Yesũ Nĩweekie Syama Mbingĩ, Ĩndĩ Alewa Ndũanĩ ya Nasaleti

Ĩtina wa Yesũ kũthi savalĩ ndaasa esĩle ũkanganĩ aumĩte kĩsionĩ kya Ndekavoli, nĩwavoisye mũndũ mũka waumawa nĩ nthakame na athayũũkya kelĩtu ka Yailu. Kwa wʼo, mũthenya ũsu Yesũ nĩwakwatene mũno. Ĩndĩ kũtanamba kũtuka, nĩwaumie mũsyĩ kwa Yailu na aatĩĩwa nĩ aũme elĩ maĩ ilalinda. Aũme asu maneenaa na wasya mũnene makyasya: “Twĩwʼĩe tei, Mwana wa Ndaviti.”—Mathayo 9:27.

Yĩla aũme asu mamwĩtie Yesũ “Mwana wa Ndaviti,” moonanasya kana nĩmekũĩkĩĩa nĩwe ũkatiĩwa kĩvĩla kya ũsumbĩ kya Ndaviti na nĩwe Masia. Yesũ eekie ta ũtakwatĩĩe ndeto sya aũme asu, na noĩthwa eekie ũu nĩ kana one kana kwa wʼo nĩmendaa kũvowʼa. Maũndũ ala aũme asu masyokie kwĩka nĩmaĩkĩĩthisye kana maĩ na wendi wa kũvowʼa. Yĩla Yesũ walikile nyũmba, aũme asu elĩ nĩmamũatĩĩie. Yesũ amakũlilye atĩĩ: “Mwĩ na mũĩkĩĩo kana no nĩke ũndũ ũũ?” Namo mamũsũngĩa mate na nzika: “Ĩĩ, Mwĩaĩi.” Ĩtina wa kũmũsũngĩa, Yesũ nĩwakiitie metho moo, akyasya: “Nĩ kwĩkĩke kwenyu kwosana na mũĩkĩĩo wenyu.”—Mathayo 9:28, 29.

Ĩvenyʼa na ĩsalukya, aũme asu nĩmambĩĩie kwona! O tondũ Yesũ wakothaa kwĩka, nĩwameie maikatavye mũndũ kĩla kyeekĩka. Ĩndĩ nũndũ wa ũtanu, nĩmaendie mawetete ĩũlũ wa Yesũ kĩla vandũ.

Aũme asu elĩ maendete, andũ nĩmaetie mũndũ ũtaĩ atonya kũneena nũndũ aĩ na ndaimoni. Yesũ nĩwaumisye ndaimoni ĩsu, na mũndũ ũsu ambĩĩa kũneena. Nũndũ wa ũu, ĩkomano nĩyasengʼie mũno na yasya, “Ũndũ ta ũũ ndwaamba kwoneka Isilaeli.” O namo Avalisi nĩmoonie ũndũ ũsu. Na nũndũ mayaĩ matonya kũleana na syama ila Yesũ weeka, nĩmatũngĩlĩĩile ndeto nthũku ila maĩ manaweta mbeenĩ ĩũlũ wa syama sya Yesũ. Maisye atĩĩ: “Aumasya ndaimoni aitũmĩa vinya wa mũnene wa ndaimoni.”—Mathayo 9:33, 34.

Ĩtina wa ĩvinda ĩnini Yesũ nĩwaendie Nasaleti, ndũanĩ ya mũsyĩ kwoo, na aendanisye na amanyĩwʼa make. Nĩvavĩtĩte mwaka ta ũmwe kuma Yesũ amanyĩsya ĩsinakokenĩ ya kũu. Mbeenĩ, andũ nĩmendeeiwʼe nĩ maũndũ ala wamanyĩisye e ĩsinakokenĩ yĩu, ĩndĩ ĩtina nĩmathatie nũndũ wa momanyĩsyo make na menda kũmũaa. Yu Yesũ nĩwavangie ĩngĩ kũtetheesya atũi make.

Yĩla mũthenya wa Savato wavikie, Yesũ nĩwaendie ĩsinakokenĩ akamanyĩsye. Andũ aingĩ nĩmasengʼie na makũlanyʼa: “Mũndũ ũũ aumĩtye va ũĩ ũũ na syama ii?” O na maisye atĩĩ: “Ũũ tyo ũla mwana wa vundi wa mbwaũ? Inyia wake tyo Meli, na ana-a-inyia make tyo Yakovo, Yosevu, Simoni, na Yutasi? Na eĩtu-a-inyia make onthe tũi o namo? Aumisye maũndũ aa onthe va?”—Mathayo 13:54-56.

Andũ asu masũanĩaa kana Yesũ no mũndũ o ta andũ ala angĩ. Maasya ũũ ngoonĩ syoo, ‘Ayĩana no tũmwene, kwoou atonya ata kũtwʼĩka kana nĩwe Masia?’ O na kau Yesũ nĩwaĩkĩĩthisye kana nĩwe Masia kwĩsĩla ũĩ wake mwingĩ na syama nene, andũ asu nĩmamũleile. Nũndũ andũ asu nĩmeesĩ Yesũ mũno, o na andũ ma mũsyĩ nĩmalulutĩkile na ũu watuma asya: “Mwathani ethĩawa anengetwe ndaĩa kĩla vandũ, ate o kĩsionĩ kya kwoo na nyũmbanĩ yake mwene.”—Mathayo 13:57.

Vate nzika, Yesũ nĩwasengʼie mũno oona mate na mũĩkĩĩo. Kwoou ndaaĩka kyama o na kĩmwe kĩsionĩ kĩu “eka o kwilĩĩla moko andũ anini ala maĩ awau na kũmavosya.”—Maliko 6:5, 6.