• ‘Sisyai, Nyie Nĩ Vamwe Nenyu Mĩthenya Yonthe’
    Mũsyaĩĩsya—2013 | Mwei wa 7 1

    • 13. Ĩandĩko ya Ũvuanʼyo 18:7 yĩvuanĩtye kyaũ ĩũlũ wa woni wa ĩlwaya, kana Mbaviloni Ĩla Nene, yĩla nĩ vamwe na ndĩni ila syĩyĩtaa sya Kĩklĩsto?

      13 Ũndũ wa katatũ nĩ, kĩĩo na kũvevetanyʼa maeo. Nĩ kyaũ kĩkekĩka alaĩka mamina kũmbanyʼa na kwova mĩio ya ĩthaaa? Yesũ aineena ĩũlũ wa andũ ala meũvwʼananĩthwʼa na ĩthaaa, aisye ũũ: “Vo vakethĩwa kĩĩo na kũvevetanʼya maeo.” (Mt. 13:42) Ũndũ ũsu nũendee ũmũnthĩ? Ekaĩ. Ũmũnthĩ, ndĩni ila syĩyĩtaa sya Kĩklĩsto, nasyo nĩ kĩlungu kya yĩla ĩlwaya, syĩkathĩĩaa ikyasya: “Nĩilyĩ nthĩ nĩ mũsumbĩ mũndũ mũka, na ndi ndiwa, na ndikethĩwa na kĩmeto nongi.” (Ũvu. 18:7) Kwa wʼo ki, ndĩni ila syĩyĩtaa sya Kĩklĩsto syĩwʼaa syĩ mbĩanĩe vyũ, o na ivangaa ‘syĩilyĩ nthĩ ta mũsumbĩ mũndũ mũka’ ĩũlũ wa atongoi ma siasa. Yu tũĩ, ala maelekanĩtwʼe na ĩthaaa maendee kwĩkathĩĩa, na ti kũmeta. Ĩndĩ ũu ũkilyĩ ũnathela.

      Ngwatanĩo katĩ wa ndĩni ila syĩyĩtaa sya Kĩklĩsto na atongoi ma siasa ĩkilyĩ kũthela (Sisya kalungu ka 13)

      14. (a) Aklĩsto ma ũvũngũ ‘makavevetanyʼa maeo’ ĩndĩĩ, na nĩkĩ makeka ũu? (b) Ũmanyi ũũ mweũ ĩũlũ wa Mathayo 13:42 wosanĩte ata na kĩla kĩwetetwe ĩandĩkonĩ ya Savuli 112:10? (Sisya maelesyo ma mũthya.)

      14 Ndĩni sya ũvũngũ syamina kwanangwa ĩvindanĩ ya ũla thĩna mũnene, andũ ala maĩ aatĩĩi masyo makasemba mamanthe wĩvitho ĩndĩ maikawona. (Luka 23:30; Ũvu. 6:15-17) Na ĩndĩ mamanya kana maitĩa kwanangwa, makaĩa nũndũ wa kũkwʼa ngoo na ‘maivevetanyʼa maeo’ nĩ woo. O tondũ Yesũ waeleisye nthĩnĩ wa wathani wake ĩũlũ wa ũla thĩna mũnene, andũ asu ‘makameta’ ĩvindanĩ yĩu ya kyeva kingĩ.[5]—Mt. 24:30; Ũvu. 1:7.

      15. Ĩthaaa yĩkeekanwa nayo ata, na ũu ũkeekĩka ĩndĩĩ?

      15 Ũndũ wa kana nĩ, kwĩkwʼa ikonĩ yĩ mwaki. Mĩio ya ĩthaaa ĩkeekanwa nayo ata? Alaĩka ‘makamĩkya ikonĩ ĩnene yĩ mwaki.’ (Mt. 13:42) Ũu wĩonanyʼa kwanangwa vyũ. Kwoou, andũ asu maĩ aatĩĩi ma ndĩni sya ũvũngũ makaanangwa kĩlungunĩ kya mũthya kya ũla thĩna mũnene, nakyo nĩ Ali–Maketoni.—Mal. 4:1.