Kũvatiswa kwa Yesũ

Myei ta thanthatũ kuma Yoana Mũvatisi ambĩĩa wĩa wake wa kũtavanyʼa, Yesũ, ũla waĩ na myaka vakuvĩ 30, nĩwaendie Ũsĩnĩ wa Yolotani vala ve Yoana. Nĩkĩ Yesũ waendie vala ve Yoana Mũvatisi? Kĩeleelo kyake kĩyaĩ kũmũthokea Yoana aĩ nũndũ me ndũũ. O na ĩngĩ, Yesũ ndendaa o kwona ũndũ wĩa wa Yoana ũendeee. Ĩndĩ aendie kũmwona Yoana nĩ kana avatiswe.

Mbeenĩ, Yoana ndaaĩtĩkĩla kũmũvatisa Yesũ. Amũkũlilye atĩĩ: “Nyie ninyie naĩle kũvatiswa nue, na yu we wĩũka vala nĩĩ?” (Mathayo 3:14) Yoana nĩweesĩ kana Yesũ nĩ Mwana wa Ngai. Lilikana kana Yoana e o ĩvunĩ ya inyia wake, nĩwathakie yĩla Meli, ũla waitavĩte ĩvu ya Yesũ, wamũthokeie Elisavethi, inyia wa Yoana. No nginya Elisavethi ethĩwe atavisye Yoana ũndũ ũsu. O na ĩngĩ, no nginya Yoana ethĩwe amanyie kana mũlaĩka nĩwatangaasie ĩũlũ wa kũsyawa kwa Yesũ, na kana ve alaĩka angĩ maumĩlĩĩile aĩthi ũtukũ ũla Yesũ wasyaiwe.

Yoana nĩweesĩ kana evatisa andũ nũndũ nĩmeelilĩte naĩ syoo. Ĩndĩ kĩvathũkanyʼo namo, Yesũ ndaĩ na naĩ. O na kau Yoana nĩwaleaa kũmũvatisa, Yesũ amwĩie atĩĩ: “Eka kwĩthĩwe ũu ĩvinda yĩĩ, nũndũ kwa nzĩa ĩsu nĩtwaĩle kwĩanĩsya ũlũngalu wʼonthe.”—Mathayo 3:15.

Kwoou ĩkũlyo nĩ, ‘Nĩkĩ Yesũ waaĩle kũvatiswa?’ Yesũ ndavatisawa nĩ kana onanyʼe nĩwĩlilĩte naĩ syake. Ĩndĩ ũvatiso wake woonanasya kana nĩwĩyumĩtye eke kwenda kwa Ĩthe wake. (Aevelania 10:5-7) Yesũ nĩwathũkũmĩte wĩa wa mbwaũ kwa ĩvinda yĩasa, ĩndĩ yu saa waĩ mũviku wa kwambĩĩa wĩa ũla Ĩthe wake wa ĩtunĩ wamũtũmĩte atethye kũũ nthĩ. We wĩona ata, ‘Nĩvatonyeka Yoana akethĩwa eeteele vekĩke ũndũ wa mwanya aimũvatisa Yesũ?’

Ĩtina Yoana esie kwasya atĩĩ: “Ũla wandũmie kũvatisa na kĩwʼũ nĩwandavisye ũũ: ‘Ũla ũkona veva ũtheeete na kwĩkala ĩũlũ wake, ũsu nĩwe ũvatisaa na veva mũtheu.’” (Yoana 1:33) Kwoou, Yoana nĩweeteele veva wa Ngai ũtheee mũndũ ũmwe katĩ wa ala wavatisaa. Yĩla Yesũ waminie kũvatiswa, Yoana ndaasengʼa nĩ kwona “veva wa Ngai ũtheeete ta ĩvũĩ, wũkĩte ĩũlũ wa [Yesũ].”—Mathayo 3:16.

Ĩndĩ ve maũndũ angĩ meekĩkie ĩvindanĩ yĩu Yesũ wavatisawa eka o asu. Mbivilia yonanĩtye kana ‘matu nĩmamũvingũkĩie.’ Ndeto isu syonanasya kyaũ? Noĩthwa syonanasya kana ĩvindanĩ yĩla Yesũ wavatisawa, nĩwalilikanile ĩvinda yĩla wekalaa ĩtunĩ atanamba kũka kũũ nthĩ. Kwoou, Yesũ nĩwalilikanile maũndũ ala weekaa na woonaa yĩla waĩ ĩtunĩ e kyũmbe kya veva, na maũndũ asu nĩ vamwe na ũwʼo ũla Ngai wamũmanyĩasya e kũu.

Ve ũndũ ũngĩ weekĩkie ĩvindanĩ yĩla Yesũ wavatisawa. Wasya waumie ĩtunĩ ũkyasya: “Ũũ nĩwe Mwana wakwa mwendwa, ũla nendeeawʼa nĩwe.” (Mathayo 3:17) Ũsu waĩ wasya waũ? Wasya ũsu ndwĩsa kwĩthĩwa waĩ wa Yesũ nũndũ aĩ vau e na Yoana. Kwoou, ũsu waĩ wasya wa Ngai. Ũndũ ũsu wĩtũĩkĩĩthya kana Yesũ nĩ Mwana wa Ngai, ĩndĩ ti we Ngai.

Nĩ ũndũ wa vata kũmanya kana yĩla Yesũ waĩ ĩũlũ wa nthĩ, aĩ mwana wa Ngai ũte na naĩ, o ta Atamu. Luka, ũla waĩ mũmanyĩwʼa wa Yesũ nĩwaeleisye ũvatiso wa Yesũ, na ĩndĩ ĩtina aandĩka atĩĩ: “Na yĩla Yesũ wambĩĩe wĩa wake aĩ na myaka ta 30, na kwasũanĩawa aĩ mwana wa Yosevu, mwana wa Eli, . . . mwana wa Ndaviti, . . . mwana wa Avalaamu, . . . mwana wa Noa, . . . mwana wa Atamu, mwana wa Ngai.”—Luka 3:23-38.

O tondũ Atamu waĩ “mwana wa Ngai,” nowʼo Yesũ waĩ mwana wa Ngai. Ĩndĩ yĩla Yesũ wavatisiwe, nĩweethĩiwe na ngwatanĩo ĩngĩ ya mwanya vamwe na Ngai, na ũu nĩ kwasya kana nĩwasyaiwe ĩngĩ na eethĩiwe mwana wa Ngai wa kĩ-veva. Kwoou kuma ĩvinda yĩu, Yesũ aĩ atonya kũmanyĩsya ũwʼo ĩũlũ wa Ngai na ũndũ andũ matonya kwĩka nĩ kana mekwata thayũ. Nĩwambĩĩisye kwĩka maũndũ ala ĩtina wa ĩvinda matumie aumya thayũ wake kwondũ wa andũ me na naĩ.