Yesũ Nĩwakanisye Iseve na Itulumo sya Ũkanga

Yesũ nĩwanoie mũno ĩtina wa kũmanyĩsya mũthenya wʼonthe. Yĩla kwavikie wĩoo eeie amanyĩwʼa make atĩĩ: “Ekai tũinge mũingo ũya ũngĩ wa ũkanga.” Yesũ ameaa mainge kuma ndũanĩ ya Kavelinaumi mathi kĩsionĩ kĩngĩ.—Maliko 4:35.

Kĩsio kĩu maendie kyeetawa Kelasene, na kyaĩ ngalĩko ya wumĩlonĩ wa syũa ya Ũkanga wa Kalilii. Kĩsio kĩu nokyo kyeetawa Ndekavoli na kyaĩ na ndũa mbingĩ. Kĩsio kĩu kyaĩ na syĩthĩo mbingĩ sya Kĩkiliki, o na kau ve Ayuti aingĩ mekalaa vo.

Andũ nĩmamanyie kana Yesũ nĩwauma Kavelinaumi athi kĩsionĩ kĩngĩ. Eka o ĩsiwa yĩla yakuĩte Yesũ na amanyĩwʼa make, ve o masiwa angĩ maingaa mũingo wa ũkanga. (Maliko 4:36) Vala maingaa vayaĩ vaasa mũno. Ũkanga wa Kalilii wailyĩ ta ĩia ya kĩwʼũ na kĩwʼũ kyawʼo kĩyaĩ mũnyũ, na waĩ na ũasa wa kĩlomita ta 21 na ũthanthau wa kĩlomita ta 12. Ĩndĩ ũkanga ũsu waĩ mũliku mũno.

O na kau Yesũ ndaĩ na naĩ, nĩwanoete mũno nũndũ wa kũtinda atavanĩtye mũthenya wʼonthe. Yĩla Yesũ na amanyĩwʼa make malikile ĩsiwanĩ, nĩmambĩĩie kũinga ũkanga. Ĩndĩ Yesũ aendie ĩtina wa ĩsiwa na aaĩĩsya mũtwe wake kamũtonĩ na akoma.

Amwe ma amanyĩwʼa make nĩmeesĩ nesa kũtwaa ĩsiwa, ĩndĩ savalĩ ĩsu yoo ndyesaa kwĩthĩwa yĩ laisi. Ve iĩma syathyũlũlũkĩte Ũkanga wa Kalilii, na mavinda maingĩ kĩwʼũ kya ũkanga ũsu kyeethĩawa kĩ kĩvyũ. Mavinda amwe, nzeve nthithu kuma iĩmanĩ isu nĩyatheeaa ĩkethĩana na ũvyũvu wa kĩwʼũ kya ũkanga, na ũu ũituma kwĩthĩwa na kĩseve kingĩ na iuutani syĩ vinya ũkanganĩ. Ũu nĩwʼo kweethĩiwe ĩvindanĩ yĩu Yesũ na amanyĩwʼa make maingaa ũkanga. Ĩtina wa ĩvinda ĩnini, ĩsiwa nĩyambĩĩie kũkimwa nĩ iuutani sya ũkanga. Ĩsiwa yĩu nĩyambĩĩie “kũlika kĩwʼũ nginya weethĩa yĩ vakuvĩ kũvota kĩwʼũnĩ.” (Luka 8:23) Ĩndĩ o na maũndũ mailyĩ ũu, Yesũ aendeeie kũkoma!

Amanyĩwʼa ala matwaĩte ĩsiwa maendeee kũngʼangʼana vyũ nĩ kana yĩikavote kĩwʼũnĩ, na meekaa ũu matũmĩĩte ũmanyi ũla maĩ nawʼo wa ũndũ maĩle kwĩka yĩla meethĩana na iuutani ũkanganĩ. Ĩndĩ maũndũ mayaĩ laisi ĩvindanĩ yĩĩ. Yĩla moonie kana mathayũ moo me mũisyonĩ, nĩmamũamũkisye Yesũ na mamwĩa atĩĩ: “Mwĩaĩi, tũtangĩĩe, nĩtũũthela!” (Mathayo 8:25) Amanyĩwʼa nĩmakĩaa nũndũ moonaa nĩmeũvota kĩwʼũnĩ makwʼe!

Yĩla Yesũ waamũkie, akũlilye atũmwa make atĩĩ: “Nĩkĩ mwĩ na wia wingĩvĩte ũu inywʼĩ mwĩ na mũĩkĩĩo mũnini?” (Mathayo 8:26) Ĩtina wa ũu, nĩwakanisye kĩuutani na ũkanga akyasya, “Usya! Kilya!” (Maliko 4:39) Kĩseve nĩkyauisye na ũkanga nĩwakililye. (Maliko na Luka maielesya ĩũlũ wa ũndũ ũsu waĩ wa kũsengyʼa, mambie kũkindĩlĩĩla kyama kĩla Yesũ weekie, na ĩndĩ ĩtina maweta kana amanyĩwʼa maĩ na mũĩkĩĩo mũnini.)

Kwasũanĩa ũndũ kyama kĩu Yesũ weekie kyatetheeisye amanyĩwʼa make! Amanyĩwʼa nĩmeeyoneie na metho moo ũkanga ũyĩusya vyũ. Na nũndũ wa ũu nĩmakwatiwe nĩ wia mwingĩ. Makũlanilye atĩĩ: “We ũũ kwa wʼo nũũ? O na kĩseve na ũkanga nikũmwĩwʼa.” Kyama kĩla Yesũ weekie nĩkyatumie mavika mũingo wa ũkanga me aima. (Maliko 4:41–5:1) Nĩvatonyeka andũ ala angĩ maĩ na masiwa ũkanganĩ ũsu makethĩwa mangʼangʼanie nginya mesa kũsyoka vala maumĩte.

Nĩ ũndũ wa kũkiakisya mũno kũmanya kana Mwana wa Ngai e na ũtonyi wa kũsiĩĩa syĩndũ ta iseve syĩ vinya iikaete wasyo! Yĩla Yesũ ũkethĩwa asumbĩkĩte ĩũlũ wa nthĩ, andũ onthe makekalaa na mũuo nũndũ kũikethĩwa kĩndũ kĩtonya kũmatelemya!