ĨSOMO YA 30
Endwa Maku Ala Makwie Nĩmatonya Kwĩthĩwa Thayũ Ĩngĩ!
Yĩla andũ makwʼĩĩwa nĩmakwatawa nĩ woo na kyeva kingĩ mũno. Kĩu nĩkyo kĩtumi Mbivilia yĩtĩte kĩkwʼũ mũmaitha. (1 Akolintho 15:26) Ĩsomonĩ ya 27, nĩtũneemanyĩisye kana Yeova akasinda mũmaitha ũsu. Ĩndĩ kũkeethĩwa ata kwa andũ ala makwie? Ĩsomonĩ yĩĩ, nũkwĩmanyĩsya maũndũ maingĩ ĩũlũ wa watho ũngĩ mũseo wa Yeova, wa kana akathayũũkya andũ mbilioni mbingĩ ala makwie na maitanĩa thayũ tene na tene. Yeova atwathĩte ũu! We nũkwona ta ũkeanĩsya kĩu? Na makathayũũkwʼa mekale ĩtunĩ-ĩ, kana nĩ vaa ĩũlũ wa nthĩ?
1. Yeova avangĩte kwĩka ata kwondũ wa endwa maitũ ala makwie?
Yeova e na mea maingĩ ma kũthayũũkya andũ ala makwie. Mũndũũme ũmwe waĩ na mũĩkĩĩo, ũla weetawa Yovu, ndaĩ na nzika kana Ngai ndesaa kũlwa nĩwe akwʼa. Eeie Ngai atĩĩ: “Naku wĩthĩwa wĩtana, nakwa ngakwĩtĩka [kuma Mbũanĩ].”—Soma Yovu 14:13-15.
2. Twĩsĩ ata kana andũ ala makwie makathayũũkwʼa?
Yĩla Yesũ waĩ ĩũlũ wa nthĩ, Ngai nĩwamũnengete vinya wa kũthayũũkya andũ. Yesũ nĩwathayũũkisye kelĩtu kaĩ na myaka 12, na kamwana ka mũndũ mũka ndiwa. (Maliko 5:41, 42; Luka 7:12-15) Ĩtina, mũnyanyae wa Yesũ ũla weetawa Lasalo nĩwakwie. O na kau Lasalo aminĩte mĩthenya ĩna kuma akwʼa na athikwa, Yesũ nĩwamũthayũũkisye. Ĩtina wa kũmũvoya Ngai, eetanie na wasya asyaĩtye mbũa. Aisye atĩĩ: “Lasalo, umaala!” Na “mũndũ ũsu waĩ mũkwʼũ aumaala” e thayũ! (Yoana 11:43, 44) Kwasũanĩa ũndũ andũ ma mũsyĩ wa Lasalo na anyanya matanie mũno wĩana!
3. Ve na wĩkwatyo mwaũ kwondũ wa endwa maku ala makwie?
Mbivilia yathanĩte kana “kũkeethĩwa na ũthayũũkyo.” (Meko ma Atũmwa 24:15) Andũ ala mathayũũkiwʼe nĩ Yesũ e vaa ĩũlũ wa nthĩ, mayaĩ ĩtunĩ. (Yoana 3:13) Nĩmatanĩie mũno kũthayũũkwʼa na maendeea kwĩkala ĩngĩ ĩũlũ wa nthĩ. O ta ũu, o mĩtũkĩ Yesũ nũkũthayũũkya andũ mbilioni mbingĩ na maitanĩa kwĩkala thayũ tene na tene nthĩ yĩ valatiso. Aisye kana “ala onthe me mbũanĩ,” o na ala tũtonya kwĩthĩwa twoolilwe nĩmo, ĩndĩ me kĩlilikanonĩ kya Ngai, makathayũũkwʼa.—Yoana 5:28, 29.
ĨMANYĨSYE MŨNANGO
Ĩmanyĩsye wone ũndũ Mbivilia ĩtũĩkĩĩthĩtye kana andũ ala makwie makathayũũkwʼa. O na ĩngĩ ĩmanyĩsye wone ũndũ ũthayũũkyo ũtonya kũũkiakisya na kũũnenga wĩkwatyo.
