkĩ twaĩlĩte kwĩka moalyũku ũtavanyʼanĩ mĩtũkĩ ũndũ vatonyeka?

⁴ O mĩtũkĩ “mwĩkalĩle” wa nthĩ ĩno nũũvĩta na ũla thĩna mũnene ũyambĩĩa. ‘Ĩvinda nĩ ĩkuvĩvye mũno.’ (1 Ako. 7:29) Kwoou, nĩ ũndũ wa vata mũno kwĩthĩwa twĩyũmbanĩtye kũvĩndũa nzĩa sitũ sya kũtavanyʼa nĩ kana tũtetheesye andũ aingĩ kavindanĩ kala katiele.