3. Ĩmanyĩsye ũwʼo ĩũlũ wa ũndũ kwĩthĩawa mũndũ amina kũkwʼa

Ĩũlũ wa nthĩ, andũ maĩkĩĩaa maũndũ me kĩvathũkanyʼo ĩũlũ wa ũndũ kwĩthĩawa mũndũ amina kũkwʼa. Na vate nzika, ti maũndũ onthe ala andũ maĩkĩĩaa methĩawa me ma wʼo.

• Kĩsionĩ kyenyu, andũ maĩkĩĩaa maũndũ meva ĩũlũ wa ũndũ kwĩthĩawa mũndũ akwʼa?

VITIO: Kwĩthĩawa Ata Ĩla Mũndũ Wakwʼa?—Kalungu ka Vitio (1:19)

Somai Mũtavanʼya 3:20, na ĩndĩ mũineenea makũlyo aa:

• Kwosana na mũsoa ũũ, kwĩthĩawa ata yĩla mũndũ wakwʼa?

• Ve kĩndũ kĩ nthĩnĩ wa mũndũ kĩtakusaa yĩla wakwʼa?

Mbivilia nĩtũtavĩtye ĩũlũ wa kĩkwʼũ kya Lasalo, ũla waĩ mũnyanya wa vakuvĩ wa Yesũ. Mũisoma Yoana 11:11-14, sisya wone kĩla Yesũ wawetie ĩũlũ wa kĩkwʼũ kya Lasalo. Na ĩndĩ mũineenea makũlyo aa:

• Yesũ aelekanilye kĩkwʼũ na kyaũ?

• Ũndũ ũsu wawetie wĩtũmanyĩsya kyaũ ĩũlũ wa ũndũ kwĩthĩawa mũndũ akwʼa?

• We nũkwona kĩla Mbivilia ĩwetete ĩũlũ wa kĩkwʼũ kyosanĩte na kĩlĩko?

4. Yesũ nĩwaĩkĩĩthisye kana nũtonya kũthayũũkya ala akwʼũ

Ĩmanyĩsye mũnango ĩũlũ wa kĩla Yesũ weekie kwondũ wa mũnyanyae Lasalo. Somai Yoana 11:14, 38-44, na ĩndĩ mũineenea makũlyo aa:

• Twĩsĩ ata kana kwa wʼo Lasalo aĩ mũkwʼũ? —Sisya mũsoa wa 39.

• Ethĩwa Lasalo akwʼa aendie ĩtunĩ, nũkwona ta wĩthĩwa waĩ ũndũ mũseo Yesũ kũmũtũnga vaa ĩũlũ wa nthĩ?

Ĩloelei VITIO.

VITIO: Yesũ Nĩwathayũũkisye Lasalo (1:16)