We Nĩwĩsĩ?

Mo ala atandĩthya mathooasya indo ĩkalũnĩ ya Yelusaleme nĩmaaĩle kwĩtwa “avutani”?

MBIVILIA yaĩtye ũũ ĩvukunĩ ya Mathayo: “Na Yesũ avota ĩkalũnĩ ya Ngai, amakuthũa onthe ala mathooasya na kũthooa ĩkalũnĩ, na angʼuthũlanga mesa sya ala meũvunzya mbesa, na ivĩla sya ala meũthoosya mavũĩ; na amea, Nĩkũandĩkĩtwe, Nyũmba yakwa ĩkeetwa nyũmba ya kũvoyea: ĩndĩ inywʼĩ mwĩmĩtwʼa ngunga ya avutani.”—Mt. 21:12, 13.

Maũndũ ma tene ma Ayuti ala maandĩke monanasya kana atandĩthya ma ĩkalũnĩ mavinyĩĩaa athooi kwa kũmateea syĩndũ mbesa mbingĩ mũno. Kwa ngelekanyʼo, ĩvuku yĩmwe yĩtawa Mishnah (Keritot 1:7) yonanĩtye kana ĩvinda yĩmwe myakanĩ ya atũmwa mũndũ enda kũthooa mavũĩ elĩ aumye nthembo aĩvaa ndinalĩ ĩmwe ya thaavu. Ndinalĩ ĩsu yeanene na mbesa ila mũthũkũmi wa moko wakwataa athũkũmĩte mĩthenya 25. Mũndũ ngya nĩweetĩkĩlĩtwʼe kumya mavũĩ kana ndumbũ, ĩndĩ nyũnyi isu iyaĩ ikũlũmĩka nĩ ũ thooa. (Ali. 1:14; 5:7; 12:6-8) Kĩndũ kĩu kyatumie Lavai ũmwe weetawa Simeoni mwana wa Kamalieli athata mũno nginya aolanga nthembo sya lasima ila mũndũ waaĩle kumya. Ĩla weekie ũu, thooa wa mavũĩ elĩ watheeie kũndũ ĩana kwa ũndũ matesawa vau mbeenĩ.

Maũndũ asu twoona nĩmaĩle kũtwonyʼa nesa vyũ kana Yesũ ndaavĩtya ĩla weetie atandĩthya ala maĩ ĩkalũnĩ “avutani,” nũndũ matũmĩaa andũ naĩ na maĩ na ĩtomo.