Kĩla Kyatumie Yesũ Ekala E na Ũtanu

WE YESŨ nĩwekalaa e na ũtanu? Yesũ aeeiwe mũsyĩ ũte mũthwii, nake mwene ndaaĩthĩwa na syĩndũ mbingĩ sya kĩ-mwĩĩ. Yesũ ‘ndaĩ na vandũ va ũkomya mũtwe wake.’ (Luka 9:57, 58) O na ĩngĩ, Yesũ nĩwamenetwe, nĩwailĩĩilwe maũndũ ma ũvũngũ, na ooawa.

Nũtonya kwasya, ‘Kũu ti kwĩkala na ũtanu!’ Ĩndĩ ve maũndũ angĩ twaĩle kũsũanĩa ĩũlũ wa Yesũ. Ekai tũsũanĩe maũndũ ana ĩũlũ wake.

1. KĨELEELO KYA YESŨ KYAĨ KWĨKA KWENDA KWA NGAI.

“Lĩu wakwa nĩ kwĩka kwenda kwa ũla wandũmie.”—Yoana 4:34.

Yesũ nĩwoonanisye kwĩsĩla meko na ũneeni kana nĩwendete kwĩka kwenda kwa Ĩthe wake wa ĩtunĩ, Yeova.a Yesũ nĩwatanĩaa mũno kwĩka kwenda kwa Ngai. O na nĩwaelekanisye kwĩka kwenda kwa Ngai na lĩu, o tondũ vonanĩtwʼe ĩandĩkonĩ yĩla yawetwa vau ĩũlũ. Kwasũanĩa kĩla kyaendeee aiweta ndeto isu.

Yesũ aneenie ndeto isu masaa ma mũthenya. (Yoana 4:6) Kwakya kũu atavanĩlasya ndũanĩ ya Samalia ĩla yĩ ilĩso mbingĩ, na kwoou aĩ na nzaa mbingĩ. Nĩkyo kĩtumi amanyĩwʼa make mamwĩsũvaa makĩmwĩa: “Lavai, ya.” (Yoana 4:31) Ũsũngĩo wa Yesũ woonanisye kana eewʼaa e mwĩanĩe nũndũ wa kwĩka kwenda kwa Ngai. Ũu wĩonanyʼa kana Yesũ ekalaa e na ũtanu.

2. YESŨ NĨWAMWENDETE MŨNO ĨTHE WAKE.

“Nĩnĩmwendete Asa.”—Yoana 14:31.

Ĩla Yesũ waĩ ĩtunĩ, aĩ na ngwatanĩo nzeo na Ĩthe wake. Nũndũ Yesũ nĩwendete Ĩthe wake, nĩwatavisye andũ ĩsyĩtwa Yake, ieleelo Syake na ndaĩa Syake. Ũneeni wa Yesũ na meko make mailyĩ o ta ma Ĩthe wake. Kwoou, ĩla tũũsoma maũndũ ala maandĩkĩtwe ĩũlũ wa Yesũ, no ta twĩthĩawa tũisoma ĩũlũ wa Ĩthe wake. Kyu nĩkyo kĩtumi ĩla Vilivu wamwĩie Yesũ: “Twonʼye Asa,” Yesũ wamwĩie: “Ũla wambonie nĩwamwonie Asa.”—Yoana 14:8, 9.

Nũndũ Yesũ nĩwamwendete Ĩthe wake mũno, nĩwamwĩwie o na kũvikĩa kũkwʼa kwake. (Avilivi 2:7, 8; 1 Yoana 5:3) Wendo ũsu nĩwatumaa Yesũ ekala e na ũtanu.

3. YESŨ NĨWAMENDETE ANDŨ.

“Vai mũndũ wĩ wendo mwingĩ ũvĩtũkĩte ũũ, wa mũndũ kũwia thayũ wake nthĩ nũndũ wa anyanyae.”—Yoana 15:13.

Tũkusaa nũndũ tũi eanĩu. Mbivilia yaĩtye ũũ: “Nũndũ wa mũndũ ũmwe [Atamu] naĩ yalikile kũũ nthĩ, na kĩkwʼũ kwondũ wa naĩ; na kwa ũu kĩkwʼũ kyavikĩa andũ onthe, nĩkwĩthĩwa onthe nĩmeekie naĩ.” (Alomi 5:12) Vaiĩ ũndũ ithyĩ ene tũtonya kwĩsiĩanĩa na kĩkwʼũ nũndũ twĩ na naĩ.—Alomi 6:23.

Ĩndĩ Yeova nĩwaumĩlilye nzĩa ya kwovosya andũ. Nĩweetĩkĩlilye Mwana wake ũla ũtaĩ na naĩ athĩne na aikwʼa nĩ kana ovosye andũ kuma naĩnĩ na kĩkwʼũnĩ. Nĩkwĩthĩwa Yesũ nĩwamwendete Ĩthe wake na nĩwendete andũ, nĩweetĩkĩlile kumya thayũ wake ũte na naĩ nĩ kana ovosye andũ. (Alomi 5:6-8) Wendo ũsu nĩwʼo watumaa ekala e na ũtanu.b

4. YESŨ NĨWEESĨ ĨTHE WAKE NŨMWENDETE.

“Ũũ nĩwe Mwana wakwa mwendwa, ũla nendeeawʼa nĩwe.”—Mathayo 3:17.

Yeova aneenie ndeto isu ĩla Yesũ wavatisawa. Kwoou, Yeova nĩwoonanisye ũtheinĩ kana nũmwendete Mwana wake, Yesũ. Nĩkyo kĩtumi Yesũ waisye: “Asa nũmbendete”! (Yoana 10:17) Yesũ ndakĩaa kũthekeewa na kũlewa nũndũ nĩweesĩ kana Ĩthe wake nũmwendete. O na ndakĩaa kĩkwʼũ! (Yoana 10:18) Yesũ ekalaa e na ũtanu nũndũ nĩweesĩ Ĩthe wake nũmwendete.

Kwoou, vate nzika Yesũ ekalaa e na ũtanu. Ngelekanyʼo ya Yesũ nĩtonya kũtũtetheesya kũmanya ũndũ tũtonya kwĩkala twĩ na ũtanu. Ĩsomo yĩla yĩatĩĩe yĩneenea ũtao ũla Yesũ wanengie aatĩĩi make wa ũndũ matonya kwĩkala me na ũtanu.