4. Yesũ nĩwaĩkĩĩthisye kana nũtonya kũthayũũkya ala akwʼũ
Ĩmanyĩsye mũnango ĩũlũ wa kĩla Yesũ weekie kwondũ wa mũnyanyae Lasalo. Somai Yoana 11:14, 38-44, na ĩndĩ mũineenea makũlyo aa:
Twĩsĩ ata kana kwa wʼo Lasalo aĩ mũkwʼũ? —Sisya mũsoa wa 39.
Ethĩwa Lasalo akwʼa aendie ĩtunĩ, nũkwona ta wĩthĩwa waĩ ũndũ mũseo Yesũ kũmũtũnga vaa ĩũlũ wa nthĩ?
5. Andũ aingĩ makathayũũkwʼa!
Somai Savuli 37:29, na ĩndĩ mũineenea ĩkũlyo yĩĩ:
Andũ mbilioni mbingĩ ala makathayũũkwʼa makekala va?
Yesũ akathayũũkya andũ aingĩ mũno, ĩndĩ ti o ala mamũthaithaa Yeova. Somai Meko ma Atũmwa 24:15, na ĩndĩ mũineenea ĩkũlyo yĩĩ:
We ũkenda kwona ũũ aithayũũkwʼa?
Kwasũanĩa ũndũ ũũ: Yesũ nũtonya kũthayũũkya mũndũ o kwa nzĩa yĩ laisi o tondũ ĩthe wa kana ũtonya kũkaamũkya kuma toonĩ
6. Ũthayũũkyo nũtonya kũũkiakisya na ũyĩũnenga wĩkwatyo
Ngewa ya kelĩtu ka Yailu, ĩla yĩ Mbivilianĩ, nĩtumĩte aingĩ ala makwʼĩĩwe makwata ũkiakisyo na ĩkamekĩa vinya. Somai ngewa ĩsu ya wʼo nthĩnĩ wa Luka 8:40-42, 49-56.
Yesũ atanamba kũthayũũkya kelĩtu ka Yailu, atavisye ĩthe wako atĩĩ: “Ndũkethĩwe na wia, ĩndĩ ĩthĩwa na mũĩkĩĩo.” (Sisya mũsoa wa 50.) Wĩkwatyo wa ũthayũũkyo ũtonya kũũtetheesya ata . . .
yĩla wakwʼĩĩwa nĩ mũndũ ũmwendete?
yĩla thayũ waku wĩ mũisyonĩ?
Ĩloelei VITIO, na ĩndĩ mũineenea ĩkũlyo yĩla yĩatĩĩe.
Nĩ kwa nzĩa yĩva wĩkwatyo wa ũthayũũkyo watumie asyai ma Phelicity makiakiwʼa na mekĩwa vinya?
ANDŨ AMWE MAASYA: “Nĩ ũndũ wĩ vinya mũno kũĩkĩĩa kana andũ makathayũũkwʼa na mayĩkala ĩũlũ wa nthĩ.”
We wĩona ata?
Ũtonya kũtũmĩa ĩandĩko yĩva kũĩkĩĩthya mũndũ kana kũkeethĩwa na ũthayũũkyo?
KĨLA TWEEMANYĨSYA
Mbivilia ĩtwathĩte kana andũ mbilioni mbingĩ ala makwie makathayũũkwʼa. Yeova eenda methĩwe thayũ ĩngĩ, na nũmũnengete Yesũ vinya wa kũmathayũũkya.
Makũlyo ma Kũsyokeleela
Twĩsĩ ata kana Yeova na Yesũ me na mea ma kũthayũũkya ala makwie?
Andũ mbilioni mbingĩ ala makathayũũkwʼa makekala va, nĩ ĩtunĩ-ĩ, kana nĩ vaa ĩũlũ wa nthĩ? Nĩkĩ wasũngĩa ũu?
Nĩ kyaũ kĩũkũĩkĩĩthya kana endwa maku ala makwie nĩmatonya kwĩthĩwa thayũ ĩngĩ?
MAŨNDŨ ANGĨ MA KWĨMANYĨSYA
Ĩmanyĩsye wone maũndũ ala ũtonya kwĩka nĩ kana ũmĩanĩsye na kyeva kya kũkwʼĩĩwa.
Yo myolooto ya Mbivilia nĩtonya kũtetheesya mũndũ wĩ na kyeva kya kũkwʼĩĩwa?
Syana itonya kũmĩanĩsya ata na kĩkwʼũ kya mũnyanya kana mũndũ va vakuvĩ?
Kwĩ andũ makathayũũkwʼa mathi ĩtunĩ? Naaũ matakathayũũkwʼa?